Read Nyamwezi Mateo 26 Bible Online

Mateo 26 - Nyamwezi bible

Mateo 26

¹Na yakwilaga aho Yesu wamalaga kuyomba mihayo

²yose yeniyi, wavawilaga vahemba vakwe, Mulimanicha ati hanuma na nsiku ivili Pasaka yikuviho, na Mwana wa Munhu akufumiwa kukomelwa ku musigiti.

³Haho vahozya vahanya na vanamhala va chalo vivilingaga mu ngomwa ya muhozya muhanya, lina

⁴lyakwe Kayafa, na valomaga hamohene ndaka ya kumudima Yesu na masala ga vuyengani na vamuvulage.

⁵Alisi vayombaga, Ngʼo ha sikukulu, kwigela ngʼo vugome vuvuke mugati na vanhu.

⁶Na aho Yesu wavagimo mu Betania mu numba

⁷yamwa Simoni wa mbizi, mukima umo wamwegelaga na nsupa ya alabastro yokalile maguta masoga malambu mupango, na wagapumpumulilaga ku mutwe gwakwe aho wavagi ikalile hakulila.

⁸Alisi aho vahemba vavonaga vakilagwa, vuhaya, Kuki vutagaguzi wenuvu?

⁹Kwisi genaya gakovolaga kuguziwa ku mupango muhanya na kupanwa ku vapina.

¹⁰Aho Yesu wayimanikaja, wavawilaga, Kuki mulimusatya mukima mwenuyu?

¹¹Wanitilaga mulimo musoga. Kwisi nsiku zyose muli navo vapina hamohene ninwe, alisi nene mukavile nane nsiku zyose.

¹²Kwisi mu kugapumpumulila maguta genaya ku muvili gwane, wambezaja tayari ha kuzikwa kwane.

¹³Yalole ndimuwila inwe, kosekose mu liwelelo uko Mhola yeniyi ya Chelu yikutaniziwa, gakuyombwa na genaya uyu witaga kumwizukila.

¹⁴Haho umo wa va ikumi na vavili, lina lyakwe Yudasi Iskariote, wajaga ku vahozya vahanya, uhaya,

¹⁵Mulikova kumpaki nane nkumugamba kuwinwe? Navo vamupimilaga fedha makumi adatu.

¹⁶Na kufuma henaho wakovaga itungo isoga, kigele amugambe.

¹⁷Ha lusiku lwa mbele lwa mikate yikatumbile vahemba vamwegelaga Yesu, vuhaya, Ulikova tukuvezezye kulya Pasaka kuhe?

¹⁸Nawe wayombaga, Mwingile mu kaya kumwa mbati na mumuwile, Muhembeki aliyomba, Itungo lyane lyegelaga, nkuvezya hawako Pasaka hamohene na vahemba vane.

¹⁹Na vahemba vavezaja kitisi Yesu wavalagilaga; na vavezaja Pasaka. Na hamhindi wikalaga hakulila na vahemba vakwe ikumi na vavili.

²⁰Na aho vavagi valilya wayombaga,

²¹Yalole ndimuwila inwe, umo mugati ninwe akungamba.

²²Na vasayaga munogwene na vavukizaja kumuvuzya

²³umo umo, Guku, imba nene? Nawe witavukaga, uhaya, Homwene alikozya hamohene na nene mu kiseme akungamba.

²⁴Mwana wa Munhu alija nzila yakwe kitisi yatonilwe kunguno yakwe, alisi musyolo ku munhu mwenuyu Mwana wa Munhu aligambwa

²⁵nawe, yilimuvelela uyu ulu mbe akavyalilwe. Yudasi homwene wamugambaga witavukaga, uhaya, Imba nene, Rabi? Nawe alimuwila, Hoveve wayombaga.

²⁶Aho vavagi valilya Yesu wagusolaga mukate, wagudosaja, wagumegulaga na wavapaga vahemba vakwe, uhaya, Solagi, mulye, gwenugu guli muvili gwane.

²⁷Na wakisolaga kineneko, walumbilaga kalumbilo na

²⁸wavapaga, uhaya, Nwelagi cheniki inwe vose, kwisi hogene gali magazi gane ga kuswana kupya hogene galizwikiwa ku vingi kugatondola mavukenaguzi.

