Read Nugunu Tóogio 14 Bible Online

Tóogio 14 - Nugunu bible

Tóogio 14

¹Aŋa mmbaá núúnídé, gámɛ go gɔnɔ go ɛ́na Moɔnɔ́ ba gɛdómbáa tɛ́nɛ́ɛ naá ogɔndɔ yá Síyono, nɛhɛ́ na batɔ batɔ́sɛnɔ ntɛdɛ na batɔ́sɛnɔ otíno áhandɛ́ na bénni, báaba bá mbaá lɔmɔ́ na ufíno yɛ́hɛ́, na ufíno yá Isée bɛhɛ́ ɔ́ŋɔ́ɔlú go dobɔlɔ dábɔ́.

²Gámɛ go ɔ́bɔ ukelú yó ɛ́da go úlene naá mmoɛná yó dɔgɔnɔ aŋa miimpo má osaá, aŋa mbalámandáa yɛ́ɛyɛ ɛ gidemú na bogaaga. Ukelú yɔ́ɔyɔ mmbɔɔ́ ɔ́bɔ́ yó mba lɛ́ aŋa osagɔ yɔ́ɔyɔ begidí molɔ́ŋɔ́ bá áganamɔ́ na molɔ́ŋɔ́ mábɔ́.

³Batɔ́sɛnɔ bá batɔ bɔ́ɔbɔ bá mba lɛ́ bá ágana gɛpáa gá osagɔ naá busío bá oŋgɛ́yɔ́, naá busío bá bigedie bínni, na naá busío bá bafɛanɔ́ɔ. Mɔtɔ a dɛ mbáa lɛ ba go hóona osagɔ moánɛ, aáŋa caá goana batɔ batɔ́sɛnɔ ntɛdɛ na batɔ́sɛnɔ otíno áhandɛ́ na bénni báaba bá mbaá fáŋá naá cí.

⁴Bá lɛ́ kanɛ go báága biílo na bakɔ́dɔ, mammana bá lɛ́ na mmúkú kɛ́. Bá bienene moɔnɔ́ ba gɛdómbáa hoóma hiimée háaha ɛ ɛ́danamɔ́. Asaŋa a mba bó fáŋá naá kadɛ́gadɛ́ɛ ya batɔ goŋaá bá bɛ́ɛmba bá busío íŋénéelú go busío bɛ́hɛ́, gɔnɔ́ go busío bá moɔnɔ́ ba gɛdómbáa,

⁵gɔnɔ́ naá nyuudé nábɔ́ mebelébélíe má dɛ báá kɔ́ɔ[50]; bá lɛ́ kanɛ cigíi.

⁶Gámɛ go ɛ́na ɛ́ŋgɛlɛsɛ uncodío a fueŋe go mmoɛná. A mba lɛ́ na Gɛnɔ́gɔ́ gá Cɔ́mɔ gɛ́ɛgɛ gɛ́ lɔ́mɔ́ gɛ́ dɛ manánáa go go dúmeninye batɔ báaba ba lɔ́mɔ́ naá cí, go bɛdɔŋɔ biimée, egúli eŋkimée, dogálɔ duimée na mɛɛ́nɔ miimée.

⁷A mba lɛ́ a gálagala ukelú naá mmoɛná a amɔ́: «Hálámánánáa nɔnɔ Asaŋa no mo gúmenye, goakɛ́ gɛcamɛna gɛ́hɛ́ gá go sómba bɛsɛnɛ gɛ́ á háá. Búlúgényée nɔnɔ mɔ́ɔnyɔ a mbaá gedíe mmoɛná na cí, máŋɛ́ na ɛsɔmbɔ.»

⁸Ɛ́ŋgɛlɛsɛ uncodío ba gáandɛ́ɛ go biene ba busío a amɔ́: «Bábɛlɔnɛ ba ogɔ́nɔ́ a báa go oba, a báa go oba o! A báa go bényúigie bɛdɔŋɔ biimée mɔgɛ́bɔ má gɛbɛ́ gɛbɛ́ gɛ́hɛ́ gá gɛɔyɔ gá hanyɔ́[51].»

⁹Ɛ́ŋgɛlɛsɛ ba gádadɔ́ɔ go biene báaba bá báandɛ́ ɛ ɛ́da a gálagala ukelú naá mmoɛná a amɔ́: Mɔtɔ a amɔ́ a búlugenye nnyama na gieninye gá yɛ́, a gɔnɔ bɛa gibélincígínyí gá yɛ́ go nobɔlɔ ɛ́na lí go ombɔ́gɔ,

¹⁰a ŋga bónyó tɔ́nɔ mɔgɛ́bɔ má gimpímímpímí gá Asaŋa. Má ndiemi má lɛ́ ágáalú naá kɔ́bɔ ya gimpímímpímí gɛ́hɛ́ kanɛ go nebiginye. Mɔtɔ moánɛ a ŋga bɛáa noséésényée naá íyuke na naá ndusú naá busío bá bimmúmpúu bá bɛɛ́ŋgɛlɛsɛ na bá moɔnɔ́ ba gɛdómbáa[52].

