Read Nugunu Tóogio 16 Bible Online

Tóogio 16 - Nugunu bible

Tóogio 16

¹Gámɛ go ɔ́bɔ gɛantá gá ukelú gɛ́ úlene naá Nnyaŋá ya Asaŋa, gɛ́ oyanɛna bɛɛ́ŋgɛlɛsɛ bátáanɔ na báandɛ́ gɛ́ amɔ́: «Ɛ́dá nɔnɔ no ude go cí kɔ́bɔ ɛ́táanɔ na ɛ́handɛ́ sá mpímí ya Asaŋa.»

²Ɛ́ŋgɛlɛsɛ ba busío go ɛ́da, a búú udé kɔ́bɔ yɛhɛ́ go cí. Batɔ báaba bá mbaá lɔmɔ́ na gibélincígínyí gá nnyama, báaba bá mbaá búlúgényée gieninye gá yɛ́, gáábɔ́ go bɛa bɛdɔ́lɛgɔ bɛ́ɛbɛ bɛ́ mbaá lɔmɔ́ bɛ́ bó yúume makɔ́nɔ́[58].

³Ɛ́ŋgɛlɛsɛ ba gáandɛ́ɛ a búú udé kɔ́bɔ yɛhɛ́ naá máŋɛ́. Máŋɛ́ má báá gundé aŋa manɔ́ŋɔ́ má mɔtɔ ugúe; kɔ́ɔ buimée bɔ́ɔbɔ bó mbaá lɔmɔ́ bó ɔyɔ naá máŋɛ́ bó gúemú.

⁴Ɛ́ŋgɛlɛsɛ ba gádadɔ́ɔ a búú udé kɔ́bɔ yɛhɛ́ naá ɛsaá na naá ɛsɔmbɔ, kɔ́ɔ mó ɛ́yanamɔ́ manɔ́ŋɔ́[59].

⁵Gámɛ go ɔ́bɔ ɛ́ŋgɛlɛsɛ ba miimpo a gálagala a amɔ́: «Maamɔ́ɔ o lɛ́ mokáa gimmúmpúu, maamɔ́ɔ mɔ́ɔnyɔ o lɔ́mɔ́, maamɔ́ɔ mɔ́ɔnyɔ o mbaá lɔmɔ́, go á dúfíe botɛ́nɛ́ɛ naá gosómba gáhɔ gá bɛsɛnɛ.

⁶Aŋa gɔ́ɔgɔ bá mbaá húményée manɔ́ŋɔ́ má bimmúmpúu na má mbúsí sá Asaŋa, nɔ́ɔ gɔ́ɔ go á ná bó bényúígíe manɔ́ŋɔ́. Bá háanana na boóma moánɛ.»

⁷Kɔ́ɔ ŋgɔ́bɔmɔ́ ukelú yó ɛ́da go úlene naá gɛdálɛ́ná yó gálagala yó amɔ́: «Ɛɛ́ɛŋ, Daadáa Asaŋa bogaaga buimée, mbɔ́dɔ yahɔ ya go sómba bɛsɛnɛ ɛ lɛ́ tɛ́nɛ́ɛ, ɛ lɛ́ mammana.»

⁸Ɛ́ŋgɛlɛsɛ ba génni a búú udé kɔ́bɔ yɛhɛ́ naá buisí; kɔ́ɔ buisí bó bɛamɔ́ bogaaga bá go lulenye batɔ na íyuke há bɔ́.

⁹Batɔ go lola na onɔmɔnɔmɔ yá gɛonyá; bá bɛ́ɛ́ ɛ́dá go sɛga ufíno yá Asaŋa mɔ́ɔnyɔ a bɛananamɔ́ bogaaga bá go nona bɛɛmba bɛ́ɛbɔ, bá bíí ínyé go núgie gɛɔyɔ go go mo gúmenye.

¹⁰Ɛ́ŋgɛlɛsɛ ba gátáanɔ a búú udé kɔ́bɔ yɛhɛ́ naá oŋgɛ́yɔ́ yá nnyama; kɔ́ɔ bufuŋe bá yɛ́ bó obɛnamɔ́ naá mbíno[60]. Batɔ bá bɛ́ɛ́ ɛ́dá go banda bigélédé, goakɛ́ bá mba lɛ́ bɔ́ ɔ́bɛgɔnɔ makɔ́nɔ́.

