Read Nyamwezi Mateo 2 Bible Online

Mateo 2 - Nyamwezi bible

Mateo 2

¹Alisi aho Yesu wavyalagwa mu Betlehemu mu Uyahudi mu nsiku zya mutemi Herode, vizaga valola masonda va ku kiya ku Yerusalema vahaya,

²Ali kuhe mwenuyu wavyalilwe mutemi wa Vayahudi? kwisi twaliwine isonda lyakwe mu kiya na twizaga kumukuvila.

³Alisi mutemi Herode, aho wayigagwa, wakangagwa na vana Yerusalema vose hamohene nawe.

⁴Na wavakumingaga vose vahozya, vahanya na vamanicha fitabu va muchalo, wakovaga mhola kuwavo Kristo alavyalilwe kuhe?

⁵Navo vamuwilaga, Mu Betlehemu mu Uyahudi, kwisi hosyene yatonilwe na mufumbuzi,

⁶Naʼho Betlehemu mu nsi yamwa Yuda Ukavile mudo ngʼo mugati na manangwa gamwa Yuda, Kwisi kuwako akufuma mwami homwene akuvasunga vanhu vane Visraeli.

⁷Haho Herode wavitanaga valola masonda kumhelo na wawilagwa navo itungo ki isonda ligelaga.

⁸Na wavatumizaja ku Betlehemu na uhaya, Jagi, mukapelelezye sisoga kunguno ya mwana mwenuyo, na ulu mwamuvona, mundetele mhola, kigele nene mwene naje kukamukuvila.

⁹Alisi aho vamwigagwa mutemi vajaga, nʼisonda holyene valivonaga mu kiya lyavatongelaga kusika lyafikaga na limaga higulya henaho wavagiho mwana.

¹⁰Na aho valivonaga isonda vadehaga na kudeha kuhanya muno.

¹¹Na aho vingilaga mu numba vamuvonaga mwana na nina Maria, na vagwaga hasi vamukuvilaga; vatungulaga nsavo zyavo na vamupaga fipanwa,

¹²dhahabu, uvumba na manemane. Na aho vahugulagwa mu kiloti ati valeke kusyokela kumwa Herode, vasyokelaga nzila yingi ku chalo chavo.

¹³Alisi aho avo vajaga, malaika wamwa Guku wigelaga kumwa Yosefu mu kiloti na wayombaga, Vukaga, umusole mwana na nina na upelele ku Misri na wikale kwenuko kusika ndakuwile, kwisi Herode alimukova mwana,

¹⁴kigele amuvulage. Na wavukaga na wamusolaga mwana na nina ha vuziku na wajaga ku Misri.

¹⁵Na wavagiko kwenuko kusika Herode wafwaga, kigele muhayo gufikile gwayombilwe na Guku ku mufumbuzi, homwene alihaya, Kufuma ku Misri namwitanaga mwana wane.

¹⁶Aho Herode wavonaga ati wayengilwe na valola masonda wakilagwa munogwene, na watumizaja kuvavulaga vana vagosya vose mu Betlehemu na mu magunguli ga bihi kufuma va myaka ivili kusika vadovado, kitisi vʼitungo lyenilo witozaja na valola masonda.

¹⁷Sisyo yakwilaga kitisi yayombilwe na mufumbuzi Yeremia homwene alihaya,

¹⁸Muzwi gwadegelekagwa mu Rama, Kililo na makungwi mingi Rahele alivalilila vana vakwe na alikana kuhulikiwa, kwisi vali haduhu.

¹⁹Alisi aho Herode wafwaga, malaika wamwa Guku wigelaga mu kiloti kumwa Yosefu mu Misri na wayombaga,

²⁰Vukaga, umusole mwana na nina na uje ku chalo Israeli, kwisi vafwaga venavo hovene vayikovaga myuye ya mwana.

²¹Na wavukaga na wamusolaga mwana na nina na wajaga ku chalo cha Israeli.

²²Alisi aho wigagwa ati Arkelao watemaga mu Uyahudi ha lwande lwamwa ise Herode, wogohaga kuja kwenuko, na aho wahugulagwa mu kiloti wajaga ku lwande lwa Galilaya.

²³Na wafikaga na wikalaga mu kaya yilitanwa Nazareti, kigele yifikile kitisi yayombilwe na vafumbuzi ati, akwitanwa Munazareo.