Read Nugunu Tóogio 11 Bible Online

Tóogio 11 - Nugunu bible

Tóogio 11

¹Gɔ́ɔ bá páamɔ́ ombalɔ yɔ́ɔyɔ yó lɔ́mɔ́ aŋa laamɛ go go eninye, bá amɔ́ gámɛ aá: «Fadɛ́gɛ́na, go eninye na mmɛndɛ́ɛ na tɛ́nɛ́ɛ ya Nnyaŋá ya Asaŋa ya Asaŋa, gɛdálɛ́ná, o gunde o ŋa ombanɔ yá batɔ báaba bá búlugenyemú Asaŋa hɔ́ɔ[37].

²Kanɛ́ nnyaáŋgadɛ́ɛ ya Nnyaŋá ya Asaŋa, yɛ dɛ́ɛ́náamɔ́ o do yɛ enínyée, goakɛ́ Asaŋa a mba yɛ íŋéné go mɛɛ́nɔ móncodío máama má ŋgaá bíndée gimmúmpúu gá tɛ́sɔnɔ na bɛgɔ́ndɔ́ go ɛ́da húme ɛfɛ́ otíno áhandɛ́ na ɛ́handɛ́.

³Kanɛ́ gɔ́ɔ ka ŋgaá dómá ŋgominyo sámɛ ɛ́handɛ́ go bosɔ́mɔ, bá dúmenye nogálɔ námɛ medúgú tɔ́sɛnɔ na mantɛdɛ máandɛ́ na otíno ádadɔ́. Bá ŋga báágánáa ŋkudu go butíé.»

⁴Ŋgominyo sá ɛ́handɛ́ sɛ́ɛsɔ sɛ́ lɔ́mɔ́ aŋa magónɛ́dá má boolifíe máandɛ́ na bɛdálɛ́ná lámba bɛ́andɛ́, mɔ́ɔmɔ mó lɔ́mɔ́ tɛ́nɛ́ɛ naá busío bá Daadáa ba cí[38].

⁵Aáŋa mɔtɔ a lɛ́galɛga go bó ŋa gɛbɛ́, gɛlɛ́mbɛ gá íyuke gɛ́ húme naá nyuudé nábɔ́, gɛ́ bogodonyo onyɔ moánɛ. Ɛɛ́ɛŋ, aáŋa mɔtɔ a lɛ́galɛga go bó ŋa gɛbɛ́, nɔ́ɔnɔ gɔ́ɔ a háananamɔ́ go gúe.

⁶Bá bɛanana bogaaga bá go buige mmoɛná, nobólá akɛ́ númmue nó do naáa medúgú miimée máama bá ná ŋamɔ́ bá dúmenye nogálɔ ná Asaŋa. Bá bɛanana bogaaga bá go íyie miimpo manɔ́ŋɔ́ bá gɔnɔ fáa cí gɛca gá bɛɛmba aŋa gɔ́ɔgɔ bá lɛ́galɛgamɔ́[39].

⁷Kanɛ́ aŋa bá ŋgaá maná go dúmenye nogálɔ ná Asaŋa, nnyama yɛ́ɛyɛ ɛ húmenemú naá nobɛ́láa ná findímíi ɛ ŋga bó nuigényée, ɛ bó mánɛgɛna ɛ gɔnɔ bó óna[40].

⁸Bigúe bábɔ́ bɛ́ ŋga lɔbɛ́nɔ́ naá nnyaáŋgadɛ́ɛ ya tɛ́sɔnɔ kɔ́nɔ́ yɛ́ɛyɛ bá dɔ́ŋɔnɔmɔ́ go ncaba bá amɔ́ Sɔdɔ́mɔ ɛ́na lí Egíbítene, anáa bá mbaá gilénée Daadáa babɔ́ naá Kolósi.

⁹Batɔ bá mɛɛ́nɔ miimée, bá egúli eŋkimée, bá dogálɔ duimée na bá bɛdɔŋɔ biimée bá ŋga núúnée bigúe bábɔ́ medúgú mádadɔ́ na gigísi, bá dɛ ŋgó oliminyo goŋaá bá bɛ́ mie.

¹⁰Batɔ bá cí iŋkimée bá ŋga békelényée go nigúe nábɔ́, bá yaŋa, bá fáanɛna moóma, goakɛ́ ŋgominyo sá ɛ́handɛ́ sɛ́ɛsɔ sɛ́ mba bó séésényée makɔ́nɔ́.

