Read Nugunu Tóogio 3 Bible Online

Tóogio 3 - Nugunu bible

Tóogio 3

¹Ɔ́ŋɛ́nɔ ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Sáládɛsɛ go amɔ́: «Náana gɔ́ɔ mɔ́ɔnyɔ a lɔ́mɔ́ na biliíli bá Asaŋa bɛ́táanɔ na bɛ́andɛ́, na muotóti mótáanɔ na móandɛ́, a gálagalamɔ́: Ŋgíyimene buelí báhɔ, batɔ bó oya bá amɔ́ o lɛ́ ogɔ́sɔ, asáa maamɔ́ɔ ugúe.

²Foyóga, o gíndie masɛnɛ má gioliminyo máama o gá lɔ́mɔ́ na má, goŋaá má gaá gúé púmúpúmú. Ŋgɛɛ́ ɛ́ná goŋaá meŋiigíe máhɔ akɛ́ má mémmue má dɛ báá bese naá busío bá Asaŋa bamɛ.

³Gɔ́ɔ, bééníŋínyéemú kanɛ́ gohúunenye gɔ́ɔgɔ o mbaá bɛáa na mbɔ́dɔ yɛ́ɛyɛ o mbaá gó ɔ́bɔ́. Gó gumbénéemú, o núgie gɛɔyɔ. Aáŋa o do foyógá, kaá go bolɛ́ná boasɛ, nco go gɔ́lɔ aŋa uŋgíbi, o do ŋgí íyime gɛcamɛna gɛ́ɛgɛ bó ŋgaá bɛ́ɛ́mbá[7].

⁴Akɛ́ nɔ́ɔnɔ, nɛnamá ná batɔ hɔ́ɔlɔ́ naá Sáládɛsɛ nɛ́ lɛ́ kanɛ go ága bɛla bábɔ́ biílo na go ŋanana gá bɛbɛ́ bá moóma. Bá ŋga báágánáa bɛla bimmúmpúu, bɛ́ ɛnda olɔŋɔ namɛ, mammana bá lɛ́ naá odɛ́nɛ́.

⁵Nɔ́ɔ gɔ́ɔ mɔtɔ mɔ́ɔnyɔ a ŋgaá mánɛ́gɛ́ná a ŋgaá báágá bɛla bimmúmpúu; cɛ ŋgá fúgune ufíno yɛ́hɛ́ naá kálata ya gɛɔyɔ. Ka ŋgo olímínyóo naá busío bá Baaba na naá busío bá bɛɛ́ŋgɛlɛsɛ bɛ́hɛ́ goŋaá a lɛ́ bamɛ[8].

⁶Ŋgáa mɔ́ɔnyɔ a lɔ́mɔ́ na edúu ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá boolímínyí.»

⁷Ɔ́ŋɛ́nɔ ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Filedelefíi go amɔ́: Mɔ́ɔnyɔ a lɔ́mɔ́ Gimmúmpúu, Mammana, mɔ́ɔnyɔ a nonamɔ́ ibuune há Défidi, mɔ́ɔnyɔ a buunemú, mɔtɔ a dɛ bósó ba go buige, mɔ́ɔ a buigemú mɔtɔ a dɛ bósó ba go buune, a gálagalamɔ́ náana:

⁸Ŋgíyimene buelí báhɔ. Ɛ́ná, ŋgaá buune naá busío báhɔ gɛasɛ́ gɛ́ɛgɛ mɔtɔ a lɔ́mɔ́ a dɛ bósó ba go buige. O do báá na bogaaga makɔ́nɔ́, akɛ́ nɔ́ɔnɔ o mba bɛ́dɛ́gɛ́ná nogálɔ námɛ, o lɛ́ kanɛ go mbásáŋona.

⁹Ɛ́ná, náana gɔ́ɔ nná ŋamɔ́ na batɔ bá giimbó gá Sátana báaba bá belebelemú bá amɔ́ bá lɛ́ Beyúdene, bɔ́ɔ bá dɛ bɛ́ɛ́mbá. Nná bó gaŋana goŋaá bá nco gule enúu naá busío báhɔ, bá go búlugenye, bá gɔnɔ lɛnca goŋaá ko maamana[9].

¹⁰Aŋa o mbaá bɛ́dɛ́gɛ́ná nogálɔ námɛ na ɛbágóɛga, yɔmɔ́ɔ tɔ́nɔ nná go beŋe go noséésényée nɔ́ɔnɔ nó nú úlinemú batɔ bá cí iŋkimée go go ɛ́na ɛkádɛ bá lɔ́mɔ́.

