Read Nugunu Tóogio 9 Bible Online

Tóogio 9 - Nugunu bible

Tóogio 9

¹Ɛ́ŋgɛlɛsɛ ba gátáanɔ go ómbɛda cɛ́bá yɛhɛ́: gámɛ go ɛ́na hiotóti hímmue hɛ́ ɛ́da káfogana naá mmoɛná go nco go oba go cí. Gɔ́ɔ bá hɛ́ fáamɔ́ ibuune há nobɛ́láa ná findímíi.

²Hiotóti go buune nobɛ́láa ná findímíi, ncóki go ɛ́da go dúugule, sɛ́ fóanana sɛ́ɛsɛ sá gɛantáanta gá gɛfóánɛ́ná íyuke[29]. Buisí na mefúnyi go gunde mbíno aá mbíno.

³Naá ncóki sɛ́ɛsɔ, bɛatatalá go húmene, bɛ́ báá saáa cí. Bá báá gó bɛ́ fáa bogaaga aŋa bɔ́ɔbɔ bá ŋgɛŋá[30].

⁴Bá báá bɛ́ legé goŋaá bɛ́ dɛ hóámá bɛ́ dɛ séésídínyée mbínyí sá cí, akɛ́ magónɛ́dá, akɛ́ boɛ́tɛ mbɔ́dɔ ɛhanɛ́ɛ, kanɛ́ goana bɛ́ dóanana batɔ báaba bá mbaá lɔmɔ́ dobɔlɔ dábɔ́ kanɛ go bélinciginye na sɛtáma ya Asaŋa.

⁵Bá dɛ mbá bɛ́ fáa bogaaga bá go óna batɔ, kanɛ́ bɛ́ bó óbigonyo makɔ́nɔ́ ɛfɛ́ ɛtáanɔ súge. Mbɔ́dɔ ya go óbigonyo gá bɛ́, gó lɛ́ aŋa goɔ́bɛgɔnɔ gá mɔtɔ mɔ́ɔnyɔ ŋgɛŋá ɛ báá ná mo dóá.

⁶Naá medúgú mɔ́ɔmɔ, batɔ bá ŋga fúmbée nigúe, kanɛ́ bá dɛ ná nɛ́ gíde. Bá ŋga maamánáa go gúenene, kanɛ́ nigúe nɛ́ ŋga bó ɛ́dɛ́ná halaháláa[31].

⁷Bɛatatalá bɛ́ mba lɛ́ aŋa nnyádɛ sá gedíelú go bidé. Naá ɛdóɛ ya bɛ́ mmoɛná, bó mba lɛ́ aŋa modaada má góolo, mosío má bɛ́ aŋa máama má batɔ.

⁸Bɛ́ mba lɛ́ na bɛntaálala bá cóɛ aŋa sɛ́ɛsɛ sá bakɔ́dɔ, tɔ́nɔ oŋínyo yá bɛ́ aŋa yáaya yá ŋgoyóŋo.

⁹Mokinékiné má bɛ́ mó mba lɛ́ aŋa boɛgɛ́náalú na bɛla bá bɛkɔ́ŋɔ, tɔ́nɔ biondónyóo bá bɛbaga bá bɛ́ bɛ́ mba lɛ́ aŋa bá bɛkáládá bá bidé bɛ́ɛbɛ gitúu gá nnyádɛ gɛ́ gɔ́gɔmɔ́[32].

¹⁰Bɛ́ mba lɛ́ na ɛŋɔnyɛ naá imío ya bɛ́ aŋa ŋgɛŋá, tɔ́nɔ naá imío ya bɛ́, bɛ́ mba lɛ́ bɛ́ bɛanana bogaaga bá go óbigonyo batɔ ɛfɛ́ ɛtáanɔ súge.

¹¹Ufuŋe yá bɛ́ yó mbaá lɔmɔ́ ɛ́ŋgɛlɛsɛ ba nobɛ́láa ná findímíi, ufíno yɛ́hɛ́ na nohébelée Abádɔŋɔ, na nogɛlɛ́gɛ bá amɔ́ Apólɛɔŋɔ[33].

¹²Gɛɛmba gá busío gɛ́ á dómbá, bɛ́andɛ́ gɔnɔ́ bɛ́ úlene.