²⁹Ndimuwila inwe, nene kunwa ngʼo hangi ku fisumo fya mizabibu kusika lusiku lwenulo nkunwa fipya mu vutemi wamwa Vava.

³⁰Na aho vamalaga kwimba, vafumaga kuja ku Lugulu lwa Maguta.

³¹Haho Yesu wavawilaga, Inwe vose mukungayilizya mu vuziku wenuvu, kwisi yatonilwe, Nkumutula mudimi na ngʼholo zʼidale zikusambaziwa.

³²Alisi hanuma na kuhembuka kwane nkumutongela inwe kuja ku Galilaya.

³³Petro witavukaga na wamuwilaga, Nulu vose vakukugayilizya veve, nene kukugayilizya ngʼo na hado ngʼo.

³⁴Yesu wamuwilaga, Yalole ndikuwila veve, mu vuziku wenuvu hambele ikungulume likuhila veve ukunikana kadatu.

³⁵Petro alimuwila, Ninga ulu nene nafwe hamohene naʼho nene kukwikana ngʼo na hado ngʼo. Na sisyo sisyene vahemba vose vayombaga.

³⁶Haho Yesu aliza hamohene navo henaho halitanwa Getsemane, na alivawila vahemba, Mwikale henaha aho ndija kunu kukalomba.

³⁷Na wavajanaga Petro na venavo vana vavili vamwa Zebedayo na wavukizaja kusaya na kukangwa.

³⁸Haho wavawilaga, Myuye yane yilikindwa muno na misayo kusika ha kufwa, mwikale henaha na mudile minso hamohene na nene.

³⁹Na wajaga kumbele hado, wakundamaga ha vusyu wakwe na walombaga, uhaya, Vava, ulu yakovolwa, haho kineneko cheniki kimbitile, alisi ngʼo kitisi nene ndikova, sumbwa kitisi veve ulikova.

⁴⁰Na aliza ku vahemba vakwe uvasanga valalile tulo, na wamuwilaga Petro, Sisyo inwe mukakovolile kudila minso saa yimo

⁴¹hamohene na nene? Mudile minso na mulombe, kwigela ngʼo mwingile mu mahumbiko. Ahene, roho yilitogwa, alisi muvili gukavile na nguzu.

⁴²Hangi wajaga ka vuvili, walombaga uhaya, Vava, ulu kineneko cheniki kikakovolile kumbitila, sumbwa nene nanwe, haho kikowa chako kikwile.

⁴³Na wizaga uvasanga hangi

⁴⁴valalile tulo, kwisi minso gavo gatimbaga. Na wavalekaga, wajaga hangi, walombaga ka vudatu na wayombaga hangi muhayo gwenugu gwene.

⁴⁵Haho aliwiza ku vahemba na alivawila, Mulale tulo duhu na mwisuhye! Lolagi, itungo lyegelaga, na Mwana wa Munhu alifumiwa mu makono ga vakenaguzi.

⁴⁶Muvuke, tuje, lolagi, mugambi wane wegelaga bihi.

⁴⁷Aho atali aliyomba, lolaga, Yudasi wizaga, umo wa venava ikumi na vavili, na hamohene nawe mbuto ya vanhu vizanile malupanga na mavuhili, vafumile ku vahozya vahanya na vanamhala va chalo.

⁴⁸Alisi uyu mugambi waliwavapa lumeho, uhaya, Uyu nkumunonela, sanga homwene, mumudime.

⁴⁹Na itungo lili wamwegelaga Yesu, uhaya, Ndikugisya Rabi, na wamunonelaga.

⁵⁰Yesu wamuwilaga, Mwichane, kuki wizaga henaha? Haho avo vegelaga na vagololaga makono gavo kumwa Yesu na vamudimaga.

⁵¹Na lolaga, umo wa venavo vavagi hamohene na Yesu wagololaga kukono kwakwe, wasopolaga lupanga, wamutulaga mukumba wa muhozya muhanya na wamutinaga itwi.

