Read Nugunu Tóogio 21 Bible Online

Tóogio 21 - Nugunu bible

Tóogio 21

¹Gɔ́ɔ kanɛ́ kɔnɔmɔ́ go ɛ́na gɛpáa gá mmoɛná na gɛpáa gá cí, goakɛ́ mmoɛná ya busío na cí ya busío mó mba ságɛ́ná, máŋɛ́ má dɛ gɔnɔ́ bɛ́ɛmba.

²Gámɛ go ɛ́na gimmúmpúu gá tɛ́sɔnɔ, gɛpáa gá Yolósalɛmɛ, gɛ́ siisene go mmoɛná, gɛ́ ɛ́da go úlene naá boayá bá Asaŋa. Gɛ́ mba lɛ́ gɛnɔ́gɔ́ naá mbɔ́dɔ ya ugiŋénú ba okɔ́dɔ mɔ́ɔnyɔ a báá ná manɛ́ go bálɛŋa, a gɛ́gana onɔ́mɛ bɛhɛ́.

³Gɔ́ɔ kɔnɔmɔ́ go ɔ́bɔ gɛgaaga gá ukelú gɛ́ dónogogana naá oŋgɛ́yɔ́, gɛ́ oya gɛ́ amɔ́: «Ɛ́ná, kɛ́gɛ́ná ya Asaŋa na batɔ yɛ́yɛ́ɛ. A ŋga gɛ́gáa nabɔ́; batɔ bá ŋga bɛ́ɛ́mbá mɛɛ́nɔ mɛ́hɛ́, mɔ́ɔ Asaŋa a bɛ́ɛmba nabɔ́[81].

⁴A ŋga fúúnée biósino bábɔ́ biimée, mɔtɔ a dɛ ŋgá gɔnɔ gúe. Akɛ́ nigúe, akɛ́ mbéséégí, akɛ́ biósino, akɛ́ gɛɔ́bɛgɔ, mó do ná gɔnɔ bɛ́ɛmba, goŋaá moóma muimée má cóá mó lɛ́ ságɛ́náalú go púmúpúmúu[82].»

⁵Kɔ́ɔ mɔ́ɔnyɔ a mbaá lɔ́mɔ́ ndukíi naá oŋgɛ́yɔ́, a gálɛdamɔ́ daŋɛ́daŋɛ a amɔ́: «Ɛ́ná, ŋgaá gundíe boóma buimée bofáa.» Go gɔnɔ gídene a amɔ́: «Ɔ́ŋɔ́ go amɔ́, dogálɔ dɔ́ɔdɔ dó lɛ́ mammana, dó lɛ́ dá goŋaá mɔtɔ a ága odɛ́má yɛ́hɛ́ uŋkimée kɔ́ɔ.»

⁶Gɛ́hɛ́ go gɔnɔ ŋgoyana a amɔ́: «Bó á háá! Ndɛ́ Áláfa gɔnɔ́ Omɛ́ga, nɔ́ɔnɔ go lɛ́ aá, mabayɛga gɔnɔ́ mesúgidinye. Mɔ́ɔnyɔ a lɔ́mɔ́ na inyúidi, nná mo fáa miimpo má nobɛ́láa nɔ́ɔnɔ nó déndelemú miimpo má gɛɔyɔ, a bónyo go dugúnú[83].

⁷Bɔ́ɔbɔ bɔ́ bó lɔ́mɔ́ bonɔ́mɛ bɔ́ɔbɔ ka ŋgaá fáá mɔ́ɔnyɔ a ŋgaá mánɛ́gɛ́ná; Mbɛ́ɛmba Asaŋa bɛhɛ́, mɔ́ɔ a bɛ́ɛmba moɔnɔ́ bamɛ[84].

⁸Kanɛ́ go beegundegúndée, batɔ bá kanɛ pídefide, beŋií bɛɛmba, buúníní batɔ, biindí hanyɔ́, basɛɔsɛ́ɔ, bagɔgɔ́gɔgɔ na bebelíbélí biimée, bodáŋɔ bábɔ́ bó ŋgaá bɛ́ɛ́mbá ɛbɛ́lá ná gɛbɔlɔ́gɔdɔ gá íyuke há ndusú; bó lɔ́mɔ́ nigúe ná gáandɛ́ɛ.»

