Read Nyamwezi Mateo 19 Bible Online

Mateo 19 - Nyamwezi bible

Mateo 19

¹Na yakwilaga aho Yesu wamalaga mihayo yeniyi, wafumaga ku Galilaya na wafikaga kwigunguli lya Uyahudi kumwambu na Yordani.

²Na mbuto ningi zya vanhu vamulondaga, na wavapizaja kwenuko.

³Na vamwegelaga Vafarisayo, vamugemaga, vuhaya, Kinahe, mugosya ali na luhusa kumutavula muke wakwe ku nguno zyose?

⁴Alisi witavukaga, uhaya, Mukasomile ati Mutundi hambuki watundaga mugosya na mukima? na wahaya,

⁵Kunguno yeniyi mugosya akumuleka ise na nina na akudimana na muke wakwe, navo vavili vakuvi muvili gumo.

⁶Sisyo vakavile hangi vavili, sumbwa muvili gumo. Kunguno yeniyi genayo Mulungu wagadimanaja, munhu

⁷akagalekanye ngʼo. Valimuwila, Kungunoki haho Mose walagilaga kumupa cheti cha kutina vukwele na

⁸kumutavula? Alivawila, kunguno ya vulambu wa myoyo yinwe Mose wamutavulilaga inwe kuvaleka vake vinwe; alisi kufuma mbuki yavage yikakwilile sisyo.

⁹Alisi ndimuwila inwe, homwene akumutavula muke wakwe, kolaga kunguno ya vusihya, na akumutola ungi alisihya; na homwene alimutola mukima atavulilwe alisihya.

¹⁰Vahemba valimuwila, Ulu yili syenisyo na mugosya na muke wakwe yikavelile kutola.

¹¹Nawe wavawilaga, Vakavile vose valikovola kugumanicha muhayo gwenugu sumbwa venava vapivagwa kugumanicha.

¹²Kwisi valiho vagumba va vugumba wa mbyalanwa, na valiho hovene vagumbahiwa na vanhu, na valiho vangi hovene vigumbahya venekili kunguno ya vutemi wʼilunde. Homwene alikovola kuyimanicha nguno, ayimaniche.

¹³Haho vamuletelaga vana vado kigele avatulile makono na avalombele.

¹⁴Alisi vahemba vavadakilaga. Alisi Yesu wayombaga, Muvaleke vana vado na mukavahangilizye ngʼo kwiza kuwane, kwisi ku va mutindo

¹⁵gwenugu vutemi wʼilunde vuliho. Na wavatulilaga venava makono, na wafumagako.

¹⁶Na umo wamwegelaga na wahaya, Muhembeki musoga, nite kasoga ki, kigele napiwe vuzuvuku wa

¹⁷hanahana? Alisi wamuwilaga, Kuki ulimbuzya kunguno ya kasoga? Aliho umo duhu musoga. Alisi ulu ulikova kwingila mu vuzuvuku, uzimazye ngʼhama.

¹⁸Alimuwila, Ngʼhama ki? Yesu wayombaga, Ukavulage ngʼo, ukasihye ngʼo, ukive ngʼo, ukave ngʼo musangilwaho wa vulamba,

¹⁹umukuzye nso na noko, na umutogwe mwiyo kitisi uliwitogwa veve mwenekili.

²⁰Musumba alimuwila, Gose genaya nagamazaja, nasigazyaki?

²¹Yesu wamuwilaga, Ulu ulikova kuvi mumazya gose, uje ukaguzye gose ago uli nago na uvape vapina, na ukuvi na nsavo nhanya mwilunde; na wize undonde.

²²Alisi aho musumba wigagwa muhayo gwenugu, wajaga na misayo, kwisi wavagi na nsavo ningi.

²³Alisi Yesu wavawilaga vahemba vakwe, Loleyene ndimuwila inwe ati, kili kitimbu ku musavi kwingila

²⁴mu vutemi wʼilunde. Hangi ndimuwila inwe ati, kili changu ku ntwangavulende yingile mu linso lya lusindano kukila musavi ingile mu vutemi wa Mulungu.

²⁵Alisi aho vahemba vigagwa muhayo gwenugu, vakumaja munogwene na vayombaga, Haho nani alikovola

²⁶kupiziwa? Alisi Yesu wavalolaga, uvawila, Ku vanhu kili kigaka, alisi kumwa Mulungu yose yilikovolwa.

²⁷Haho Petro witavukaga na wamuwilaga, Lolaga, iswe twagalekaga gose na twakulondaga veve, haho tulapiweki?

²⁸Yesu wavawilaga, Yalole ndimuwila inwe ati ha vutundwa vupya wa liwelelo, aho Mwana wa Munhu akwikala kwisumbi lya lukumo lwakwe, inwe hovene mwandondile mukwikala ku masumbi ikumi na avili na kuvayangula va magongo ikumi na avili ga Israeli.

²⁹Na homwene walekaga manumba ninga vaduguye ninga valumbuye ninga ise ninga nina ninga vana ninga migunda kunguno ya lina lyane, akongeziwa kingi muno na akusalika vuzuvuku wa hanahana.

³⁰Alisi vingi va mbele vakuvi va mhelo, na va mhelo vakuvi va mbele.