Read Nugunu Tóogio 22 Bible Online

Tóogio 22 - Nugunu bible

Tóogio 22

¹Naá nnyimé hɔ́ɔlɔ́, ɛ́ŋgɛlɛsɛ go túfie osaá yá miimpo má gɛɔyɔ. Má mba lɛ́ seŋgélégédé aŋa gɛlásɛ, má húmene naá oŋgɛ́yɔ́ yá Asaŋa na Moɔnɔ́ ba Gɛdómbáa[89].

²Naá kadɛ́gadɛ́ɛ ya hoóma há nɛbábánda ná tɛ́sɔnɔ, naá tɛ́mádɛ́má ya bɛnana bɛ́andɛ́ bá osaá, boɛ́tɛ bá gɛɔyɔ bó lɛ́ hɔ́ɔ. Bú úme bɛsamɔ́ ɛfɛ́ iŋkimée, ɛŋɛndɔ yɔɔdɔ́ na ɛhandɛ́ go nnyómá. Bɛáncɛ bá bɔ́ bɛ́ éŋugenye ɛgɔnɔ́ ya mɛɛ́nɔ.

³Ɛyɔmɛnɔ hɛ́ dɛ ŋgá gɔnɔ bɛ́ɛmba[90]. Oŋgɛ́yɔ́ yá Asaŋa na yá Moɔnɔ́ ba gɛdómbáa yó ŋga bɛ́ɛ́mbá naá tɛ́sɔnɔ moánɛ. Boyogóní bɛ́hɛ́ bá ŋga mo búlúgényée,

⁴bá núune busío bɛ́hɛ́, ufíno yɛ́hɛ́ ɔ́ŋɔ́ɔlú naá dobɔlɔ dábɔ́.

⁵Budúgú bó do ná gɔnɔ bɛ́ɛmba. Batɔ bá dɛ ná gɔnɔ bɛ́ɛmba mbií akɛ́ go gise gá lámba, akɛ́ go gɛ́ɛgɛ gá buisí, goakɛ́ Daadáa Asaŋa a ŋga bó numénínyée gise gɛ́hɛ́. Bá ŋga gúmée go bɛcamɛna biimée[91].

⁶Ɛ́ŋgɛlɛsɛ go gɔnɔ ŋgoyana a amɔ́: «Dogálɔ dɔ́ɔdɔ dó lɛ́ mammana, dó lɛ́ dá goŋaá mɔtɔ a ága odɛ́má yɛ́hɛ́ uŋkimée kɔ́ɔ. Daadáa Asaŋa mɔ́ɔnyɔ a mbaá lɔmɔ́ a dóogoninyo mbúsí sɛ́hɛ́ moóma, a mba dómá ɛ́ŋgɛlɛsɛ bɛhɛ́, go go nco dúfie boyogóní bɛ́hɛ́ boóma bɔ́ɔbɔ bó sɛmɛgananamɔ́ go bola godɔ́ɔdɔ godɔ́ɔdɔ.»

⁷Yésusu a amɔ́: «Ɛ́ná, ŋgúlene godɔ́ɔdɔ godɔ́ɔdɔ! Besé makɔ́nɔ́ na mɔ́ɔnyɔ a bɛ́dɛganamɔ́ dogálɔ dá tóogio dɔ́ɔdɔ dó lɔ́mɔ́ ɔ́ŋɔ́ɔlú naá kálata yɛ́ɛyɛ.»

⁸Yɔmɔ́ɔ Sáŋa, ndɛ́ ɔ́bɔ́ɔlú, mbɛ́ɛ́ ɛ́ná buimée bɔ́ɔbɔ. Kɔ́ɔ, naá nnyimé ya go ɔ́bɔ na go ɛ́na buimée bɔ́ɔbɔ, gámɛ go gule enúu go cí naá bɛgɔ́ndɔ́ bá ɛ́ŋgɛlɛsɛ mɔ́ɔnyɔ a mbaá túfényée moóma moánɛ, caá ŋgɛ́da go mo búlugenye.

⁹Ɛ́ŋgɛlɛsɛ go ŋgoyana a amɔ́: «Akɛ́ɛ, o do ŋaáa nɔ́ɔnɔ! Yɔmɔ́ɔ, maamɔ́ɔ na batɛ́ɔbɛnɔ, mbúsí sá Asaŋa na biimée báaba bá bɛ́dɛganamɔ́ dogálɔ dá kálata yɛ́ɛyɛ, dɛ lɛ́ olɔŋɔ naá buelí búmmue eé búmmue. Búlúgényée Asaŋa!»

¹⁰Gɛ́hɛ́ go gɔnɔ ŋgoyana a amɔ́: «O do hóámá o do ɔsɛ́gɔ́ dogálɔ dá tóogio dɔ́ɔdɔ naá kálata yɛ́ɛyɛ, goŋaá gɛcamɛna gá dɔ́ go bóhóogio gɛ́ ná lɛ́ mekúígíi.

