Read Nugunu Tóogio 7 Bible Online

Tóogio 7 - Nugunu bible

Tóogio 7

¹Naá nnyimé hɔ́ɔlɔ́, gámɛ go ɛ́na bɛɛ́ŋgɛlɛsɛ bénni tɛ́nɛ́ɛ naá maayá má cí miimée ménni. Bá mba lɛ́ bá legene ifufu inni[20] yɛ́ɛyɛ naá cí goŋaá akɛ́ yúmmue yó do fufídé akɛ́ naá cí, akɛ́ naá máŋɛ́, akɛ́ go boɛ́tɛ búmmue.

²Kɔ́ɔ mbɛɛ́ ɛ́ná ɛ́ŋgɛlɛsɛ ummue a bólɛgana gɛayá gɛ́ɛgɛ buisí bó ɛ́damɔ́ bumugene. A mba lɛ́ na sɛtáma ya gibélincígínyí gá Asaŋa ogɔ́sɔ. Gɛ́hɛ́ go dɔ́ŋɛnɔ ukelú naá mmoɛná bɛɛ́ŋgɛlɛsɛ bénni báaba Asaŋa a mbaá bó fáá bogaaga bá go ŋa cí na máŋɛ́ gɛbɛ́,

³a amɔ́ gáábɔ́ a amɔ́: «No do gá lɛ́ go ŋa cí gɛbɛ́, akɛ́ máŋɛ́, akɛ́ mɛɛ́tɛ, aáŋa dɛ gá lɛ́ dɛ dɛ bélincígínyée na sɛtáma nobɔlɔ ná boyogóní bá Asaŋa bɛcɔ́[21].»

⁴Gɔ́ɔ bá ŋgoyanamɔ́ ombanɔ yá báaba bá mbaá bó bélincígínyée go nobɔlɔ na sɛtáma ya Asaŋa. Bá mba lɛ́ batɔ́sɛnɔ ntɛdɛ na batɔ́sɛnɔ otíno áhandɛ́ na bénni bá egúli eŋkimée yá boɛ́nɔ bá Ɛ́sɛlahɛ́ɛlɛ.

⁵Naá nigúli ná Yóda, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Lúbene, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Gáadɛ, batɔ tɔ́sɛnɔ sɛ́ɔ́dɔ́ na ɛ́handɛ́.

⁶Naá nigúli ná Asɛ́ɛlɛ, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Nɛfɛtáalɛ, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Manasɛ́ɛ, batɔ tɔ́sɛnɔ sɛ́ɔ́dɔ́ na ɛ́handɛ́.

⁷Naá nigúli ná Símiyono, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Léfi, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Ɛsakáalɛ, batɔ tɔ́sɛnɔ sɛ́ɔ́dɔ́ na ɛ́handɛ́.

⁸Naá nigúli ná Sábɔlɔŋɔ, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Yósɛbɛ, batɔ tɔ́sɛnɔ sɛ́ɔ́dɔ́ na ɛ́handɛ́. Naá nigúli ná Bɛncamɛ́ŋɛ, batɔ tɔ́sɛnɔ sɛ́ɔ́dɔ́ na ɛ́handɛ́.

⁹Naá nnyimé hɔ́ɔlɔ́, ŋgaá núúnídé, gámɛ go ɛ́na gɛcɛcá gá batɔ kanɛ mbanɛ́náa, bá mba lɛ́ batɔ bá bɛdɔŋɔ biimée, bá egúli eŋkimée, bá mɛɛ́nɔ miimée na bá dogálɔ duimée. Bá mba lɛ́ biimée tɛ́nɛ́ɛ naá busío bá oŋgɛ́yɔ́ yá bufuŋe na naá busío bá Moɔnɔ́ ba gɛdómbáa, biimée bá mba lɛ́ na kaba mmúmpúu go nnyɔ́dɔ na bɛáŋɔ go ombɔ́gɔ.

¹⁰Ba mba lɛ́ bó oya ukelú naá mmoɛná bá amɔ́: «Gisódio gɛ́ ɛ́damɔ́ go úlene naá Asaŋa bɛcɔ́, mɔ́ɔnyɔ a lɔ́mɔ́ ndukíi naá oŋgɛ́yɔ́ yá bufuŋe, na naá Moɔnɔ́ ba gɛdómbáa.»

¹¹Bɛɛ́ŋgɛlɛsɛ biimée báaba bá mbaá géŋgélídíe oŋgɛ́yɔ́ yá bufuŋe, bafɛanɔ́ɔ, bigedie bɛgɔ́sɔ bínni; bɛɛ́ŋgɛlɛsɛ bɔ́ɔbɔ go gule enúu go cí, bá báá dábánáa mosío go go búlugenye Asaŋa.

¹²Bó oya bá amɔ́: «Aamɛnɛ! Mbúlugie, nigúmi, nciŋí, bibéhiigí, ufíno, nɛgaŋa na bogaaga mó lɔ́mɔ́ gá Asaŋa bɛcɔ́ go mannyómá aá mannyómáa. Aamɛnɛ.»

¹³Ofɛanɔ́ɔ ummue go gɔ́lɔ dogálɔ a amɔ́ gámɛ a amɔ́: «Batɔ báaba na kaba mmúmpúu go nnyɔ́dɔ bá lɔ́mɔ́ ba ánɛ́ɛ, bɛ́ ɛ́damɔ́ go úlene áhanɛ́ɛ o?»

¹⁴Gámɛ go mo gundie caá: «Ogɔ́nɔ́ɔ bamɛ, maamɔ́ɔ mɔ́ɔ go íyimenemú.» Gɛ́hɛ́ go ŋgoyana kanɛ́ a amɔ́: «Bɛ́ ɛ́damɔ́ go úlene naá gɛantá gá noséésényée[22]. Bú ú úlé bá báá sogáa kaba sábɔ́, bá báá sɛ́ púményée naá manɔ́ŋɔ́ má Moɔnɔ́ ba gɛdómbáa.

¹⁵«Gó moánɛ bá lɔ́mɔ́ tɛ́nɛ́ɛ naá busío ba oŋgɛ́yɔ́ yá Asaŋa, bá mo búlugenye aŋa siisíi aŋa budúgú naá Nnyaŋá ya Asaŋa yɛhɛ́. Mɔ́ɔnyɔ a lɔ́mɔ́ ndukíi naá oŋgɛ́yɔ́ yá bufuŋe a ŋga bó lɔ́lɔ́ɔ[23].

¹⁶«Bá dɛ ŋgá gɔnɔ nómɛda ncaná, bá dɛ ŋgá gɔnɔ go ɔ́bɔ inyúidi, buisí na gɛonyá gábɔ́ mó do ŋgá gɔnɔ bó lókononyo.

¹⁷Ɛɛ́ɛŋ, Moɔnɔ́ ba gɛdómbáa mɔ́ɔnyɔ a lɔ́mɔ́ naá kadɛ́gadɛ́ɛ ya oŋgɛ́yɔ́ yá bufuŋe a ŋga bɛ́ɛ́mbá umbeŋíbéŋí babɔ́, a ŋga bó indényée anáa nobɛ́láa ná miimpo má gɛɔyɔ. «Asaŋa a ŋga bó fúúnée biósino biimée[24].»