Read Nugunu Tóogio 15 Bible Online

Tóogio 15 - Nugunu bible

Tóogio 15

¹Gámɛ go ɛ́na gieninye gíncodío naá mmoɛná, gɛ́ mba lɛ́ gɛantá gá boóma bá go békúke. Bɛɛ́ŋgɛlɛsɛ bátáanɔ na báandɛ́ bá mba lɛ́ bá nona bɛɛmba bɛ́táanɔ na bɛ́andɛ́. Bɛɛmba bɛ́ɛbɔ bɛ́ mba lɛ́ bá mesúgidinye, bɛ́ hóogonyo mpímí ya Asaŋa.

²Kɔ́ɔ ŋgɛ́náamɔ́ máŋɛ́ seŋgélégédé na íyuke kɔ́ɔ. Gámɛ go gɔnɔ go ɛ́na biimée báaba bá mbaá mánɛ́gɛ́ná nnyama, gieninye gá yɛ́ na ombanɔ yá ufíno yá yɛ́. Bá mba lɛ́ tɛ́nɛ́ɛ naá máŋɛ́ má seŋgélégédé bá nona molɔ́ŋɔ́ má Asaŋa.

³Bá mba lɛ́ bá ágana osagɔ yá Mɔ́sɛsɛ, uyogóní ba Asaŋa, na osagɔ yá Moɔnɔ́ ba gɛdómbáa bá amɔ́: «Daadáa Asaŋa Bogaaga buimée, meŋiigíe máhɔ má lɛ́ bɛantá bá moóma bá go békúke. Ufuŋe ogɔ́nɔ́ yá mɛɛ́nɔ[54], pɛ́ sáhɔ sɛ́ lɛ́ tɛ́nɛ́ɛ gɔnɔ́ mammana.

⁴Daadáa, ánɛ́ɛ a lɔ́mɔ́ a dɛ bɛ́ɛ́mbá ba go hálamanana a gunde a gúmenye ufíno yáhɔ o? Mammana, maamɔ́ɔ mokáa o lɔ́mɔ́ gimmúmpúu. Mɛɛ́nɔ miimée má ŋgu úlénée go go nco go búlugenye, goakɛ́ go á bó dúfíe daŋɛ́daŋɛ bɛtɛ́nɛ́nɛ́ɛ báhɔ bá meŋiigíe[55].»

⁵Naá nnyimé hɔ́ɔlɔ́, gɔ́ɔ ŋgɛ́namɔ́ Nnyaŋá ya Asaŋa yɛ́ɛyɛ ɛ mbaá lɔmɔ́ na gincumu gá gɛlada bugúle bébuunéelú naá mmoɛná[56].

⁶Bɛɛ́ŋgɛlɛsɛ bátáanɔ na báandɛ́ báaba bá mbaá lɔmɔ́ bá nona bɛɛmba bɛ́táanɔ na bɛ́andɛ́ go húme naá Nnyaŋá ya Asaŋa. Bá mba lɛ́ na bɛla sogógáalú, púyúŋúpuyuŋu, na kandáa sá góolo básómbɛ́náalú go gɛsasɔ.

⁷Gigedie gɛgɔ́sɔ gímmue naá bínni go fáa bɛɛ́ŋgɛlɛsɛ bátáanɔ na báandɛ́ kɔ́bɔ sá góolo ɛ́táanɔ na ɛ́handɛ́ dácɛ na gimpímímpímí gá Asaŋa mɔ́ɔnyɔ ɔ ɔyɔmɔ́ go mannyómá aá mannyómáa.

⁸Ncóki sá nigúmi ná Asaŋa na bogaaga bɛ́hɛ́ go hóogo naá Nnyaŋá ya Asaŋa[57]. Mɔtɔ a dɛ mbáa lɛ ba go íŋene naá Nnyaŋá ya Asaŋa kanɛ goŋaá bɛɛmba bɛ́táanɔ na bɛ́andɛ́ bɛ́ɛbɛ bɛɛ́ŋgɛlɛsɛ bá mbaá lɔmɔ́ na bɛ́ bɛ́ ɛ́ ɛ́nánɛ́náa.