¹¹Ncóki sá noséésényée nábɔ́ sɛ́ ŋga dúúgée go mannyómá aá mannyómáa, báaba bá búlugenyemú nnyama na gieninye gá yɛ́ bá dɛ ŋgá bɛa gofuuge akɛ́ na sisíi akɛ́ na budúgú, na uŋkimée mɔ́ɔnyɔ a bɛamɔ́ gibélincígínyí gá ufíno yá yɛ́.

¹²Gɛcamɛna gá go bágóɛga gɛ́gɛ́ɛ go bimmúmpúu bɛ́ɛbɛ bɛ́ bɛ́dɛganamɔ́ bɛlɔsɛnɔ bá Asaŋa, bɛ́ ágana odɛ́má yábɔ́ naá Yésusu.

¹³Kɔ́ɔ ŋgɔ́bɔmɔ́ ukelú yó ɛ́da go úlene naá mmoɛná yó amɔ́: «Ɔ́ŋɔ́ go amɔ́, besé makɔ́nɔ́ gó bayɛga godɔ́ɔdɔ go báaba bá gúenenemú báladáalú na Daadáa.» Gimmúmpúu gá Giliíli o oya a amɔ́: «Bó lɛ́ mammana, ŋgáa bá fuuge go medíge mábɔ́, goakɛ́ meŋiigíe mábɔ́ má bó fídene.»

¹⁴Ŋgaá núúnídé, gámɛ go ɛ́na nogálámbá púyúŋúpuyuŋu, naá nogálámbá nɔ́ɔnɔ, boóma ndukíi kɔ́ɔ bó fóanana aŋa mɔtɔ. A mba lɛ́ na ɛdaada há góolo go odóɛ, na ofánɔ yá go dɛ́a go ombɔ́gɔ.

¹⁵Ɛ́ŋgɛlɛsɛ untió go húme naá Nnyaŋá ya Asaŋa, go ɛ́da go gálagala ukelú naá mmoɛná, o oyanɛna mɔtɔ mɔ́ɔnyɔ a mbaá lɔmɔ́ ndukíi naá nogálámbá a amɔ́: «Gɔ́lɔ́ mamɔ́ ofánɔ, sáŋáa. Gɛcamɛna gá go sáŋa gɛ́ báa go háa. Moóma má cí mó báa go gónɛna go masáŋa.»

¹⁶Gɔ́ɔ mɔ́ɔnyɔ a mbaá lɔmɔ́ ndukíi naá nogálámbá a nɔɔmɔ́ ofánɔ yɛ́hɛ́ go cí, a báá sáŋáa moóma má cí.

¹⁷Ɛ́ŋgɛlɛsɛ untió go húme naá Nnyaŋá ya Asaŋa ya mmoɛná, a nona tɔ́nɔ ofánɔ yá go dɛ́a.

¹⁸Ɛ́ŋgɛlɛsɛ untió gɔnɔ́ go húme, ɛ ɛ́da go úlene naá boayá bá gɛdálɛ́ná. A mba lɛ́ a bɛanana bogaaga bá go mánɛgɛna íyuke. Gɛ́hɛ́ go ɛ́da go gálagala ukelú naá mmoɛná, o oyanɛna mɔ́ɔnyɔ a mbaá lɔmɔ́ a nona ofánɔ yá go dɛ́a a amɔ́: «Gɔ́lɔ́ mamɔ́ ofánɔ yá go dɛ́a, o sáŋa bɛcágá bá moóma má cí, goakɛ́ bɛsamɔ́ bá bɛ́ bɛ́ báá go gónɛna.»

¹⁹Ɛ́ŋgɛlɛsɛ go gɔ́lɔ ofánɔ yɛ́hɛ́, a bɛ́ɛ́ ɛ́dá go sáŋa bɛcágá bá moóma má cí, a bɛ́ nɔɔnɔnɔ naá gɛantá gá osá gá mpímí ya Asaŋa.

²⁰Bá báá naadáa bɛsamɔ́ naá osá caá akɛ́ naá tɛ́sɔnɔ gadɛ́ɛ. Manɔ́ŋɔ́ go húmene naá osá yɔ́ɔyɔ, má báá ncó bola naá nyuudé ná nnyádɛ[53]; má báá saáa bakɛ́lomɛ́da mantɛdɛ mádadɔ́.