Read Nugunu Tóogio 19 Bible Online

Tóogio 19 - Nugunu bible

Tóogio 19

¹Naá nnyimé hɔ́ɔlɔ́, gámɛ go ɔ́bɔ aŋa gɛantá gá gɛcooma gá gɛcɛcá gá batɔ gɛ́ oya naá mmoɛná gɛ́ amɔ́: «Alɛlóya! Gisódio, nigúmi na bogaaga mó ɔ́bɛnɔnɔmɔ́ na Asaŋa bɛcɔ́.

²Gosómba gɛ́hɛ́ gá bɛsɛnɛ gó lɛ́ dácɛ na mammana na tɛ́nɛ́ɛ. A á sómbá gɛsɛnɛ gá okɔ́dɔ ba gɛɔyɔ gɛbɛ́ makɔ́nɔ́, a mba díéŋíe cí na bɛgáda bɛ́hɛ́ bá meŋiigíe. Asaŋa a á mo bégundíe go boyogóní bɛ́hɛ́ báaba a mboó ónáa.»

³Gáábɔ́ go gɔnɔ gálɛda bá amɔ́: «Alɛlóya! Ncóki sá íyuke hɛ́ɛhɛ hɛ́ gɛ́ bogodonyomú, sɛ́ fadɛgana kanɛ mmanɛ́náa.»

⁴Bafɛanɔ́ɔ nitíno na bénni na bigedie bínni, enúu go cí, go ɛ́da go búlugenye Asaŋa mɔ́ɔnyɔ a lɔ́mɔ́ ndukíi naá oŋgɛ́yɔ́, bó oya bá amɔ́: «Aamɛnɛ. Alɛlóya!»

⁵Kɔ́ɔ ukelú yó húmene naá oŋgɛ́yɔ́, yó ɛ́damɔ́ go oya yó amɔ́: «Búlúgényée nɔnɔ Asaŋa bɛcɔ́, bɛɛnyɔ́ɔ biimée báaba no lɔ́mɔ́ boyogóní bɛ́hɛ́, bɛɛnyɔ́ɔ báaba no mo hálamananamɔ́, bihelege na bagɔ́nɔ́!»

⁶Gámɛ go gɔnɔ go ɔ́bɔ aŋa gɛcooma gá gɛcɛcá gá batɔ, aŋa gɛcooma gá máŋɛ́, gɔnɔ́ aŋa gogide gá bɛgaaga bá mbalámandáa. Bó oya bá amɔ́: «Alɛlóya! Mammana, Daadáa, Asaŋa bɛcɔ́ bogaaga buimée, a á loodío bufuŋe bɛ́hɛ́[75].

⁷Ŋgáa dɛ yaŋa, dɛ aŋgana, dɛ gɔnɔ mo fáanana nigúmi nɛ́hɛ́, goŋaá gɛdágá gá gigiŋe gá Moɔnɔ́ ba gɛdómbáa gɛ́gɛ́ɛ. Ogɛ́ a báá go bégedegedie.

⁸Bá á mo fáá bogaaga bá go bálɛŋa na bɛnɔ́gɔ́ bá bɛla, púyúŋúpuyuŋu gɔnɔ́ kanɛ biílo», goŋaá bɛnɔ́gɔ́ bá bɛla bɛ́ dúfenyemú meŋiigíe má tɛ́nɛ́ɛ máama batɔ báaba bɔ́ ɔ́bɛnɔnɔmɔ́ na Asaŋa bá ŋananamɔ́.

⁹Ɛ́ŋgɛlɛsɛ ummue go ŋgoyana a amɔ́: «Ɔ́ŋɔ́ɔ! Besé makɔ́nɔ́ na báaba bá lɔ́mɔ́ dɔ́ŋɛ́nɔ́ɔlú naá gɛdáágá gá gigiŋe gá Moɔnɔ́ ba gɛdómbáa[76]!» Gɛ́hɛ́ go gɔnɔ ŋgoyana a amɔ́: «Bó lɔ́mɔ́ bɛmammana bá dogálɔ dá Asaŋa bɛ́bɔ́ɔ.»

¹⁰Gɔ́ɔ kulemú enúu go cí naá bɛgɔ́ndɔ́ bɛ́hɛ́ go go mo búlugenye, kanɛ́ mɔ́ɔ go ŋgoyana a amɔ́: «O do hóámá o do ŋaáa nɔ́ɔ! Yɔmɔ́ɔ, ndɛ́ tɔ́nɔ uyogóní aŋa maamɔ́ɔ, aŋa batɛ́ɔbɛnɔ báaba bá lɔ́mɔ́ ŋgominyo sá nogálɔ ná Yésusu. Asaŋa mɔ́ɔ o háananamɔ́ go búlugenye, goŋaá nogálɔ ná Yésusu nó lɔ́mɔ́ odóɛ yá bosɔ́mɔ bɔ́ɔbɔ mbúsí sá Asaŋa sɛ́ dóogonyomú.»

