Read Nugunu Tóogio 12 Bible Online

Tóogio 12 - Nugunu bible

Tóogio 12

¹Gɔ́ɔ naá nnyimé hɔ́ɔlɔ́, gieninye gɛgɔ́nɔ́ gɛ́ bédúfiemú naá mmoɛná. Gámɛ go ɛ́na okɔ́dɔ, buisí bó mba lɛ́ gɛla gɛ́hɛ́, ofɛ́ naá bɛgɔ́ndɔ́ bɛ́hɛ́ cí, ɛdaada há muotóti móɔ́dɔ́ na móandɛ́ naá odóɛ yɛ́hɛ́.

²Okɔ́dɔ bendiemi a mba lɛ́ na ibume, a báa lɛ gó ɛ́da go ánca na gonómana gá go bíene.

³Gieninye gíntió go bédúfie naá mmoɛná: gámɛ go ɛ́ná gɛantá gá nnyɔ́gɔ ndume bɛ́lɛ́ŋɛ́bɛlɛŋɛ aŋa íyuke. Ɛ mba lɛ́ na ɛdóɛ ɛtáanɔ na ɛhandɛ́ na modɔ́ŋɔ móɔ́dɔ́. Naá ɛdóɛ yɛhɛ́, motaatáda kɔ́ɔ motáanɔ na móandɛ́.

⁴Umío yá yɛ́ yó mba lɛ́ yó túlune gɛdadɔ́ɔ gá muotóti má mmoɛná mó nco go obana go cí. Nnyɔ́gɔ ndume go nco dɛ́lɛmɛna naá busío bá okɔ́dɔ, ɛ gɛ́gana go mɛna moɔnɔ́ aŋa okɔ́dɔ a gaá ná bíéné.

⁵Okɔ́dɔ go bíene moɔnɔ́ onɔ́mɔtɔ́. Mɔ́ɔ a ŋgaá nonáa mɛɛ́nɔ miimée aŋa gɛkɔ́nɔ́nɔ́ɔ gá ufuŋe[44]. Aŋa okɔ́dɔ a mbaá bíéné, bá báa lɛ gó nco go úlie moádɔmbɔ́, bá bɛ́ɛ́ ɛ́dá nɛhɛ́ naá boayá bá Asaŋa, naá oŋgɛ́yɔ́ yɛ́hɛ́.

⁶Okɔ́dɔ, mɔ́ɔ, a báá ságɛ́ná, a bɛ́ɛ́ ɛ́dá naá giolóo gá bodɛ́agadɛ́ anáa Asaŋa a mbaá mo gedínyée goŋaá bá mo dúge hɔ́ɔ medúgú tɔ́sɛnɔ na mantɛdɛ máandɛ́ na otíno ádadɔ́.

⁷Gɔ́ɔ nɛnoa nɛ́ obamɔ́ naá mmoɛná. Mɛ́sɛálɛ na bɛɛ́ŋgɛlɛsɛ bɛ́hɛ́ bá nuigenye nnyɔ́gɔ ndume, nnyɔ́gɔ ndume tɔ́nɔ na bɛ́hɛ́ bɛɛ́ŋgɛlɛsɛ ɛ nuigenye.

⁸Mɛ́sɛálɛ na bɛɛ́ŋgɛlɛsɛ bɛ́hɛ́ go mánɛgɛna nnyɔ́gɔ ndume na bɛɛ́ŋgɛlɛsɛ bɛ́hɛ́, bá báá lɔbɛ́nɔ́ kanɛ gɔnɔ́ ndukúménínée naá mmoɛná.

⁹Gɔ́ɔ bá túlunemú gɛantá gá nnyɔ́gɔ ndume, gɛcóa gá nnyɔ́gɔ, gɛ́ɛgɛ bá dɔ́ŋɔnɔmɔ́ bá amɔ́ Ohándá gɔnɔ́ Sátana, umbelíbélí ba batɔ bá cí iŋkimée, go mo nɔ go cí olɔŋɔ na bɛɛ́ŋgɛlɛsɛ bɛ́hɛ́[45].

