Read Nugunu Tóogio 10 Bible Online

Tóogio 10 - Nugunu bible

Tóogio 10

¹Gámɛ go ɛ́na gɛgaaga gá ɛ́ŋgɛlɛsɛ gíntió gɛ́ siisene go mmoɛná, gɛ́ mba lɛ́ boáalú na nogálámbá, ncancalɛ́ŋa ɛ géŋgelenye odóɛ yá gɛ́. Busío bá gɛ́ bó mba lɛ́ aŋa buisí, bɛgɔ́ndɔ́ bá gɛ́ aŋa mogoná nébígínyéelú íyuke.

²A mba lɛ́ a nona ɛkákálata buunéelú go ombɔ́gɔ. Gɛ́hɛ́ go dála gɛgɔ́ndɔ́ gɛnɔ́mɛ naá máŋɛ́, gɛ́ɛgɛ gá gɛdádɛ́ go cí.

³Gɛ́hɛ́ go áncɛda na ukelú ogɔ́nɔ́ aŋa ŋgoyóŋo ɛ hímemú. Aŋa a mbaá áncɛ́dá, mbalámandáa ɛ́táanɔ na ɛ́handɛ́ go ɛ́da go gide.

⁴Aŋa mbalámandáa sɛ́ɛsɔ sɛ́ mbaá góbá, yɔmɔ́ɔ caá ŋgɔ́ŋɔ, kanɛ́ gámɛ go ɔ́bɔ ukelú yó ɛ́da go úlene naá mmoɛná, yó amɔ́ gámɛ aá: «O do ɔ́ŋɔ́, ɔsɛ́gɔ bɔ́ɔbɔ mbalámandáa ɛ́táanɔ na ɛ́handɛ́ sɛ́ báá nó oyɛ́dá.»

⁵Gɔ́ɔ ɛ́ŋgɛlɛsɛ mɔ́ɔnyɔ a mbaá lɔmɔ́ tɛ́nɛ́ɛ naá máŋɛ́ na naá cí a fediginyemú ombɔ́gɔ onɔ́mɛ go mmoɛná,

⁶a báá bálɛáa go ufíno yá mɔ́ɔnyɔ ɔ ɔyɔmɔ́ go mannyómá aá mannyómáa, mɔ́ɔnyɔ a mbaá gedíe mmoɛná na buimée bɔ́ɔbɔ bó lɔ́mɔ́ kɔ́ɔ, cí na buimée bɔ́ɔbɔ bó lɔ́mɔ́ kɔ́ɔ, máŋɛ́ na buimée bɔ́ɔbɔ bó lɔ́mɔ́ kɔ́ɔ amɔ́: «Gɛcamɛna gá go gɛ́gana gɛ́ dɛ báá.»

⁷Kanɛ́ naá gɛcamɛna gɛ́ɛgɛ ɛ́ŋgɛlɛsɛ ba gátáanɔ na gáandɛ́ɛ a ŋgaá bayɛ́gá go gíde cɛ́bá yɛhɛ́, gɔ́ɔ Asaŋa a ŋgaá hóógío nnindíi ya nokɛsa nɛ́hɛ́; aŋa a mbaá dóógínyóo boyogóní bɛ́hɛ́ báaba bá lɔ́mɔ́ mbúsí sá Asaŋa[35].

⁸Kɔ́ɔ ukelú yɔ́ɔyɔ mbɔɔ́ ɔ́bɔ́ yó ɛ́da go úlene naá mmoɛná yó gɔnɔmɔ́ kálɛda yó amɔ́: «Ɛ́dá, gɔ́lɔ́ kálata yɛ́ɛyɛ ɛ lɔ́mɔ́ buunéelú naá ombɔ́gɔ yá ɛ́ŋgɛlɛsɛ mɔ́ɔnyɔ a lɔ́mɔ́ tɛ́nɛ́ɛ naá máŋɛ́ na naá cí.»

⁹Gámɛ go báyɛkɛna ɛ́ŋgɛlɛsɛ, go mo úhune goŋaá a páa ɛkákálata. Gɛ́hɛ́ go kundie a amɔ́: «Yɛ gɔ́lɔ́ɔmɔ́ o yɛ nyáa. Naá mamɔ́ nyuudé ɛ gaá bɛ́ɛ́mbá sɛmɛsɛmɛ aŋa megúdé má póɔ́ŋɛ́, kanɛ́ ɛ gaá noanánáa naá mamɔ́ gadɛ́ɛ.»

¹⁰Gámɛ go gɔ́lɔ ɛkákálata naá ombɔ́gɔ yá ɛ́ŋgɛlɛsɛ, mbáá hɛ́ nyáá. Naá nyuudé námɛ, hɛ́ mba lɛ́ sɛmɛsɛmɛ aŋa megúdé má póɔ́ŋɛ́, kanɛ́ aŋa mmbaá hɛ́ mɛná, hɛ́ báá bɛ́ɛ́mbá hɛ́ noanana naá gadɛ́ɛ gámɛ[36].

¹¹Kɔ́ɔ bá ŋgoyanamɔ́ bá amɔ́: «O háanana go gɔnɔ dóogonyo bɔ́ɔbɔ Asaŋa a mbaá kɛsɛ́dá go busío bá gɛcɛcá gá mɛɛ́nɔ, gá bɛdɔŋɔ, gá dogálɔ na gá mefuŋe.»