Read Nugunu Tóogio 8 Bible Online

Tóogio 8 - Nugunu bible

Tóogio 8

¹Aŋa Moɔnɔ́ ba gɛdómbáa a mbaá fulúné gisúŋe gá gátáanɔ na gáandɛ́ɛ, mmoɛná go máma pɔ́ɔ́ boóma bá go húme gigísi gá gigúlí.

²Gámɛ go ɛ́na bɛɛ́ŋgɛlɛsɛ bátáanɔ na báandɛ́ báaba bá lɔ́mɔ́ tɛ́nɛ́ɛ tɛ́nɛ́ɛ naá busío bá Asaŋa. Bá báá bó fáá cɛ́bá ɛ́táanɔ na ɛ́handɛ́.

³Ɛ́ŋgɛlɛsɛ uncodío go nco dɛ́lɛmɛna mekúígíi na gɛdálɛ́ná. A mba lɛ́ a nona gilókónínyó bolɔ gedíelú na góolo. Bá báá mo fáá gɛca gá baalabɛ́nda go go íŋene go gɛbáágá naá gɛdálɛ́ná gá góolo gɛ́ɛgɛ naá busío bá oŋgɛ́yɔ́, olɔŋɔ na mbósógólí sá boɛ́nɔ bá Asaŋa[25].

⁴Naá ombɔ́gɔ yá ɛ́ŋgɛlɛsɛ, ncóki sá baalabɛ́nda go ɛ́da go bólɛgana naá busío bá Asaŋa, olɔŋɔ na mbósógólí sá boɛ́nɔ.

⁵Ɛ́ŋgɛlɛsɛ go gɔ́lɔ kanɛ́ boóma bɔ́ɔbɔ bá lókononyomú bolɔ, a báá hóógío kɔ́ɔ íyuke há gɛdálɛ́ná, go nɔɔ go cí. Gɔ́ɔ mbalámandáa sɛ́ ɛ́damɔ́ go gide, ikelú ɛ dónogogana, mpólómɛnáa ɛ bege, cí ɛ yiŋkime[26].

⁶Bɛɛ́ŋgɛlɛsɛ bátáanɔ na báandɛ́ báaba bá mbaá lɔmɔ́ bá nona cɛ́bá ɛ́táanɔ na ɛ́handɛ́ go ɛ́da go bégedegedie go go sɛ́ ómbɛda.

⁷Ba busío go ómbɛda cɛ́bá yɛhɛ́, nobólá ná adánɛ́ na íyuke nebígínyéelú na manɔ́ŋɔ́ go ɛ́da go obana go cí. Gɛdadɔ́ɔ gá cí gɛ́ báá lɔ́kɔ́ɔ, gɛdadɔ́ɔ gá mɛɛ́tɛ gɛ́ báá lɔ́kɔ́ɔ, na mbínyí kɔ́sɔ iŋkimée[27].

⁸Ɛ́ŋgɛlɛsɛ ba gáandɛ́ go ómbɛda cɛ́bá yɛhɛ́, boóma aŋa gɛantá gá ogɔndɔ na íyuke go ɛ́da bɔ́nɔ naá máŋɛ́. Gɛdadɔ́ɔ gá máŋɛ́ go gunde manɔ́ŋɔ́ aá manɔ́ŋɔ́.

⁹Gɛdadɔ́ɔ gá bigedie gɛ́ɛgɛ gɛ́ mbaá lɔmɔ́ gɛ́ ɔyɔ naá máŋɛ́ go fúe, tɔ́nɔ gɛdadɔ́ɔ gá besitíme gɛ́ báá gadágádáa.

¹⁰Ɛ́ŋgɛlɛsɛ ba gádadɔ́ɔ go ómbɛda cɛ́bá yɛhɛ́, gɛantá gá hiotóti go oba go mmoɛná hɛ́ ɛ́da hɛ́ lola aŋa gɛantá gá gɛlɛ́mbɛ gá íyuke. Gá hɛ́ go oba naá gɛdadɔ́ɔ gá ɛsaá na ɛsɔmbɔ.

¹¹Ufíno yá hiotóti hɛ́ɛhɔ yó lɔ́mɔ́ «Bónoanana.» Gɛdadɔ́ɔ gá miimpo go gunde gonoanana aá gonoanana, degédegé ya batɔ go gúenene goŋaá miimpo má mba gundé gonoanana aá gonoanana.

¹²Ɛ́ŋgɛlɛsɛ ba génni go ómbɛda cɛ́bá yɛhɛ́, gɛɛmba go gumbene gɛdadɔ́ɔ gá buisí, gɛdadɔ́ɔ gá ofɛ́ na gɛdadɔ́ɔ gá muotóti. Mó báá yímíe gɛdadɔ́ɔ gá mɔ́ gá go bonya, siisíi ɛ báá yímíe gɛdadɔ́ɔ gá yɛ́ gá go bonya, budúgú tɔ́nɔ caŋa mmue[28].

¹³Gɔ́ɔ nnúunidemú, gámɛ go ɔ́bɔ ukelú yá gɛnɔŋɔ gɛ́ɛgɛ gɛ́ mbaá lɔmɔ́ gɛ́ fueŋe páábɔ́ naá mmoɛná yó dúmenye na bogaaga yó amɔ́: «Gɛdɔmbɔ makɔ́nɔ́! Gɛdɔmbɔ makɔ́nɔ́! Gɛdɔmbɔ makɔ́nɔ́ na batɔ ba cí, aŋa gɔ́ɔgɔ bɛɛ́ŋgɛlɛsɛ bá bádadɔ́ báaba bá síenemú bá gaá ná gɔnɔ́ go ómbɛda cɛ́bá sábɔ́.»