Read Nugunu Tóogio 6 Bible Online

Tóogio 6 - Nugunu bible

Tóogio 6

¹Gɔ́ɔ ŋgɛ́namɔ́ moɔnɔ́ ba gɛdómbáa a fulune gisúŋe gá busío naá bisúŋe bɛ́táanɔ na bɛ́andɛ́, gámɛ go ɔ́bɔ gigedie gímmue naá bigedie bɛgɔ́sɔ bínni, gɛ́ gálagala ukelú yó dɔgɔnɔ aŋa mbalámandáa yó amɔ́: «Úle!»

²Ŋgaá núúnídé, gámɛ go ɛ́na nnyádɛ mmúmpúu. Mɔtɔ mɔ́ɔnyɔ a mbaá lɔmɔ́ kɔ́ɔ a nona gɛ́bɛca, bá báá mo fáá ɛdaada há bufuŋe, gɛ́hɛ́ go ɛ́da aŋa mɔtɔ ba gɛmánɛgɛna go go mánɛgɛna.

³Aŋa moɔnɔ́ ba gɛdómbáa a mbaá fulúné gisúŋe gá gáandɛ́ɛ, gámɛ go ɔ́bɔ gigedie gɛgɔ́sɔ gá gáandɛ́ɛ gɛ́ gálagala gɛ́ amɔ́: «Úle!»

⁴Gɔ́ɔ nnyádɛ mbɛ́lɛŋɛnyɛ aŋa íyuke ɛ húmemú. Bá báá fáá mɔtɔ mɔ́ɔnyɔ a mbaá lɔmɔ́ kɔ́ɔ bogaaga bá go bɔgɔ buumbénú naá cí go goŋaá batɔ bɛ́ ɛ́da go ónanɛna, bá báá gɔnɔ́ mo fáa gɛantá gá kalafɔ.

⁵Aŋa moɔnɔ́ ba gɛdómbáa a mbaá fulúné gisúŋe gá gádadɔ́ɔ, gámɛ go ɔ́bɔ gigedie gɛgɔ́sɔ gá gádadɔ́ɔ gɛ́ gálagala gɛ́ amɔ́: «Úle!» Ŋgaá núúnídé, gámɛ go ɛ́na nnyádɛ piídidi[16]. Mɔtɔ mɔ́ɔnyɔ a mbaá lɔmɔ́ kɔ́ɔ a mba lɛ́ a nona kílo naá ombɔ́gɔ.

⁶Gámɛ go ɔ́bɔ aŋa ukelú, yó ɛ́da go úlene naá kadɛ́gadɛ́ɛ ya bigedie bínni yó amɔ́: «Goana mɛ́da má mbasa mémmue go bɛsoɛná bá buisí búmmue bá buelí. Goana mɛ́da mádadɔ́ má ndɛ́ásɛ go bɛsoɛná bá buisí búmmue bá buelí. Kanɛ́ go bɔ́ɔbɔ bó núunemú megúdé na mɔgɛ́bɔ, o do dálá ombɔ́gɔ.»

⁷Aŋa Moɔnɔ́ ba gɛdómbáa a mbaá fulúné gisúŋe gá génni, gámɛ go ɔ́bɔ gigedie gɛgɔ́sɔ gá génni gɛ́ amɔ́: «Úle!»

⁸Ŋgaá núúnídé, gámɛ go ɛ́na nnyádɛ nnyɔ́dɔ mbínyí mbínyíi. Mɔtɔ mɔ́ɔnyɔ a mbaá lɔmɔ́ kɔ́ɔ bá mo dɔ́ŋɔnɔ nigúe, hoóma háaha begúe bá lɔ́mɔ́ hɔ́ɔ há mo bienene, bá báá bó fáá bogaaga naá nɛnamá ná batɔ báaba naá ginnií gá gigísi gá cí, go go bó óna go bidé, ncaná, ɛgɔnɔ́ ya go báakanɛna na bɛkándáa bá nnyama[17].

