Read Nugunu Tóogio 5 Bible Online

Tóogio 5 - Nugunu bible

Tóogio 5

¹Gámɛ go ɛ́na Kálata máŋá máŋá naá ombɔ́gɔ onɔ́mɛ yá mɔ́ɔnyɔ a mbaá lɔmɔ́ ndukíi naá oŋgɛ́yɔ́ yá bufuŋe, ɛ mba lɛ́ ɔ́ŋɔ́ɔlú maayá miimée máandɛ́, buigéelú na bisúŋe bɛ́táanɔ na bɛ́andɛ́.

²Mbáa lɛ gó gɔnɔ go ɛ́na gɛgaaga gá ɛ́ŋgɛlɛsɛ mɔ́ɔnyɔ a mbaá lɛ́ a dúmeninye ukelú naá mmoɛná a amɔ́: Ánɛ́ɛ a lɔ́mɔ́ naá odɛ́nɛ́ yá go fulune bisúŋe bá kálata yɛ́ɛyɛ, a yɛ buune o?

³Kanɛ́ akɛ́ naá mmoɛná, akɛ́ naá cí háalá, akɛ́ naá cí gúunú, mɔtɔ a dɛ mbáa lɛ hɔ́ɔ naá odɛ́nɛ́ yá go buune kálata ɛ ɛ́na bɔ́ɔbɔ naá gadɛ́ɛ.

⁴Mbáa lɛ gó ɛ́da go baŋa makɔ́nɔ́ goakɛ́ mɔtɔ a dɛ mbɛ́ɛ́ ɛ́nɛga naá odɛ́nɛ́ yá goŋaá a buune kálata ɛ ɛ́na bɔ́ɔbɔ naá gadɛ́ɛ.

⁵Gɔ́ɔ ofɛanɔ́ɔ ummue a ŋgoyanamɔ́ a amɔ́: O do baŋáa! Núúnée, ŋgoyóŋo ya nigúli ná Yóda, onana yá ufuŋe Défidi a á mánɛ́gɛ́ná, a gaá fulúné bisúŋe bɛ́táanɔ na bɛ́andɛ́, a buune kálata.

⁶Kɔ́ɔ ŋgɛ́namɔ́: Moɔnɔ́ ba gɛdómbáa tɛ́nɛ́ɛ, mekúígíi na oŋgɛ́yɔ́ yá bufuŋe, géŋgélídíelú na bigedie bɛgɔ́sɔ bínni naá tɛ́mádɛ́má ya bafɛanɔ́ɔ nitíno na bénni, a mba lɛ́ aŋa a lɛ́ sɛ́sɛ́dáalú ukelú. A mba lɛ́ a bɛanana modɔ́ŋɔ mótáanɔ na móandɛ́ na oŋgíso átáanɔ na áhandɛ́ yáaya yá lɔ́mɔ́ biliíli bɛ́táanɔ na bɛ́andɛ́ bɛ́ɛbɛ Asaŋa a mbaá dómánáa naá cí iŋkimée.

⁷Moɔnɔ́ ba gɛdómbáa go báyɛkɛna, a báá gɔ́lɔ kálata naá ombɔ́gɔ onɔ́mɛ yá mɔ́ɔnyɔ a mbaá lɔ́mɔ́ ndukíi naá ɔŋgɛ́yɔ́ yá bufuŋe.

⁸Aŋa a mbaá gɔ́lɔ́ kálata, bigedie bɛgɔ́sɔ bínni na bafɛanɔ́ɔ nitíno na bénni go gule enúu naá busío bɛ́hɛ́. Uŋkimée naá olɔŋɔ yábɔ́ a mba lɛ́ a bɛanana timbilí na kɔ́bɔ sá góolo dácɛ na bolɔ, sɛ́ɛsɛ sɛ́ lɔ́mɔ́ mbósógólí sá boɛ́nɔ bá Asaŋa.

⁹Bá mba lɛ́ bá ágana gɛpáa gá osagɔ gɛ́ɛgɛ bá amɔ́: O háanana naá odɛ́nɛ́ yá go gɔ́lɔ kálata, o fulune bisúŋe, goakɛ́ bá mba go óná. Go gɛbáágá gáhɔ, o báá fáŋá go busío bá Asaŋa batɔ bá egúli eŋkimée, bá dogálɔ duimée, bá mɛɛ́nɔ miimée na bá bɛdɔŋɔ biimée.

¹⁰O báá bó íyíe, go busío bá Asaŋa bɛcɔ́, boɛ́nɔ bá bédúmbí bɛbáágá naá Asaŋa, bá ŋga gúmée naá cí.

¹¹Gɔ́ɔ ŋgɛ́namɔ́: gámɛ go ɔ́bɔ ukelú yá gɛcɛcá gá bɛɛ́ŋgɛlɛsɛ. Bá mba lɛ́ mantɛdɛ mantɛdɛ má batɔ́sɛnɔ kanɛ ombanɔ, tɛ́nɛ́ɛ tɛ́nɛ́ɛ géŋgélídíelú oŋgɛ́yɔ́ yá bufuŋe, olɔŋɔ na bigedie bɛgɔ́sɔ na bafɛanɔ́ɔ.

¹²Bá mba lɛ́ bá ágana osagɔ ukelú naá mmoɛná bá amɔ́: Moɔnɔ́ ba gɛdómbáa mɔ́ɔnyɔ bá mboó óná, a háanana go bɛa nɛgaŋa, bonɔ́mɛ, nciŋí, bogaaga, mbúlugie, nigúmi na bileebie.

¹³Gámɛ go gɔnɔ go ɔ́bɔ bigedie biimée bɛ́ɛbɛ naá mmoɛná, naá cí háalá, naá cí gúunú, na naá máŋɛ́, bigedie biimée bɛ́ ágana osagɔ bɛ́ amɔ́: bileebie, mbúlugie, nigúmi na nɛgaŋa mó bɛ́ɛmba go busío bá mɔ́ɔnyɔ a lɔ́mɔ́ ndukíi naá oŋgɛ́yɔ́ yá bufuŋe, mó bɛ́ɛmba tɔ́nɔ go busío bá moɔnɔ́ ba gɛdómbáa, go mannyómá aá mannyómá.

¹⁴Bigedie bɛgɔ́sɔ bínni go aŋkona bɛ́ amɔ́: Aamɛnɛ! Bafɛanɔ́ɔ go gule enúu go cí go ɛ́da go búlugenye.