Read Nugunu Tóogio 18 Bible Online

Tóogio 18 - Nugunu bible

Tóogio 18

¹Naá nnyimé hɔ́ɔlɔ́, gámɛ go ɛ́na ɛ́ŋgɛlɛsɛ uncodío a siisene go mmoɛná. A mba lɛ́ na gɛantá gá nɛgaŋa. Gise gá nigúmi nɛ́hɛ́ gɛ́ semenye cí iŋkimée.

²Gɛ́hɛ́ go áncɛda na ukelú ogɔ́nɔ́ a amɔ́: «A báa go oba, a báa go oba, Bábɛlɔnɛ ba ogɔ́nɔ́. Ɛ ɛ́ ɛ́yá kɛ́gɛ́ná ya bɛgáda bá biliíli mbɔ́dɔ iŋkimée. Bɛgáda bá munoní mbɔ́dɔ iŋkimée gɔnɔ́ na buulú mó lɔ́mɔ́ hɔ́ɔ.

³Ɛɛ́ɛŋ, a báá go bényúigie bɛdɔŋɔ biimée mɔgɛ́bɔ má gɛbɛ́ gɛbɛ́ gɛ́hɛ́ gá gɛɔyɔ gá hanyɔ́. Mefuŋe má cí má báá bííŋéné na gɛ́ go gɛbɛ́ gá gɛɔyɔ gá hanyɔ́. Bedúí moóma naá cí bá bɛ́ɛ́ ɛ́yánáa bɛnɔ́mɛ na bonɔ́mɛ bá gɛ́ bá kanɛ ombanɔ.»

⁴Gámɛ go ɔ́bɔ ukelú yúncodío yó ɛ́da go úlene go mmoɛná yó amɔ́: «Boɛ́nɔ bámɛ, húmé naá tɛ́sɔnɔ yɛ́ɛyɛ, no gií íyí no dáŋaba bɛlɔgɔ bá yɛ́, no gunde no gɔ́lɔ buebíe naá duséésényée dɔ́ɔdɔ do lɔ́mɔ́ go busío bá yɛ́,

⁵goakɛ́ bɛlɔgɔ bá yɛ́ bɛ́ á bédulée bɛ́ bɛ́ɛ́ ɛ́dá koma naá mmoɛná, gɔ́ɔ Asaŋa a á ná bééníŋínyée bɛgáda bɛ́hɛ́ bá meŋiigíe.

⁶Yɛ séésényéemú nɔnɔ caŋa mmue aŋa yɛ́ ɛ mbaá séésényée basɔ́gɔ́ɔ, no dúmbidinye ɛŋɛndɔ ɛhandɛ́ bɔ́ɔbɔ yɛ́ ɛ mbaá ŋanánáa basɔ́gɔ́ɔ. Gɛdɔ́ndɔ́ gɛ́ɛgɛ ɛ mbaá dúnígénénée basɔ́gɔ́ɔ, gɛ́ mo gedínyéemú nɔnɔ na bogaaga gɛ́ dómba ɛŋɛndɔ ɛhandɛ́.

⁷Aŋa ɛ mbaá maamánáa nigúmi na bonɔ́mɛ makɔ́nɔ́, caŋa mmue, mo gundínyéemú nɔnɔ duséésényée na mbií, goakɛ́ ɛ mba bóoyɛ́dá yɛ amɔ́: “Ndɛ́ naá odɛ́nɛ́ yá ufuŋe ba okɔ́dɔ, cɛ báá gisí, gɔnɔ́ gɛdɔmbɔ gɛ́ dɛ ŋgá mbolɛna go buisí”.»

⁸Naá megélídíe má yɛ́ mɔ́ɔmɔ, gɔ́ɔ duséésényée dɔ́ɔdɔ dó lɔ́mɔ́ go busío bá yɛ́ dó na yɛ obɛnamɔ́ go buisí táŋɛ́ búmmue, dó lɔ́mɔ́: nigúe, mbií, ncaná, íyuke hɛ́ yɛ bogodonyo púmú, goŋaá Daadáa Asaŋa mɔ́ɔnyɔ a sómbamɔ́ noséésényée moánɛ, a lɛ́ gɛgaaga[69].