⁹Gɔ́ɔ, ummue naá bɛɛ́ŋgɛlɛsɛ bátáanɔ na báandɛ́ báaba bá mbaá lɛ bá nona kɔ́bɔ ɛ́táanɔ na ɛ́handɛ́ dácɛ dácɛ na bɛɛmba bá mesúgidinye bɛ́táanɔ na bɛ́andɛ́, a ncomɔ́ kálɛda a amɔ́ gámɛ a amɔ́: «Úle, ka á go dúfíe gɛɔŋɛnɔ, ogánɛ́ Moɔnɔ́ ba gɛdómbáa.»

¹⁰Giliíli go kumbene, ɛ́ŋgɛlɛsɛ a bɛ́ɛ́ ɛ́dá namɛ naá gɛantá gɔnɔ́ giyóŋóŋkóo gá ogɔndɔ[85]. A báá ŋgínígíe hɔ́ɔ gimmúmpúu gá tɛ́sɔnɔ, Yolósalɛmɛ, ɛ siisene go mmoɛná, yɛ ɛ́da go úlene naá boayá bá Asaŋa.

¹¹Ɛ mba lɛ́ ɛ geyime na nigúmi moatɛ́ moatɛ ná Asaŋa. Gosána gá yɛ́ gó mba lɛ́ aŋa gá ɛdánɛ́ ná ntɔ́nɔ, aŋa gá ɛdánɛ́ ná Yásɛpɛ nɛ́ɛnɛ nɛ́ lɔ́mɔ́ begibegi aŋa gɛlásɛ.

¹²Ɛ mba lɛ́ dúménéelú na gɛantá gɔnɔ́ giyóŋóŋkóo gá omɛndɛ́, bɛasɛ́ kɔ́ɔ bɛ́ɔ́dɔ́ na bɛ́andɛ́, bɛɛ́ŋgɛlɛsɛ bɔ́ɔ́dɔ́ na báandɛ́ bá bɛ́ beŋebeŋe. Bá mba dɛláa naá bɛasɛ́, ifíno ya egúli yá Ɛ́sɛlahɛ́ɛlɛ yɔ́ɔ́dɔ́ na áhandɛ́.

¹³Bɛasɛ́ bɛ́ mba lɛ́ bɛ́dadɔ́ cɛŋɛ na boayá bá ŋgémíné buisí, bɛ́dadɔ́ cɛŋɛ na boayá bá kúlúgéné buisí, bɛ́dadɔ́ cɛŋɛ na boayá bá mbádá, bɛ́dadɔ́ cɛŋɛ na boayá bá mmoɛná[86].

¹⁴Omɛndɛ́ yó mba lɛ́ dúméelú naá mogoná móɔ́dɔ́ na móandɛ́ mɔ́ɔmɔ mó mbaá lɛ na ifíno ya baapótɛlɛ bɔ́ɔ́dɔ́ na báandɛ́ bá Moɔnɔ́ ba gɛdómbáa.

¹⁵Mɔ́ɔnyɔ a mbaá lɛ a kálagala, a mba lɛ́ a nona mɛ́da má ombalɔ yá góolo, go go mɛ́da tɛ́sɔnɔ, bɛasɛ́ bá yɛ́ na omɛndɛ́ yá yɛ́[87].

¹⁶Tɛ́sɔnɔ ɛ mba lɛ́ fóágáalú, maayá má yɛ́ miimée ménni cɔ́bɛcɔ́bɛ, aŋa tɛ́nɛ́ɛ aŋa mmɛndɛ́ɛ. Ɛ́ŋgɛlɛsɛ go mɛ́da kanɛ́ tɛ́sɔnɔ na ombalɔ yɛ́hɛ́; go ɛ́na goŋaá, tɛ́nɛ́ɛ, mmɛndɛ́ɛ na goɔmpɔ gá yɛ́, mó mba lɛ́ cɔ́bɛcɔ́bɛ, bakɛ́lomɛ́da batɔ́sɛnɔ báandɛ́ na mantɛdɛ máandɛ́.

¹⁷A báá mɛ́dáa tɔ́nɔ omɛndɛ́, a bɛ́ɛ́ ɛ́ná goŋaá yó mba lɛ́ mɛ́da otíno ádadɔ́ na mɔ́ɔ́dɔ́ na máandɛ́. Mɛ́da máama ɛ́ŋgɛlɛsɛ a mbaá gɔ́lɔ́, má lɔ́mɔ́ máama batɔ bá yɔgɔnɔmɔ́ na má.

