Read Nugunu Tóogio 17 Bible Online

Tóogio 17 - Nugunu bible

Tóogio 17

¹Gɔ́ɔ, ɛ́ŋgɛlɛsɛ ummue naá bátáanɔ na báandɛ́ báaba bá mbaá lɔmɔ́ bá nona kɔ́bɔ ɛ́táanɔ na ɛ́handɛ́, a mbáyɛkɛnamɔ́, go ŋgoyana a amɔ́: «Úlé, kaá go dúfíe aŋa bá sómbamɔ́ gɛsɛnɛ gá okɔ́dɔ ba gɛɔyɔ gɛbɛ́ makɔ́nɔ́ mɔ́ɔnyɔ. Mɔ́ɔ a lɔ́mɔ́ gɛantá gá tɛ́sɔnɔ gɛ́ɛgɛ gɛ́ lɔ́mɔ́ fóágáalú naá boayá bá gɛcɛcá gá ɛsaá.

²Mefuŋe má cí má mba bííŋéné go gɛbɛ́ gá gɛɔyɔ nɛhɛ́. Batɔ bá cí tɔ́nɔ bá báá gúénénée mɔgɛ́bɔ má gɛbɛ́ gɛ́hɛ́ gá gɛɔyɔ[66].»

³Gɔ́ɔ, Gimmúmpúu gá Giliíli a kumbenemú, ɛ́ŋgɛlɛsɛ go ɛ́da namɛ naá giolóo gá bodɛ́agadɛ́[67]. Gámɛ go ɛ́na okɔ́dɔ ndukíi naá gɛmbɛ́lɛŋɛnyɛ gá nnyama. Nnyama yɛ́ɛyɔ ɛ mba lɛ́ na ifíno ya go sɛga Asaŋa; ɛ mba lɛ́ ɛ bɛanana ɛdóɛ ɛtáanɔ na ɛhandɛ́ na modɔ́ŋɔ móɔ́dɔ́.

⁴Okɔ́dɔ a mba lɛ́ na bɛnɔ́gɔ́ bá bɛla bɛ́lɛ́ŋɛ́bɛlɛŋɛ, na ndɛŋɔ sá góolo na bɛlɛŋɔ gedíelú na adánɛ́ yá ntɔ́nɔ. A mba lɛ́ a nona kɔ́bɔ yá góolo dácɛ na bɛbɛ́ bá moóma má gɛbɛ́ gɛ́hɛ́ gá gɛɔyɔ.

⁵Naá nobɔlɔ nɛ́hɛ́, ufíno yá nnindíi yó mba lɛ́ kɔ́ɔ ɔ́ŋɔ́ɔlú bá amɔ́: «Bábɛlɔnɛ ba ogɔ́nɔ́, nnyeedíi ba bakɔ́dɔ bá gɛbɛ́ gá gɛɔyɔ, na mbɔ́gɔ́ sá bɛbɛ́ bá moóma bɛ́ɛbɛ naá cí.»

⁶Gámɛ go ɛ́na okɔ́dɔ mɔ́ɔnyɔ a báá go nyóa makɔ́nɔ́ manɔ́ŋɔ́ má báaba bɔ́ ɔ́bɛnɔnɔmɔ́ na Asaŋa, na báaba bá mboó ónáa go pídefide yabɔ́ naá Yésusu. Aŋa mmbaá mo ɛ́ná, gámɛ go békúke makɔ́nɔ́.

⁷Gɔ́ɔ ɛ́ŋgɛlɛsɛ a ŋgoyanamɔ́ a amɔ́: «O békúkemú goakɛ́ o? Yɔmɔ́ɔ, kaá go falónɛ́ná nnindíi ya okɔ́dɔ na ya nnyama yɛ́ɛyɛ ɛ mo bɛgamɔ́ ɛ lɔ́mɔ́ na ɛdóɛ ɛtáanɔ na ɛhandɛ́, na modɔ́ŋɔ móɔ́dɔ́.

⁸Nnyama yɛ́ɛyɛ o bá nɛ́ ɛ́ná, ɛ mba lɛ́, kanɛ́, ɛ dɛ báá gɔnɔ́. Ɛ gaá húmé naá nobɛ́láa ná findímíi, Asaŋa a yɛ níŋiside. Batɔ bá cí báaba ufíno yábɔ́ yó lɔ́mɔ́ yó do bɛ́ɛ́mbá ɔ́ŋɔ́ɔlú naá kálata ya gɛɔyɔ, gó dúme aŋa cí ɛ mbaá bayɛ́gá, bá ŋga békúkée aŋa bá ŋgɛɛ́ ɛ́ná nnyama, goakɛ́ ɛ mba lɛ́, ɛ dɛ báá gɔnɔ́, kanɛ́, ɛ ná nco gunde.