⁵²Haho Yesu wamuwilaga, Somekaga lupanga lwako mwigaya, kwisi vose validima lupanga vakuzimiziwa na lupanga.

⁵³Ninga uliganika ati nkakovolile kumulomba Vava nawe akundetela itungo lili vamalaika maligioni

⁵⁴kukila ikumi na avili? Alisi haho lumehoki vutone

⁵⁵vufikile ati, kolaga yikwile sisyo? Na mwitungo lyenilo Yesu wavawilaga va mbuto ya vanhu, Kitisi ha musambo inwe mwafumaga na malupanga na mavuhili kundima; nsiku zyose nikalage mwisengelo ndihembeka, na mukandimile.

⁵⁶Alisi gose genaya gakwilaga, kigele mavutone ga vafumbuzi gafikile. Haho vahemba vose vamulekaga na vapelaga.

⁵⁷Alisi venavo vamudimaga vamufilaga kumwa muhozya muhanya Kayafa, henaho vamanicha fitabu na vanamhala vivilingaga.

⁵⁸Na Petro wamulondaga hanuma kule hado kusika mu ngomwa ya muhozya muhanya, na wingilaga hamohene na vakumba, ayivone mhelo ya mihayo.

⁵⁹Na vahozya vahanya na ivanza lyose vakovaga vusangilwaho wa vulamba kwigulya na Yesu,

⁶⁰kigele vamuvulage, alisi vakavuwine, nulu vasangilwaho vingi va vulamba vavukaga.

⁶¹Haho vavili vegelaga, vuhaya, Mwenuyu wayombaga, Ndikovola kulibomola isengelo lya Mulungu na kulizenga hangi mu nsiku idatu.

⁶²Na muhozya muhanya wavukaga na wamuwilaga, Ukavile kwitavuka? Kinani

⁶³genaya avo valisangilwaho kwigulya naʼho? Alisi Yesu wahulikaga sele. Na muhozya muhanya witavukaga, umuwila, Ndikulahilizya kumwa Mulungu muzuvuku, utuwile iswe ulu veve uli Kristo, Mwana wa Mulungu.

⁶⁴Yesu wamuwilaga, Veve wayombaga, hangi ndimuwila inwe, kufuma lelo mukumuvona Mwana wa Munhu ikalile ha mulila gwa nguzu na izile mu malunde gʼilunde.

⁶⁵Haho muhozya muhanya wayitandulaga myenda yakwe, uhaya, Ulimufusa Mulungu!

⁶⁶Tulifunda hangi vasangilwaho vangi? Lolagi, lelo mwigagwa ifusano lyakwe, muliganikaki?

⁶⁷Navo vitavukaga, vuhaya, Alitondwa kufwa. Haho vamutugilaga mu vusyu na vamutulaga mapi,

⁶⁸na vangi vamutulaga milanga, vuhaya, Utufumbulile Kristo, nani wakutulaga.

⁶⁹Na Petro wikalaga hanze mu ngomwa, na mukumba mukima wamwegelaga, uhaya, Naʼho mwene wavagi hamohene na Yesu muna Galilaya.

⁷⁰Alisi uyu wakanaga hambele na vose, uhaya, Nene nkamanikizye cheniki uliyomba.

⁷¹Na aho wafumaga hanze ha muvita, ungi mukima wamuvonaga na wavawilaga avo vavagiho henaho, Mwenuyu wavagi hamohene na Yesu wa Nazareti.

⁷²Na uyu wakanaga hangi na mulahi, Nkamumanikizye munhu mwenuyu.

⁷³Na hanuma na katungo kado avo vavagi vimile bihi vegelaga na vamuwilaga Petro, Loleyene, veve uli umo wa venavo, kwisi kiyombele chako kilikufumbula.

⁷⁴Haho uyu wavukizaja kwilahilizya na mulahi, Nene nkamumanikizye munhu mwenuyu; na itungo lili ikungulume lyahilaga.

⁷⁵Na Petro wagwizukilaga muhayo ugo Yesu wayombaga, Hambele ikungulume likuhila, veve ukunikana kadatu. Na wafumaga hanze na walilaga munogwene.