¹¹Ŋgáa uŋií mobɛ́ a dúmbenye na go ŋanana bobɛ́ bɛ́hɛ́; ŋgáa mɔ́ɔnyɔ a ŋananamɔ́ moóma má biílo, ɛ ɛ́da naá busío na gobɔ́dɔ́bɔ gɛ́hɛ́. Kanɛ́ mɔ́ɔnyɔ a lɔ́mɔ́ gɛtɛ́nɛ́ɛ, ɛ ɛ́da naá busío, a ŋanana moóma má botɛ́nɛ́ɛ, gɔnɔ́, mɔ́ɔnyɔ ɔ ɔyɔmɔ́ go busío bá Asaŋa, ɛ ɛ́da naá busío, ɔ ɔyɔ go busío bá Asaŋa[92].»

¹²Yésusu a amɔ́: «Ɛɛ́ɛŋ, ŋgúlene godɔ́ɔdɔ godɔ́ɔdɔ. Ŋgúlene na bɛsoɛná go go gundeninye onyɔ moánɛ aŋa a mbaá yɔgɔ́nɔ́ɔ.

¹³Ndɛ́ Áláfa na Omɛ́ga, ba busío na ba mesúgidinye, mabayɛga na mesúge[93].»

¹⁴Besé makɔ́nɔ́ na báaba bá sogamɔ́ bɛla bábɔ́. Nɔ́ɔnɔ bá ŋga bɛáa bogaaga bá go nyáa bɛsamɔ́ bá boɛ́tɛ bɔ́ɔbɔ bó fáananamɔ́ gɛɔyɔ, bá gɔnɔ báca bɛasɛ́ bá go íŋene naá tɛ́sɔnɔ.

¹⁵Kanɛ́ báaba bá ŋgaá lɔbɛ́nɔ́ naá hanyɔ́ bá lɔ́mɔ́: batɔ báaba bɔ́ ɔyɔmɔ́ aŋa mbóa, basɛɔsɛ́ɔ, batɔ bá go lɛ́galɛga gɛɔyɔ gá hanyɔ́, buúníní batɔ, bagɔgɔ́gɔgɔ, na biimée báaba bá maamanamɔ́ mebelébélíe, bá gunde bá belebele.

¹⁶«Yɔmɔ́ɔ, Yésusu, ndɛ́ dómáalú ɛ́ŋgɛlɛsɛ bamɛ go go nyó dúfie bɛɛnyɔ́ɔ Biimbó bá boolímínyí caá moóma mɔ́ɔmɔ mó lɛ́ mammana. Ndɛ́ naá nogɔgɔ́ ná Défidi; yɔmɔ́ɔ mɔ́ɔ ndɔ́mɔ́ gɛbonyaga gá hiotóti há ŋgúle mbála[94].»

¹⁷Giliíli na ugiŋénú ba okɔ́dɔ go oyɛda bá amɔ́: «Úle!» Ŋgáa mɔ́ɔnyɔ ɔ ɔ́bɔnɔmɔ́ dogálɔ dɔ́ɔdɔ, o oyɛda a amɔ́: «Úle!» Ŋgáa mɔ́ɔnyɔ a lɔ́mɔ́ na inyúídi u úle. Mɔ́ɔnyɔ a maamanamɔ́ miimpo má gɛɔyɔ a má dáŋaba go dugúnú[95].

¹⁸Yɔmɔ́ɔ, ŋgoó oyɛ́dá boóma moánɛ daŋɛ́daŋɛ go biimée báaba bɔ́ ɔ́bɔnɔmɔ́ dogálɔ dá tóogio dɔ́ɔdɔ naá kálata yɛ́ɛyɛ caá: mɔtɔ a amɔ́ a gídene akɛ́ ŋkádɛ kɔ́ɔ, Asaŋa a ŋga mo gídéné bɛɛmba biimée bɛ́ɛbɛ bɛ́ lɔ́mɔ́ dáŋóná dáŋónáa naá kálata yɛ́ɛyɛ.

¹⁹Mɔtɔ a amɔ́ u úlie boóma naá dogálɔ dá tóogio dɔ́ɔdɔ naá kálata yɛ́ɛyɛ[96], Asaŋa a dɛ ŋgá mo fáa bogaaga bá go nyáa bɛsamɔ́ bá boɛ́tɛ bɔ́ɔbɔ bó fáananamɔ́ gɛɔyɔ, ɛ́na akɛ́ go íŋene naá gimmúmpúu gá tɛ́sɔnɔ, mɔ́ɔmɔ mó lɔ́mɔ́ dáŋóná dáŋónáa naá kálata yɛ́ɛyɛ.

²⁰Mɔ́ɔnyɔ a dúfenyemú goŋaá moóma mɔ́ɔmɔ mó lɛ́ mammana, o oya a amɔ́: «Ɛɛ́ɛŋ, ŋgúlene godɔ́ɔdɔ godɔ́ɔdɔ. Aamɛnɛ! Ŋgáa gó bɛ́ɛmba nɔ́ɔnɔ!» Úlé, Daadáa Yésusu[97]!

²¹Ŋgáa Daadáa Yésusu a ŋa mɔtɔ uŋkimée niibo nɛ́hɛ́.