¹¹Bá bɛ́ɛ́ ɛ́dá go sɛga Asaŋa mɔ́ɔnyɔ naá mmoɛná go busío bá makánya mábɔ́ na bɛdɔ́lɛgɔ bábɔ́. Kanɛ́ bá lɛ́ kanɛ go núgie bɛgáda bábɔ́ bá meŋiigíe.

¹²Ɛ́ŋgɛlɛsɛ ba gátáanɔ na gémmue a búú udé kɔ́bɔ yɛhɛ́ naá gɛantá gá osaá Ɛfaláatɛ. Kɔ́ɔ osaá yó dómbamɔ́ go sága, yó báá fáá mefuŋe má go ɛ́da go úle gɛayáa gá mbálɛ́ná buisí pɛ́[61].

¹³Gɔ́ɔ ŋgɛ́namɔ́ bɛgáda bá biliíli bɛ́dadɔ́, bɛ́ fóanana mobɛmbɛ, bɛ́ húmene naá nyuudé ná nnyɔ́gɔ ndume, na naá nyuudé ná nnyama, na naá nɛ́ɛnɛ ná mbúsí ya mbele.

¹⁴Bó lɔ́mɔ́ biliíli bá bahándá[62], bɛ́ bɛ́ ŋananamɔ́ bɛsɛɔ. Bɛ́ ɛ́da huenenye mefuŋe má cí iŋkimée go go má bándɛgɛna go nɛnoa ná gɛantá gá buisí bá Asaŋa bogaaga buimée.

¹⁵Daadáa a amɔ́: «Bódólígínyóomú, ŋgúlene boasɛ aŋa uŋgíbi. Besé makɔ́nɔ́ na mɔ́ɔnyɔ a gɛ́gamɔ́ pɔnyɛ́ɛ na bɛla bɛ́hɛ́ go nnyɔ́dɔ, go goŋaá a dɛ ɛ́dá go ɛnda nnú gɔdɔɔ́ naá oŋgíso yá batɔ, a nóa odóɛ.»

¹⁶Biliíli bɛ́ɛbɔ go bándɛgɛna mefuŋe naá hoóma háaha bá dɔ́ŋɔnɔmɔ́ na nohébelée bá amɔ́ Alamagɛdɔ́ŋɔ[63].

¹⁷Ɛ́ŋgɛlɛsɛ ba gátáanɔ na gáandɛ́ɛ a búú udé kɔ́bɔ yɛhɛ́ go mmoɛná. Ukelú go dónogoga naá Nnyaŋá ya Asaŋa, yó ɛ́da go úlene naá oŋgɛ́yɔ́, yó amɔ́: «Bó á háá!»

¹⁸Gɔ́ɔ mpólómɛnáa ɛ bayɛgamɔ́ go bege, ikelú ɛ gundume, mbalámandáa sɛ́ gide, cí ɛ báá yiŋkímídé na bogaaga, mbɔ́dɔ yɛ́ɛyɛ bó gá báasamɔ́ bó do báŋaáa gó bayɛga aŋa mɔtɔ a lɔ́mɔ́ naá cí.

¹⁹Aŋa cí ɛ mbaá yiŋkímídé, gɛantá gá tɛ́sɔnɔ gɛ́ báá básalá go biseli bɛ́dadɔ́; tɔ́nɔ tɛ́sɔnɔ sá bɛdɔŋɔ biimée sɛ́ báá húlúgúgénée. Gɔ́ɔ Asaŋa a béeniŋinyemú tɛ́sɔnɔ yɛ́ɛyɛ bá dɔ́ŋɔnɔmɔ́ bá amɔ́ Bábɛlɔnɛ ba ogɔ́nɔ́, go go yɛ bényúigie kɔ́bɔ ya mɔgɛ́bɔ yɛ́ɛyɛ gimpímímpímí gɛ́hɛ́ gɛ́ dɔgɔnɔmɔ́ kɔ́ɔ[64].

²⁰Bigísi bá cí biimée bɛ́ɛbɛ naá miimpo bɛ́ báá ságɛ́ná, na ɛgɔndɔ kɛ́, bá dɛ gɔnɔ́ yɛ ɛ́na.

²¹Bɛnóakaka bá adánɛ́ bá nobólá[65] bɛ́ ɛ́da go úlene naá mmoɛná, bɛ́ bóó obánɛ́náa batɔ. Akɛ́ nɔ́ɔnɔ, batɔ go ɛ́da go sɛga Asaŋa go busío bá gɛɛmba gá adánɛ́ yá nobólá, goakɛ́ gɛɛmba moánɛ gɛ́ mba lɛ́ gɛantáanta.