¹³Ɛ́ŋgɛlɛsɛ ba gátáanɔ na gémmue go ómbɛda cɛ́bá yɛhɛ́. Gámɛ go ɔ́bɔ ukelú yó húmene naá modɔ́ŋɔ múnni naá gɛdálɛ́ná gá góolo gɛ́ɛgɛ gɛ́ mbaá lɛ naá busío bá Asaŋa.

¹⁴Yó mba lɛ́ yó oyanɛna ɛ́ŋgɛlɛsɛ ba gátáanɔ na gémmue mɔ́ɔnyɔ a mbaá lɔmɔ́ na cɛ́bá yó amɔ́: «Súdúne bɛɛ́ŋgɛlɛsɛ bá bénni báaba bá lɔ́mɔ́ gódá gódá magala naá gɛantá gá osaá yɔ́ɔyɔ Ɛfaláata.»

¹⁵Gɔ́ɔ bá súdunemú bɛɛ́ŋgɛlɛsɛ bá bénni báaba bá mbaá ŋá bá ná lɛ́ pɛnɛ́ɛ go buisí moánɛ; Asaŋa mɔ́ɔ a mbaá sómbá nnyómá, ofɛ́, buisí na gigúlí moánɛ, go go óna gɛdadɔ́ɔ gímmue gá batɔ.

¹⁶Ombanɔ yá benuí bidé báaba naá nnyádɛ yó mba lɛ́ bamɛlɛɔ́ŋɔ mantɛdɛ máandɛ́, ombanɔ yɔ́ɔyɔ mmbɔɔ́ ɔ́bɔ́ yɔ́yɔ́ɔ.

¹⁷Náana gɔ́ɔ mbɛɛ́ ɛ́ná naá giínigie gámɛ, nnyádɛ na batɔ báaba kɔ́ɔ: bɛla bá bɛkɔ́ŋɔ bɛ́ɛbɛ bá mbaá lɛ na bɛ́ bɛ́ mba lɛ́ bɛ́lɛ́ŋɛ́ bɛlɛŋɛ, bulúme bulúme, ndusú ndusú. Ɛdóɛ ya nnyádɛ ɛ mba lɛ́ aŋa yɛ́ɛyɛ ya ŋgoyóŋo, eŋgúdé yá sɛ́ yá mba lɛ́ yá noda íyuke, ncóki na ndusú.

¹⁸Na bɛɛmba bá bɛ́dadɔ́ bɛ́ɛbɔ bɛ́ lɔ́mɔ́: íyuke, ncóki na ndusú, mɔ́ɔmɔ eŋgúdé yá nnyádɛ yá nodamɔ́, gɔ́ɔ gɛdadɔ́ɔ gá batɔ bá cí gɛ́ mbaá fúé.

¹⁹Bogaaga bá nnyádɛ bó lɔ́mɔ́ naá eŋgúdé yá sɛ́ na naá imío ya sɛ́. Mammana, imío ya sɛ́ ɛ lɛ́ aŋa nnyɔ́gɔ, ɛ lɛ́ na ɛdóɛ yɛ́ɛyɛ ɛ lɔ́mɔ́ ba go óbigonyo batɔ.

²⁰Kanɛ́ batɔ báaba bá mbaá síéné, báaba bɛɛmba bɛ́ lɔ́mɔ́ lɔbɛ́nɔ́ɔlú kanɛ go bó óná go inye go núgie gɛɔyɔ gábɔ́ na macaŋa mábɔ́. Bá bɛ́ɛ́ ɛ́dánáa naá busío na go búlugenye bɛgáda bá biliíli, na moɔcɔ dúnéelú na gɛkɔ́ŋɔ gá góolo, muinyí, bɔlɔ́ŋɔsɛ, ɛ́na lí na adánɛ́ na mɛɛ́tɛ. Moɔcɔ mɔ́ɔmɔ mó lɔ́mɔ́ mó do ɛ́nánɛ́náa, mó do ɔ́bɔ́nɔ́ɔ, mó do ɛndáa[34].

²¹Bá bíí ínyé go dɛ́ɛna gɛɔyɔ gábɔ́ gá ŋgónana na gá gɛdɔ́ɔ, gɛɔyɔ gá hanyɔ́ na gá buíbi.