⁹«Gɛcamɛna gá go bɛa nciŋí ya go ɔ́bɔ moóma mɔ́ɔmɔ gɛ́gɛ́ɛ. Ɛdóɛ ɛtáanɔ na ɛhandɛ́ ɛ lɔ́mɔ́ ɛgɔndɔ ɛtáanɔ na ɛhandɛ́ anáa okɔ́dɔ a gɛ́gamɔ́. Ɛ lɛ́ tɔ́nɔ mefuŋe mátáanɔ na máandɛ́.

¹⁰Mefuŋe mátáanɔ naá olɔŋɔ yábɔ́, má mbo obá, yá gátáanɔ na yúmmue yó gá lɛ́ naá bufuŋe; yá gátáanɔ na gáandɛ́ɛ yó gá lɛ́ yó do bolá; kanɛ́, aŋa yó ŋgaá bolá, yó ná gɛ́gɛda goana moɔnɔ́ ba gɛcamɛna.

¹¹Go nnyama yɛ́ɛyɛ ɛ mbaá lɔmɔ́, ɛ lɔ́mɔ́ ɛ dɛ gɔnɔ́ bɛ́ɛmba, ɛ lɛ́ yɛ́ moatɛ́ moatɛ, ufuŋe yá gánnámanyɛ́ɛ. Ɛ lɛ́ naá ombanɔ yá bátáanɔ na báandɛ́, Asaŋa a ná yɛ níŋiside.

¹²«Modɔ́ŋɔ móɔ́dɔ́ mɔ́ɔmɔ o báá nɛ́ ɛ́ná, mó lɔ́mɔ́ mefuŋe mɔ́ɔ́dɔ́[68] máama má gá lɔ́mɔ́ má dɛ gɔ́lɔ odɛ́nɛ́ yá bufuŋe; kanɛ́ bá ná bɛa bufuŋe olɔŋɔ na nnyama go gigúlí gímmue.

¹³Bɔ́ɔ biimée bɔ́ɔ́dɔ́ bá bɛanana mbééníŋínyí táŋɛ́ mmue yɛ́ɛyɛ ɛ lɔ́mɔ́: goíŋene gá bogaaga bábɔ́ na nɛgaŋa nábɔ́ go go yɔgɔnɛnɔ nnyama.

¹⁴Bá ŋga nuigényée Moɔnɔ́ ba gɛdómbáa, kanɛ́, Moɔnɔ́ ba gɛdómbáa a ŋga bó mánɛ́gɛ́ná, goakɛ́ a lɛ́ Daadáa ba badaadáa gɔnɔ́ Ufuŋe yá mefuŋe. A ŋga bó mánɛ́gɛ́ná olɔŋɔ na báaba a mbaá dɔ́ŋɛ́nɔ́, a bíí iyídé, bá lɔ́mɔ́ pídefide sɛ́hɛ́.»

¹⁵Ɛ́ŋgɛlɛsɛ go gɔnɔ ŋgoyana a amɔ́: «Ɛsaá yɛ́ɛyɛ o báá nɛ́ ɛ́ná, anáa okɔ́dɔ ba gɛbɛ́ gá gɛɔyɔ a gɛ́gamɔ́, bó lɔ́mɔ́ mɛɛ́nɔ miimée, bitúu bitúu bá batɔ, bɛdɔŋɔ biimée na dogálɔ duimée.

¹⁶Modɔ́ŋɔ móɔ́dɔ́ mɔ́ɔmɔ o báá nɛ́ ɛ́ná na nnyama, bá ŋga bɛlábɛ́láa okɔ́dɔ ba gɛbɛ́ ga gɛɔyɔ. Bá ŋga mo úlínyée buimée bɔ́ɔbɔ a lɔ́mɔ́ na bɔ́, bá mo dɛ́ɛna nnú gɔdɔɔ́. Bá ŋga nyáá mmegú sɛ́hɛ́, bá dɔ́yɛgɔ bɔ́ɔbɔ bó síenemú.

¹⁷Mammana, Asaŋa a mba ágá naá odɛ́má yábɔ́, mbééníŋínyí yɛhɛ́ ya goŋaá bá ŋa bɔ́ɔbɔ a lɛ́galɛgamɔ́. Bá ŋga húmé ukelú go go ŋanana nɔ́ɔnɔ, goŋaá bá ága bogaaga báábɔ́ bá bufuŋe go go yɔgɔnɛnɔ nnyama, gó ɛ́da húme aŋa dogálɔ dá Asaŋa dó ŋgɛɛ́ ɛ́nánɛ́náa.

¹⁸Naá gosúgudinye, okɔ́dɔ mɔ́ɔnyɔ o bá nɛ́ ɛ́ná, bó lɔ́mɔ́ gɛantá gá tɛ́sɔnɔ gɛ́ɛgɛ gɛ́ indenyemú mefuŋe má cí.»