¹¹Ŋgúlene godɔ́ɔdɔ godɔ́ɔdɔ, nonáa tíŋítiŋi bɔ́ɔbɔ o bɛananamɔ́, goŋaá mɔtɔ a dɛ ncó bɔgɔ bɛsoɛná báhɔ.

¹²Mɔ́ɔnyɔ a ŋgaá mánɛ́gɛ́ná, ka ŋga mo dílímínyée aŋa ɛgoná naá Nnyaŋá ya Asaŋa bamɛ, a dɛ ŋgá gɔnɔ húme. Nnɔ́ ɔ́ŋɔ ufíno yá Asaŋa bamɛ na yá tɛ́sɔnɔ ya Asaŋa bamɛ naá mɔ́ɔ, gɛpáa gá Yolósalɛmɛ gɛ́ɛgɛ gɛ́ ɛ́damɔ́ go úlene naá mmoɛná, gɛ́ɛgɛ Asaŋa bamɛ a dómanamɔ́. Nnɔ́ ɔ́ŋɔ tɔ́nɔ gɛpáa gámɛ gá ufíno naá mɔ́ɔ[10].

¹³Ŋgáa mɔ́ɔnyɔ a bɛananamɔ́ edúu ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá boolímínyí.

¹⁴Ɔ́ŋɛ́nɔ ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Leyodíse go amɔ́: «Náana gɔ́ɔ mɔ́ɔnyɔ a lɔ́mɔ́ Aamɛnɛ, Ŋgominyo ba pídefide gɔnɔ́ mammana, mɔ́ɔnyɔ a lɔ́mɔ́ mabayɛga má buimée bɔ́ɔbɔ Asaŋa a mbaá gedíe, a gálagalamɔ́:

¹⁵Ŋgíyimene buelí báhɔ, o do báá akɛ́ udénú, o do báá akɛ́ ofɛ́ɔ. Gásɛ́ kanɛ́ o lɔ́mɔ́ udénú, ɛ́na ofɛ́ɔ!

¹⁶Kanɛ́ aŋa o lɔ́mɔ́ ɔ́lɔlɔ ɔ́lɔlɔ, o do bɛ́ɛ́mbá akɛ́ udénú ɛ́na ofɛ́ɔ, kaá go nodá.

¹⁷Ɛɛ́ɛŋ, go oya go amɔ́ ndɛ́ na bonɔ́mɛ, ndɛ́ ɛ́yáalú gɛnɔ́mɛ, cɛ baŋáa boóma, kanɛ́ o do lɛncá goŋaá o lɛ́ mahana, o háanahana, o lɛ́ osógasoga, ugélígeli gɔnɔ́ nnú gɔdɔɔ́.

¹⁸Ŋgaá go fáá ɛsɔ́mɔ caá o nco go ɔ́ndɔ góolo ya sámbónáalú naá íyuke naá yɔmɔ́ɔ go go ɛ́ya mammana gɛnɔ́mɛ, go ɔ́ndɔ bɛla bimmúmpúu go go báboanana, odóɛ nnóa yá nnú gɔdɔɔ́ yáhɔ yó do ɛ́nɛ́gá; go ɔ́ndɔ ondɔ yá go bédéenenye go oŋgíso, go ɛ́da go ɛ́nanɛna.

¹⁹Naá bámɛ boayá, biimée báaba mbó maamanamɔ́, mbó goomanɛna, mbó fáanana noséésényée[11]. Bɛ́ɛ́mba kanɛ́ na gɛlola, o núgie gɛɔyɔ.

²⁰Ɛ́ná, yɔmɔ́ɔ mɔ́nyɔ́ɔ tɛ́nɛ́ɛ naá gɛasɛ́, kɔŋɔnɔ. Mɔtɔ a amɔ́ ɔ ɔ́bɔ ukelú yámɛ, a gunde a buune gɛasɛ́, kií íŋéné naá mɔ́ nnyaŋá, dɛ gɔnɔ nyáanya olɔŋɔ.

²¹Mɔ́ɔnyɔ a ŋgaá mánɛ́gɛ́ná, ka ŋga mo fáá bogaaga bá go nco lukumene namɛ naá oŋgɛ́yɔ́ yámɛ yá bufuŋe, aŋa yɔmɔ́ɔ tɔ́nɔ mmbaá noáa, mbáá mánɛ́gɛ́ná, gɔ́ɔ mbɛɛ́ ɛ́dá lukumene na Baaba naá oŋgɛ́yɔ́ yɛ́hɛ́ yá bufuŋe.

²²Ŋgáa mɔ́ɔnyɔ a bɛananamɔ́ edúu ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá Boolímínyí.»