Read Nyamwezi Mateo 20 Bible Online

Mateo 20 - Nyamwezi bible

Mateo 20

¹Kwisi vutemi wʼilunde vulimwikola munhu mwene numba homwene wafumaga kuja kukavakova vatumami ku mugunda gwakwe gwa mizabibu.

²Alisi aho wapatanaga na vatumami ku lusiku denari yimo wavafilaga ku mugunda gwakwe.

³Na wafumaga saa tatu na wavavonaga vangi vimile hʼigulilo vakavile na

⁴milimo, na alivawila, Jagi inwe vene ku mugunda gwane gwa mizabibu, na icho kiligelanila nkumupa inwe. Na vajagako.

⁵Wafumaga hangi saa sita na saa kenda na witaga sisyo savasava.

⁶Na saa ikumi na kamo wafumaga na wavasangaga vangi vimile, na alivawila, Kuki mulima henaha limi zelele vuduhu

⁷milimo? Valimuwila, Kwisi kuduhu munhu watutonaga. Alivawila, Jagi inwe vene ku mugunda gwane gwa mizabibu.

⁸Alisi hamhindi guku wa mugunda gwa mizabibu wamuwilaga musimamizya wakwe, Uvitane vatumami na uvape musyahala gwavo; uvukizye kufuma va mhelo kusika va mbele.

⁹Na aho vizaga vʼitungo lya saa ikumi na kamo vapivagwa kila umo denari yimo.

¹⁰Na va mbele aho vizaga viganikaga ati vakupiwa ningi; navo vene vapivagwa kila umo denari yimo.

¹¹Alisi aho vapivagwa vamwingʼungʼulilaga mwene

¹²numba na vayombaga, Venava va mhelo vatumamaga saa yimo duhu, na wavagelanizaja niswe hovene twakoyaga muno limi lyose kunguno ya milimo na vusevu wa limi.

¹³Alisi wamwitavukaga umo mugati navo na wahaya, Mwichane, nkakululunganizye, ukapatanile na

¹⁴nene ku denari yimo? Solaga chako na jaga! Alisi nene ndikova kumupa wa mhelo savasava kitisi veve.

¹⁵Ninga nkavile na chane kwita na nsavo yane kitisi ndikova? Ninga uli na ivuva kunguno nene ndi musoga?

¹⁶Sisyo va mhelo vakuvi va mbele, na va mbele vakuvi va mhelo. Kwisi vingi vitanilwe, alisi vado vasogolilwe.

¹⁷Na aho Yesu walinaga kuja ku Yerusalema, wavasolaga venavo ikumi na vavili kumhelo, na mu nzila

¹⁸wavawilaga, Lolagi, tulilina kuja ku Yerusalema, na Mwana wa munhu akutavulwa mu makono ga vahozya vahanya na ga vamanicha fitabu, na vakumutema kitanga cha lufu.

¹⁹Na vakumupana ku vapagani ayeywe na atulagulwe milanga na akomelwe ku musigiti, na lusiku lwa vudatu akuhembuka ku lufu.

²⁰Haho wamwegelaga nina wa vana vamwa Zebedayo hamohene na vana vakwe na vamusukambilaga na vamulombaga muhayo.

²¹Nawe wamuvuzya, Ulikovaki? Alihaya, Uyombe ati venava vana vane vavili vikaleho umo ha mulila gwako na mwiye ha lumoso lwako mu vutemi wako.

²²Alisi Yesu witavukaga na wahaya, Mukamanikizye cheniki mulilomba. Mulikovola kunwela kineneko icho nkunwela nene?

²³Valimuwila, Tulikovola. Alivawila, Ahene, kineneko chane mukukinwa, alisi kwikala ha mulila gwane na ha lumoso lwane yikavile milimo yane kuvapa sumbwa kuliho ku venavo vatulililwe vuliko na Vava wane.

²⁴Alisi aho venava ikumi vigagwa vavakililagwa venavo vavili va vudugu.

²⁵Alisi Yesu wavitanaga hawakwe uhaya, Mulimanicha ati vatemi va machalo valivatema

²⁶na nguzu, na vahanya valivapinehezya. Yileke kuvi sisyo mugati ninwe, alisi homwene alikova kuvi muhanya mugati ninwe,

²⁷ave mukumba winwe; na homwene alikova kuvi wa mbele mugati ninwe ave musese winwe;

²⁸kitisi Mwana wa munhu akizile kutumamilwa sumbwa kutumamila na kwipana mwenekili kuvi vukomozi ku vingi.

²⁹Na aho vavagi valifuma ku Yeriko mbuto ya vanhu vingi vamulondaga.

³⁰Na vahofu vavili hovene vavagi vikalile ha nzila, aho vigagwa ati Yesu alivita, vahamukaga valihaya, Guku, utuvonele kisa, mwana wamwa Davidi!

³¹Alisi vanhu vavadakilaga vahulike, alisi vahamukaga munogwene valihaya, Guku, utuvonele kisa, mwana wamwa Davidi!

³²Na Yesu wimaga na wavitanaga, uhaya, Mulikova namwitileki inwe?

³³Valimuwila, Guku, minso giswe gatunuziwe.

³⁴Alisi Yesu wasatiwa lusungu kuwavo na wagakumaja minso gavo, na itungo lili vavonaga hangi na vamulondaga.