⁹Gɔ́ɔ kanɛ́ mefuŋe má cí máama má mbaá bííŋéné na gɛ́ go gɛbɛ́ gá gɛɔyɔ na bonɔ́mɛ, má ŋgɛɛ́ ɛ́dá go baŋa, má yɛ béséegie, aŋa má ŋgɛɛ́ ɛ́ná ncóki sá íyuke hɛ́ɛhɛ hɛ́ gɛ́ bogodonyomú sɛ́ fadɛgana.

¹⁰Bá ŋga yáŋɛ́mɛ́dánáa halaháláa na bofoá bá noséésényée na yɛ́, bó oya bá amɔ́: «Gɛɔ́bɛgɔ, gɛɔ́bɛgɔ makɔ́nɔ́! Maamɔ́ɔ gɛkɔ́nɔ́nɔ́ɔ gá tɛ́sɔnɔ, Bábɛlɔnɛ, tɛ́sɔnɔ ya bogaaga, goana gigúlí gímmue gɛ́ bá sómbamɔ́ gɛsɛnɛ gáhɔ[70]!»

¹¹Bedúí moóma naá cí bá baŋa, bá yɛ béséegie tɔ́nɔ, goakɛ́ mɔtɔ a dɛ ŋgá gɔnɔ go ɔ́ndɔ moóma mábɔ́ má nyonyí.

¹²Moóma moánɛ mó mbaá lɔmɔ́: góolo na muinyí, adánɛ́ yá ntɔ́nɔ na bɛnɔ́gɔ́ bá ndɛŋɔ, bɛnɔ́gɔ́ bá bɛla nogá nogá na duelí dá goɛ́la, na mbɔ́dɔ gɔnɔ́ síncodío sá bɛnɔ́gɔ́; mɛɛ́tɛ má ɛmbɛlɛ mbɔ́dɔ iŋkimée, moóma gedégédíe gedégédíe na bɛbaŋa, na mabámá má ntɔ́nɔ, na gɛkɔ́ŋɔ gá bɔlɔ́ŋɔsɛ, na gɛkɔ́ŋɔ, na adánɛ́ yá ntɔ́nɔ yá go fóaga bɛnɔ́gɔ́ bá nnyaŋá.

¹³Bá mba lɛ́ bá dúenene hɔ́ɔ, bɛfofaga bá mbínyí mbɔ́dɔ iŋkimée, bɛfofaga bá baalabɛ́nda mbɔ́dɔ iŋkimée, megúdé na mɔgɛ́bɔ má ntɔ́nɔ mbɔ́dɔ iŋkimée; bá gɔnɔ dúenene tɔ́nɔ ŋkeŋé na uguŋe yá belée, gúlúge na bɛdómbáa, nnyádɛ na bɛkáládá bá sɛ́, bɛɔlɛ́ na ŋkólío.

¹⁴Besé yɛ́ɛyɛ odɛ́má yáhɔ yó mbaá lɛ yó lɛ́galɛga ɛ lɛ́ ɛ́dáalú halaháláa nahɔ. Buimée bɔ́ɔbɔ bó lɔ́mɔ́ bá ntɔ́nɔ bó gɔnɔ bonya makɔ́nɔ́ bó lɛ́ yíméelú go busío báhɔ. Bá dɛ ná gɔnɔ bó gíde akɛ́ go buisí.

¹⁵Bedúí moóma báaba tɛ́sɔnɔ yɛ́ɛyɔ ɛ mbií íyíe bɛnɔ́mɛ, bá ŋga yáŋɛ́mɛ́dánáa halaháláa na bofoá bá noséésényée ná yɛ́[71]. Bá ŋga baŋáa bɛ́ ɛ́da bá béséegie.

¹⁶Bá amɔ́: «Gɛɔ́bɛgɔ makɔ́nɔ́, gɛɔ́bɛgɔ makɔ́nɔ́ go busío bá gɛkɔ́nɔ́nɔ́ɔ gá tɛ́sɔnɔ! Ɛ mba lɛ́ bálɛŋá bálɛŋá na bɛnɔ́gɔ́ bá bɛla bɛmbɛ́lɛŋɛnyɛ, na góolo, na adánɛ́ yá ntɔ́nɔ, na ndɛŋɔ síntió.