¹⁰Kɔ́ɔ ŋgɔ́bɔmɔ́ gɛantá gá ukelú yó ɛ́da go úlene naá mmoɛná yó amɔ́: «Godɔ́ɔdɔ gɛcamɛna gá Asaŋa go sódio batɔ gɛ́ á bolá, gɛcamɛna gá bogaaga na Bufuŋe bá Asaŋa bɛcɔ́, tɔ́nɔ gɛcamɛna gá nɛgaŋa ná Kilítusu bɛhɛ́, goakɛ́ bá á túlúné naá mmoɛná mɔ́ɔnyɔ a ná lɔmɔ́ a sɔ́mɔnɔ bolimóní bɛ́cɔ́. A lɔ́mɔ́ mɔ́ɔ a ná lɔmɔ́ a bó sɔ́mɔnɔ naá boayá bá Asaŋa bɛcɔ́ aŋa sisíi aŋa budúgú[46].

¹¹Kanɛ́ bolimóní bɛ́cɔ́ bá lɛ́ mo mánɛ́gɛ́náalú go busío bá manɔ́ŋɔ́ má moɔnɔ́ ba gɛdómbáa, tɔ́nɔ go busío bá nogálɔ ná Asaŋa nɔ́ɔnɔ bá mbaá dúmbényée bá amɔ́ nó lɛ́ mammana. Bá lɛ́ kanɛ go maamana gɛɔyɔ gábɔ́ gó húme goŋaá bá díine nigúe.

¹²Go busío moánɛ, bɛ́ɛ́mba nɔnɔ naá bɛyaŋa, mmoɛná na bɛɛnyɔ́ɔ báaba no bɛananamɔ́ kɛ́gɛ́ná yɛnyɔ́ hɔ́ɔ! Gɛbɛ́ makɔ́nɔ́ nɛnyɔ́, bɛɛnyɔ́ɔ báaba no ɔyɔmɔ́ naá cí na naá máŋɛ́, goakɛ́ ohándá a á nyó gɔsɛ́nɔ́, a lɛ́ na gimpímímpímí, i íyimene a amɔ́ a dɛ báá gɔnɔ́ go gɛantá gá gɛcamɛna.»

¹³Aŋa nnyɔ́gɔ ndume ɛ mbɛɛ́ ɛ́ná goŋaá yɛ á húlúgúgé go cí, gá yɛ́ go ɛ́da go búíyime okɔ́dɔ mɔ́ɔnyɔ a mbaá bíéné moɔnɔ́ onɔ́mɔtɔ́.

¹⁴Kanɛ́ bá báá lɛ gó fáa okɔ́dɔ bɛbaga bá ɛnɔŋɔ ɛgɔ́nɔ́ go goŋaá a puluguge ɛ ɛ́da naá giolóo gá bodɛ́agadɛ́, naá hoóma háaha bá mbaá mo gedínyée goŋaá bá mo dúge hɔ́ɔ. A bɛ́ɛmba halaháláa na nnyɔ́gɔ, a gɛ́ga hɔ́ɔ nnyómá ɛ́dadɔ́ na gigísi[47].

¹⁵Gɔ́ɔ nnyɔ́gɔ ɛ nodamɔ́ naá nnyimé ya okɔ́dɔ miimpo aŋa osaá, goŋaá a yíme kɔ́ɔ.

¹⁶Kanɛ́ cí go pembie okɔ́dɔ, ɛ báá polígó, ɛ báá mɛna osaá yɔ́ɔyɔ nnyɔ́gɔ ndume ɛ mbaá nodá.

¹⁷Na gimpímímpímí gɛ́ɛgɛ nnyɔ́gɔ ndume ɛ mbaá lɔmɔ́ na gɛ́ go okɔ́dɔ, gɔ́ɔ yɛ ɛ́damɔ́ go nɛnoa na mbɔ́dɔ ya okɔ́dɔ yɛ́ɛyɛ intió. Mbɔ́dɔ moánɛ ɛ lɔ́mɔ́ batɔ báaba bá beŋebeŋemú bicele bá Asaŋa bá gɔnɔ bɛ́dɛgana nogálɔ ná Yésusu.

¹⁸Gɔ́ɔ ɛ bádámbamɔ́ naá cɔ́lɔ ya máŋɛ́.