Read Nugunu Tóogio 20 Bible Online

Tóogio 20 - Nugunu bible

Tóogio 20

¹Gɔ́ɔ ŋgɛ́namɔ́ ɛ́ŋgɛlɛsɛ ummue ɛ ɛ́da go úlene naá mmoɛná. A mba lɛ́ a nona ibuune há nobɛ́láa ná findímíi na gilúututu gá magala go ombɔ́gɔ.

²Gɛ́hɛ́ go gumbene nnyɔ́gɔ ndume, gɛcóa gá nnyɔ́gɔ gɛ́ɛgɛ bá dɔ́ŋɔnɔmɔ́ bá amɔ́ ohándá ɛ́na lí Sátana, go yɛ góda na magala go nnyómá tɔ́sɛnɔ.

³A báá yɛ nɔɔ́ɔ naá nobɛ́láa ná findímíi, a báá nó buigé, a báá ágá gibélincígínyí naá mmoɛná, go goŋaá a dɛ dúmbényée na go nenugenye mɛɛ́nɔ gó ɛ́da húme aŋa nnyómá tɔ́sɛnɔ sɛ́ ŋgaá dómbá. Naá nnyimé hɔ́ɔlɔ́ bá lɛ go yɛ fulune go moɔnɔ́ ba gɛcamɛna.

⁴Kɔ́ɔ ŋgɛ́namɔ́ ɛŋgɛ́yɔ́. Bá báá fáá batɔ báaba bá mbaá ncó lukumenene kɔ́ɔ, bogaaga bá go sómba bɛsɛnɛ. Gámɛ tɔ́nɔ go ɛ́na batɔ báaba bá mbaá bó sómbáa ɛdóɛ go pídefide yabɔ́ naá Yésusu na gooya gá nogálɔ ná Asaŋa. Bá mbi inyé go búlugenye nnyama, akɛ́ gɛɔmpɔ́ gá yɛ́. Bá dɛ mbá bɛa gibélincígínyí gá yɛ́ go nobɔlɔ akɛ́ go ombɔ́gɔ. Batɔ bɔ́ɔbɔ go fúfugene, bá báá gúmée olɔŋɔ na Kilítusu go nnyómá tɔ́sɛnɔ.

⁵Púfuge naá begúe ya busío yɛ́yɔ́ɔ. Begúe báaba bóntió, bá dɛ mbá fúfuge otóotoɛ yá goŋaá nnyómá tɔ́sɛnɔ sɛ́ háa.

⁶Besé makɔ́nɔ́ gɔnɔ́ bimmúmpúu na báaba bá bɛananamɔ́ bodáŋɔ naá púfuge naá begúe ya busío yɛ́ɛyɛ. Bɔ́ ɔ́bɛnɔnɔ na Asaŋa, nigúe ná gáandɛ́ɛ nɛ́ dɛ bɛanánáa bogaaga nabɔ́; bá ná bɛ́ɛmba bedúmbí bɛbáágá naá Asaŋa na naá Kilítusu. Bá ŋga gúmée olɔŋɔ na Kilítusu go nnyómá tɔ́sɛnɔ.

⁷Aŋa nnyómá tɔ́sɛnɔ sɛ́ ŋgaá háá, bá lɛ go húmie Sátana naá ncíbo ya gɛaŋɔ́.

⁸A lɛ go ɛ́da a belebele mɛɛ́nɔ máama má lɔ́mɔ́ naá cí iŋkimée. Hɔ́ɔlɔ́ gó lɛ́ aá: Gɔgɔ na Magɔgɔ[79]. A ŋga bɛ́ bándɛ́gɛ́ná go nɛnoa, ombanɔ yá bɛ́ yó lɛ́ aŋa ɛcánána hɛ́ɛhɛ naá máŋɛ́.

⁹Gáábɔ́ go saa cí iŋkimée, bá báá géŋgélídíe tɛ́sɔnɔ ya boolímínyí, yɛ́ɛyɛ Asaŋa a maamanamɔ́. Kanɛ́ íyuke go ɛ́da go úle naá mmoɛná, hɛ́ báá bó bigídényée.

¹⁰Bá báá nɔɔ́ɔ ohándá ba go bó belebele naá ɛbɛ́lá ná íyuke há ndusú, naá boayá bá nnyama na mbúsí ya mbele. Bá ŋga bɛáa noséésényée hɔ́ɔ, aŋa sisíi aŋa budúgú go mannyómá mannyómáa.

¹¹Gɔ́ɔ ŋgɛ́namɔ́ gɛantá gá oŋgɛ́yɔ́ mmúmpúu na mɔ́ɔnyɔ a mbaá lɛ kɔ́ɔ ndukíi. Naá busío bɛ́hɛ́, cí na mmoɛná go ságɛna kanɛ go síe gitítílíe.

¹²Gámɛ go gɔnɔ go ɛ́na begúe, bagɔ́nɔ́ na bihelege tɛ́nɛ́ɛ naá busío bá oŋgɛ́yɔ́. Bakálata bá báá bébuuné; kálata intió ɛ báá bébuuné yɛ́ɛyɛ ɛ lɔ́mɔ́ kálata ya gɛɔyɔ. Asaŋa a báá sómbá bɛsɛnɛ bábɔ́ go meŋiigíe mábɔ́ aŋa bó lɔ́mɔ́ ɔ́ŋɔ́ɔlú naá kálata sɛ́ɛsɔ[80].

¹³Máŋɛ́ go húmie begúe báaba bá mbaá lɔmɔ́ kɔ́ɔ. Nigúe na hoóma há begúe, mó báá húmíe begúe bábɔ́; Asaŋa a báá sómbáa bɛsɛnɛ bá begúe bɔ́ɔbɔ go meŋiigíe mábɔ́.

¹⁴Gɔ́ɔ bá nɔɔmɔ́ nigúe na hoóma há begúe naá nobɛ́láa ná íyuke. Nobɛ́láa ná íyuke nó lɔ́mɔ́ nigúe ná gáandɛ́ɛ.

¹⁵Nɔ́ɔnɔ gɔ́ɔ, uŋkimée mɔ́ɔnyɔ bá mbaá lɔmɔ́ bá dɛ ɔ́ŋɔ́ ufíno yɛ́hɛ́ naá kálata ya gɛɔyɔ, bá mbaá mo nɔɔ́ɔ naá ɛbɛ́lá ná íyuke.