⁹Aŋa moɔnɔ́ ba gɛdómbáa a mbaá fulúné gisúŋe gá gátáanɔ, gámɛ go ɛ́na naá cí ya gɛdálɛ́ná biliíli bá batɔ báaba bá mboó ónáa go busío bá goŋaá bá mba lɛ́ bá fídene nogálɔ ná Asaŋa gɔnɔ́ na buŋgominyo bɔ́ɔbɔ bá mbaá ŋaáa go busío bɛ́hɛ́.

¹⁰Bá mba lɛ́ bá ánca na bogaaga bá amɔ́: «Ogɔ́nɔ́ɔ, gimmúmpúu, gɔnɔ́ mammana, gó ɛ́da húme nikíníi o ná gɛ́gamɔ́ go go nco sómba bɛsɛnɛ bá batɔ bá cí, o gunde o gaŋɛmɛda go gɛɔyɔ gɛ́cɔ́ gɛ́ɛgɛ bá mbaá díéŋíe.»

¹¹Gɔ́ɔ bá mbaá fáá na onyɔ moánɛ kaba mmúmpúu, bá báá bó oyáná bá amɔ́: «Bédémbídínyéemú nɔnɔ sɔŋɛ gó ɛ́da héme aŋa ombanɔ yá batɔ yó ŋgaá háá. Nɔ́ɔnɔ go lɛ́ aá bá háanana go manɛ go óna bolimóní bɛ́nyɔ́ bá gioliminyo na báaba bá nyó díligenenemú go buelí aŋa bá mbaá nyó ónáa bɛɛnyɔ́ɔ.»

¹²Gámɛ go ɛ́na aŋa moɔnɔ́ bá gɛdómbáa a mbaá fulúné gisúŋe gá gátáanɔ na gémmue, cí go dómba go yiŋkimidie na bogaaga, buisí bó báá gundé fidídífididi aŋa gɛla gá busí. Ofɛ́ uŋkimée uŋkimée yó báá gundé bɛ́lɛ́ŋɛ́bɛlɛŋɛ aŋa manɔ́ŋɔ́.

¹³Muotóti mó káfakafa go mmoɛná, mó obana go cí aŋa gɛantá gá puŋe gɛ́ yiŋkenyemú boɛ́tɛ, bɛsamɔ́ bá bɔ́ kanɛ go gónɛna bɛ́ obana go cí.

¹⁴Mmoɛná ɛ báá bɔ́gɔ́gɛ́dɔ́ aŋa kálata yɛ́ɛyɛ bá máŋamɔ́. Ɛgɔndɔ iŋkimée na bɛyɛŋɛ bá cí bɛ́ɛbɛ naá kadɛ́gadɛ́ɛ ya miimpo, muimée mó búú úlúkényée naá indukí ya mɔ́[18].

¹⁵Mefuŋe magɔ́nɔ́ má cí, bogógí ɛlɔŋɔ, bagɔ́nɔ́ɔ bá bisimbi, banɔ́mɛnɔmɛ, bɛgaaga, bɛɔlɛ́ na báaba bá lɔ́mɔ́ bá dɛ bɛ́ɛ́mbá bɛɔlɛ́, go ɛ́da bɔ́ɔsɛgɔnɔ naá bikekúlu, na naá bɛdánɛ́dánɛ́ bá ɛgɔndɔ.

¹⁶Gáábɔ́ go ɛ́da go oyanɛna ɛgɔndɔ na bɛdánɛ́dánɛ́ bá amɔ́: Có cúbénéemú nɔnɔ, no có ɔsɛgɔ halaháláa na oŋgíso yá mɔ́ɔnyɔ a lɔ́mɔ́ ndukíi naá oŋgɛ́yɔ́ yá bufuŋe gɔnɔ́ halaháláa na mpímí ya moɔnɔ́ ba gɛdómbáa.

¹⁷Mammana, buisí bogɔ́nɔ́ bá mpímí yabɔ́ bó á bolá, mɔtɔ a dɛ bósó bá go bó hóda[19].