¹⁸Omɛndɛ́ yó mba lɛ́ fóágáalú na mbɔ́dɔ ya adánɛ́ yáaya bá dɔ́ŋɔnɔmɔ́ bá amɔ́ yásɛpɛ. Tɛ́sɔnɔ yɛ́, fóágáalú na góolo moatɛ́ moatɛ, ɛ geyime aŋa gɛlásɛ moatɛ́ moatɛ.

¹⁹Mogoná má omɛndɛ́ yá tɛ́sɔnɔ mó mba lɛ́ lɛŋálɛŋá na mbɔ́dɔ iŋkimée sá adánɛ́ yá ntɔ́nɔ: ɛgoná há busío na yásɛpɛ, há gáandɛ́ na selífe, há gádadɔ́ na kalɛsɛdóanɛ, há génni na emelóode,

²⁰há gátáanɔ na saladóanɛ, há gátáanɔ na gémmue na kolonelíne, há gátáanɔ na gáandɛ́ɛ na kilisolíte, há gánnámanyɛ́ na bélile, há gánnámanyɛ́ na gémmue na tópasɛ, há gɔ́ɔ́dɔ́ na kɛlɛsopɛ́lasɛ, há gɔ́ɔ́dɔ́ na gémmue na iyesínte, há gɔ́ɔ́dɔ́ na gáandɛ́ɛ na emetisíte.

²¹Bɛasɛ́ bɛ́ɔ́dɔ́ na bɛ́andɛ́ bɛ́ mba lɛ́ ndɛŋɔ sɛ́ɔ́dɔ́ na ɛ́handɛ́; gɛasɛ́ giimée gɛ́ mba lɛ́ gedíelú na ndɛŋɔ táŋɛ́ mmue. Hoóma há nɛbábánda ná tɛ́sɔnɔ há mba lɛ́ gedíelú na góolo moatɛ́ moatɛ, há ɛ́nanɛna maayá miimée aŋa gɛlásɛ.

²²Kanɛ́ ndɛ́ kanɛ go ɛ́na naá tɛ́sɔnɔ akɛ́ Nnyaŋá ya Asaŋa ya mmue, goŋaá Nnyaŋá ya Asaŋa ya yɛ́ ɛ lɔ́mɔ́ Daadáa, Asaŋa bogaaga buimée, olɔŋɔ na Moɔnɔ́ ba Gɛdómbáa.

²³Tɛ́sɔnɔ ɛ dɛ báá mbií goŋaá, akɛ́ buisí, akɛ́ ofɛ́, mó yɛ seemenye, goakɛ́ nigúmi ná Asaŋa nɛ́ yɛ bonya, gɔnɔ́ Moɔnɔ́ ba gɛdómbáa a lɛ́ aŋa lámba ya yɛ́.

²⁴Mɛɛ́nɔ má ŋgɛ ɛndáa na gise gá yɛ́, tɔ́nɔ mefuŋe má cí má ŋgu úlénée, má nco yɛ fáa nigúmi ná má.

²⁵Buisí buimée buimée, bɛasɛ́ bɛ́ ŋga lɔbɔ́nɔ́ɔ biŋgólíi, goakɛ́ budúgú bó do ŋgá gɔnɔ bɛ́ɛmba.

²⁶Bá ŋgu úlénée hɔ́ɔ na buimée bɔ́ɔbɔ bó lɔ́mɔ́ nigúmi na mbúlugie go mɛɛ́nɔ.

²⁷Buimée bɔ́ɔbɔ bó lɔ́mɔ́ na biílo, bó do ná bóso go íŋene hɔ́ɔ, akɛ́ uŋií bɛɛmba táŋɛ́ ummue, akɛ́ umbelíbélí a dɛ ná bóso go íŋene hɔ́ɔ. Bá go íŋene hɔ́ɔ, bá lɔ́mɔ́ goana báaba ifíno yabɔ́ ɛ lɔ́mɔ́ ɔ́ŋɔ́ɔlú naá kálata ya gɛɔyɔ ya Moɔnɔ́ ba gɛdómbáa[88].