¹¹Kanɛ́ naá nnyimé ya medúgú mádadɔ́ na gigísi mɔ́ɔmɔ, mefúnyi má gɛɔyɔ má go ɛ́da go úle naá Asaŋa go bó íŋenine, gáábɔ́ go dómba go fadɛgɛna[41]. Gɔ́ɔ gɛantá gá bofoá gɛ́ gumbenemú báaba bá mbaá lɔmɔ́ bá bó núune.

¹²Gɔ́ɔ ŋgominyo sá Asaŋa ɛ́handɛ́ sɛ́ ɔ́bɔmɔ́ gɛantá gá ukelú yó ɛ́da go úlene naá mmoɛná yó bó oyanɛna yó amɔ́: «Bólɛ́ga nɔnɔ háalá.» Gáábɔ́ go bólɛga naá mmoɛná naá nogálámbá, babɛlɔ́bɛlɔ bábɔ́ bá bó núune.

¹³Naá gigúlí moánɛ, cí go dómba go yiŋkimide na bogaaga, gɛɔdɔ́ɔ gá tɛ́sɔnɔ kɔ́nɔ́ gɛ́ báá húlúgúgénée, batɔ batɔ́sɛnɔ ɛ́táanɔ na ɛ́handɛ́ bá báá fúé naá gɛɛmba gɛ́ɛgɔ. Bofoá go gumbene báaba bá mbaá pambá, gáábɔ́ go ɛ́da go gúmenye Asaŋa mɔ́ɔnyɔ naá mmoɛná.

¹⁴Gɛɛmba gá gáandɛ́ɛ gɛ́ á dómbá, kanɛ́ gá gádadɔ́ɔ, gɛ́ gɛ́ úlene godɔ́ɔdɔ godɔ́ɔdɔ.

¹⁵Ɛ́ŋgɛlɛsɛ ba gátáanɔ na gáandɛ́ɛ go ómbɛda cɛ́bá yɛhɛ́. Bɛantá bá ikelú go dónogoga naá mmoɛná bɛ́ amɔ́: «Bufuŋe bá cí bó ná lɛ́ godɔ́ɔdɔ naá ɛmbɔ́gɔ ya Daadáa bɛcɔ́ na Kilítusu bɛhɛ́; a ŋga gúmée go mannyómá aá mannyómáa[42].»

¹⁶Bafɛanɔ́ɔ nitíno na bénni báaba bá mbaá lɔmɔ́ ndukíi naá ɛŋgɛ́yɔ́ naá busío bá Asaŋa, go obana mosío go cí, go ɛ́da go búlugenye Asaŋa.

¹⁷Bó oya bá amɔ́: «Dɛ go béhiigi Daadáa Asaŋa bogaaga buimée maamɔ́ɔ mɔ́ɔnyɔ o lɔ́mɔ́, maamɔ́ɔ mɔ́ɔnyɔ o mbaá lɔmɔ́, goakɛ́ go á dúfíe gɛantáanta gáhɔ gá bogaaga, o báá lukúményée Bufuŋe báhɔ.

¹⁸Mɛɛ́nɔ má mbɔ ɔ́bɔ́ mpímí nahɔ, kanɛ́ mpímí yahɔ yɛ́ ɛ mbuú úlé. Gɛcamɛna gá go sómbana begúe bɛsɛnɛ gɛ́gɛ́ɛ, gɛcamɛna gá bɛsoɛná go busío bá boyogóní, nɔ́ɔnɔ gó lɛ́ aá: mbúsí sáhɔ, na biimée báaba bɔ́ ɔ́bɛnɔnɔmɔ́ nahɔ, bá gunde bá go hálamanana, akɛ́ baábayɔ́ akɛ́ bagɔ́nɔ́. Gɛcamɛna tɔ́nɔ gá go fúugie batɔ báaba bá fúugenyemú cí[43].»

¹⁹Gɔ́ɔ, Nnyaŋá ya Asaŋa ɛ bébuunemú naá mmoɛná, gisímbí gá gɛlada bugúle gɛ báá bédúfíe hɔ́ɔ. Mpólómɛnáa go ɛ́da go bege, ikelú ɛ dónogogana, mbalámandáa sɛ́ gide, cí ɛ yiŋkime, gɛantá gá nobólá ná adánɛ́ gɛ́ naanana.