¹¹Gɔ́ɔ, ŋgɛ́namɔ́ gɛasɛ́ buunéelú naá mmoɛná, mbɛ́ɛ́ ɛ́ná nnyádɛ mmúmpúu. Mɔtɔ a mba lɛ́ kɔ́ɔ, ufíno yɛ́hɛ́ Pídefide na Mammana. A sómba bɛsɛnɛ, a nuugenye naá botɛ́nɛ́ɛ[77].

¹²Oŋgíso yɛ́hɛ́ yá bonya aŋa gɛlɛ́mbɛ gá íyuke, gɛca gá motaatáda naá mɔ́ odóɛ. A mba lɛ́ na ufíno ɔ́ŋɔ́ɔlú yɔ́ɔyɔ mɔ́ɔ mokáa a mbaá lɔmɔ́ a yó íyimene.

¹³A mba lɛ́ na gɛla gɛ́ɛgɛ bá mbaá dúmé naá manɔ́ŋɔ́. Ufíno yɛ́hɛ́ yó lɔ́mɔ́: «Nogálɔ ná Asaŋa.»

¹⁴Ɛlɔŋɔ ya benuí bidé yɛ́ɛyɛ naá mmoɛná ɛ mba lɛ́ ɛ mo bienene naá nnyádɛ sá mmúmpúu mmoɛná, bálɛŋá bálɛŋá na bɛnɔ́gɔ́ bá bɛla bimmúmpúu kanɛ biílo.

¹⁵Kalafɔ ya mɔnɔ ɛ mba lɛ́ ɛ húmene naá mɔ́ nnyuudé go go mánɛgɛna mɛɛ́nɔ má cí. A ŋga má nonáa aŋa gɛkɔ́nɔ́nɔ́ɔ gá ufuŋe, a má nadana naá osá yá gimpímímpímí gá Asaŋa bogaaga buimée.

¹⁶Naá gɛla gɛ́hɛ́ na naá ombɛnɔ yɛ́hɛ́, ufíno yó mba lɛ́ hɔ́ɔ ɔ́ŋɔ́ɔlú goŋaá: «Ufuŋe yá mefuŋe, Daadáa ba badaadáa.»

¹⁷Gɔ́ɔ ŋgɛ́namɔ́ ɛ́ŋgɛlɛsɛ tɛ́nɛ́ɛ naá buisí. A mba lɛ́ a gálagala ukelú naá mmoɛná munoní mɔ́ɔmɔ mó mbaá lɔmɔ́ naá mmoɛná gúunú, a amɔ́: «Úlé nɔnɔ, bábándɛ́gɛ́náamɔ́ nɔnɔ go gɛantá gá gɛdáágá gá Asaŋa,

¹⁸go go nyáanana mmegú sá mefuŋe, mmegú sá bagɔ́nɔ́ɔ bá bisimbi na sá bisimbi, mmegú sá nnyádɛ na sá batɔ báaba bá lɔ́mɔ́ kɔ́ɔ naá mmoɛná, mmegú sá batɔ biimée, bɛɔlɛ́ na báaba bá lɔ́mɔ́ bá dɛ bɛ́ɛ́mbá bɛɔlɛ́, bihelege na bagɔ́nɔ́[78].»

¹⁹Gámɛ go ɛ́na nnyama, mefuŋe má cí na ɛlɔŋɔ yabɔ́ ya bidé, bá báa go bábándɛgɛna go go nuugenye mɔ́ɔnyɔ a mbaá lɛ naá nnyádɛ mmoɛná, na olɔŋɔ yɛ́hɛ́ yá bidé kɛ́.

²⁰Bá báá gumbéné nnyama olɔŋɔ na mbúsí ya mbele. Mbúsí ya mbele yɛ́ɛyɛ ɛ mbaá ŋanánáa bɛsɛɔ naá busío bá yɛ́, go go nenugenye batɔ báaba bá mbaá lɛ na gieninye gá nnyama, bá gɔnɔ búlugenye gɛɔmpɔ́ gá yɛ́. Bá báá nɔɔ́ɔ nnyama na mbúsí ya mbele bɔgɔ́sɔ, naá ɛbɛ́lá ná íyuke há ndusú.

²¹Báaba bóncodío bá báá fúé na kalafɔ yɛ́ɛyɛ ɛ mbaá lɔmɔ́ ɛ húmene naá nnyuudé ná mɔ́ɔnyɔ a mbaá lɔmɔ́ naá nnyádɛ mmoɛná. Munoní muimée mó báá bédúgée na mmegú sábɔ́.