¹⁷Bó mba gɔ́lɔ́ gigúlí táŋɛ́ gímmue go go gada bonɔ́mɛ bɔ́ɔbɔ buimée.» Bagɔ́nɔ́ɔ bá besitíme na biiníndí báaba kɔ́ɔ, na batɔ biimée báaba bá yɔgɔnɔmɔ́ naá sitíme, na báaba bá bɛananamɔ́ bɛsoɛná bábɔ́ go buelí naá máŋɛ́ bá mba lɛ́ yáŋɛ́mɛ́dáalú.

¹⁸Aŋa bɛ́ ɛ́namɔ́ ncóki sá íyuke hɛ́ɛhɛ hɛ́ yɛ bogodonyomú, bá lɛ go ɛ́da go ánca bá amɔ́: «Tɛ́sɔnɔ intió ɛ dɛ báá hɔ́ɔ ya go eninye na gɛkɔ́nɔ́nɔ́ɔ gá tɛ́sɔnɔ gɛ́ɛgɛ.»

¹⁹Bá mba lɛ́ bá bádɛ́anana bibúu go odóɛ, bá baŋa, bá béséegie bá amɔ́: «Gɛɔ́bɛgɔ makɔ́nɔ́! Gɛɔ́bɛgɔ makɔ́nɔ́! Goana gigúlí táŋɛ́ gímmue gɛ́ gɛ́ á ná háá go go gada gɛkɔ́nɔ́nɔ́ɔ gá tɛ́sɔnɔ gɛ́ɛgɛ gɛ́ mbií íyíe na bonɔ́mɛ bá gɛ́ batɔ báaba bá mbaá lɔmɔ́ na besitíme naá máŋɛ́ bɛnɔ́mɛ[72].»

²⁰Mmoɛná, yaŋáa, tɛ́sɔnɔ ya á gadɛ́gá. Bɛɛnyɔ́ɔ tɔ́nɔ, boɛ́nɔ bá Asaŋa, baapótɛlɛ na mbúsí sá Asaŋa, yaŋáa nɔnɔ, goakɛ́ Asaŋa a á sómbá gɛsɛnɛ gá yɛ́ go gɛbɛ́ gɛ́ɛgɛ ɛ mbaá nyó ŋaáa.

²¹Gɔ́ɔ, gɛgaaga gá ɛ́ŋgɛlɛsɛ gɛ́ básɛmbamɔ́ ɛdánɛ́ gilúututu aŋa ɛdánɛ́ ná go gola moóma, go nɛ́ nɔɔ naá máŋɛ́ gadɛ́ɛ a amɔ́: «Náana gɔ́ɔ, bá ŋgaá nɔɔ́ɔ na bogaaga gɛkɔ́nɔ́nɔ́ɔ gá tɛ́sɔnɔ Bábɛlɔnɛ; bá dɛ ŋgá gɔnɔ yɛ ɛ́na.

²²Bá dɛ ŋgá gɔnɔ go ɔ́bɔ naá maamɔ́ɔ, batɔ bá go ágana ɛsagɔ naá molɔ́ŋɔ́, begidí ncolí na cɛ́bá. Akɛ́ mɔtɔ ba go gedegedie moóma na ɛmbɔ́gɔ a dɛ ŋgá gɔnɔ go ɛ́nɛga naá maamɔ́ɔ, bá dɛ ŋgá gɔnɔ go ɔ́bɔ batɔ bá go gola moóma naá ɛdánɛ́.

²³Gise gá lámba gɛ́ dɛ ŋgá gɔnɔ bonyɛda naá maamɔ́ɔ. Bá dɛ ŋgá gɔnɔ go ɔ́bɔ ukelú yá ohaŋa mɔ́ɔnyɔ a gá lɔ́mɔ́ na go giŋene na yá okɔ́dɔ bɛhɛ́ naá maamɔ́ɔ. Bedúí moóma báhɔ bá mba lɛ́ bɛgaaga naá cí, gɛdɔ́ɔ gáhɔ gɛ́ báá belé mɛɛ́nɔ miimée[73].»

²⁴Naá maamɔ́ɔ gɔ́ɔ bá mbaá gídé manɔ́ŋɔ́ má mbúsí sá Asaŋa, manɔ́ŋɔ́ má báaba bɔ́ ɔ́bɛnɔnɔmɔ́ na Asaŋa na má biimée báaba bá mboó ónáa naá cí[74].