Read Nugunu Tóogio 13 Bible Online

Tóogio 13 - Nugunu bible

Tóogio 13

¹Gámɛ go ɛ́na nnyama ɛ húmene naá máŋɛ́, na modɔ́ŋɔ móɔ́dɔ́ na ɛdóɛ ɛtáanɔ na ɛ́handɛ́. Modɔ́ŋɔ má yɛ́ mó mba lɛ́ na motaatáda móɔ́dɔ́, ɛdóɛ ya yɛ́ ɛ mba lɛ́ na ifíno ya go sɛga Asaŋa kɔ́ɔ ɔ́ŋɔ́ɔlú.

²Nnyama yɛ́ɛyɛ mmbɛɛ́ ɛ́ná, ɛ mba lɛ́ ɛ fóanana ŋkɔ, bɛgɔ́ndɔ́ bá yɛ́ aŋa bá gɛɔbɔ́, nyuudé ná yɛ́ aŋa ná ŋgoyóŋo. Nnyɔ́gɔ ndume go yɛ fáa bogaaga, oŋgɛ́yɔ́ na gɛantáanta gá nɛgaŋa.

³Odóɛ yá yɛ́ yúmmue yó mba lɛ́ aŋa na gɛantá gá buobi gá go yɛ óna, akɛ́ nɔ́ɔnɔ, mpéŋé ya ndiemi ɛ báá maná. Cí iŋkimée go ɛ́da go lɛ́ɛma, ɛ báá biené nnyama.

⁴Batɔ biimée go ɛ́da go búlugenye nnyɔ́gɔ ndume goŋaá ɛ mba fáá nnyama nɛgaŋa, bá búlugenye tɔ́nɔ nnyama bá amɔ́: «Ánɛ́ɛ a lɔ́mɔ́ aŋa nnyama o? Ánɛ́ɛ a lɔ́mɔ́ ba go yɛ nuigenye o?»

⁵Bá báá gó fáa nnyama bogaaga bá go húmenye bɛgálɔgálɔ́, na bá go sɛga Asaŋa. Bá báá yɛ fáá bogaaga bá go ŋanana nɔ́ɔnɔ gó ɛ́da go éme ɛfɛ́ otíno áhandɛ́ na ɛ́handɛ́[48].

⁶Nnyama gá yɛ́ go buune nyuudé go go sɛga Asaŋa, ɛ sɛga ufíno yɛ́hɛ́, na hoóma háaha a gɛ́gamɔ́ hɔ́ɔ, na biimée báaba bá gɛ́gamɔ́ naá mmoɛná.

⁷Bá báá yɛ fáá bogaaga bá go nuigenye boɛ́nɔ bá Asaŋa, ɛ bó mánɛgɛna[49]; bá báá yɛ fáá bogaaga bá go nona nigúli niimée, boɛ́nɔ buimée, nogálɔ nuimée na gɛdɔŋɔ giimée.

⁸Batɔ bá cí biimée bá ŋga yɛ búlúgényée, biimée báaba ufíno yábɔ́ yó lɔ́mɔ́ yó do bɛ́ɛ́mba ɔ́ŋɔ́ɔlú naá kálata ya gɛɔyɔ ya moɔnɔ́ ba gɛdómbáa mɔ́ɔnyɔ bá mboó óná, gó dúme aŋa cí ɛ mbaá bayɛ́gá.

⁹Mɔ́ɔnyɔ a lɔ́mɔ́ na edúu, ŋgɔ́ɔ ɔ ɔ́bɔ.

¹⁰Aáŋa bó lɛ́ goŋaá o ŋga bɛ́ɛ́mbá ŋkólío, mammana, o ŋga bɛ́ɛ́mbá ŋkólío. Aáŋa bó lɛ goŋaá o ŋga gúé kalafɔ, mammana, o ŋga gúé kalafɔ. Boóma moánɛ bɔ́, báaba bɔ́ ɔ́bɛnɔnɔmɔ́ na Asaŋa, gɛcamɛna gá go bágóɛga naá gioliminyo gɛ́gɛ́ɛ.

¹¹Gámɛ go gɔnɔ go ɛ́na nnyama intió ɛ húmene go cí. Ɛ mba lɛ́ na modɔ́ŋɔ móandɛ́ aŋa má moɔnɔ́ ba gɛdómbáa, kanɛ́ ɛ gálagala aŋa nnyɔ́gɔ ndume.

¹²Ɛ mba lɛ́ ɛ yɔgɔnɔ naá bogaaga bá nnyama ya busío, ɛ yɔgɔnɔ naá busío bá yɛ́. Ɛ mba lɛ́ ɛ gaŋa cí na batɔ bá cí biimée goŋaá bá búlugenye nnyama ya busío yɛ́ɛyɛ mpéŋé ya yɛ́ ya go mo óna ɛ mbaá maná.

¹³Nnyama ya gáandɛ́ɛ yɛ́ɛyɔ ɛ mba lɛ́ ɛ ŋanana bɛantá bá bɛsɛɔ, ɛ mba lɛ́ ɛ siisenye íyuke go mmoɛná hɛ́ nco go obana go cí, batɔ biimée bá núune.

¹⁴Ɛ mba lɛ́ ɛ nenugenye batɔ bá cí na bɛsɛɔ bɛ́ɛbɛ ɛ mbaá lɔmɔ́ ɛ ŋanana naá oŋgíso yá nnyama ya busío. Ɛ mba lɛ́ yɛ oyanɛna batɔ bá cí yɛ amɔ́ bá díliminye hɛɔcɔ naá gieninye gá nnyama yɛ́ɛyɛ bá mbaá canɛ́dá na kalafɔ, asáa gɔgɔ́, yɛ́ ɛ dúmbenye na goɔyɔ.

¹⁵Bá báá fáá nnyama ya gáandɛ́ɛ bogaaga bá goŋaá ɛ fáa gieninye gá nnyama ya busío gɛɔyɔ, go goŋaá yɛ ɛ́da go gálagala, yɛ óna biimée báaba bá ŋgií inyé go yɛ búlugenye.

¹⁶Ɛ mba lɛ́ ɛ gaŋa batɔ biimée, baábayɔ́ na bagɔ́nɔ́, bɛnɔ́mɛ na basógasoga, bɛɔlɛ́ na báaba bá lɔ́mɔ́ bá dɛ bɛ́ɛ́mbá bɛɔlɛ́, goŋaá bá bɛa gibélincígínyí naá ombɔ́gɔ onɔ́mɛ ɛ́na lí go nobɔlɔ.

¹⁷Mɔtɔ a dɛ mbáa lɛ ba go ɔ́ndɔ ɛ́na lí a dúe, aáŋa a dɛ bɛanánáa gibélincígínyí gɛ́ɛgɔ, nɔ́ɔnɔ gó lɛ́ aá, ufíno yá nnyama ɛ́na lí ombanɔ yó ufíno yá yɛ́.

¹⁸Gɛcamɛna gá goŋaá mɔtɔ a bɛa ndɛncɛ́ná masɔ́mɔ gɛ́gɛ́ɛ. Mɔ́ɔnyɔ a lɔ́mɔ́ na nciŋí a háanana go falona aŋa ombanɔ yá nnyama yó lɔ́mɔ́ naá cí, goakɛ́ yó lɛ́ ombanɔ yá mɔtɔ. Ombanɔ moánɛ yó lɔ́mɔ́ mantɛdɛ mátáanɔ na búmmue na otíno ádadɔ́ na motáanɔ na hímmue.