Read Nyamwezi Mateo 5 Bible Online

Mateo 5 - Nyamwezi bible

Mateo 5

¹Alisi aho wagavonaga mavuto ga vanhu, walinaga ku lugulu na wikalaga; na vahemba vakwe vamwegelaga.

²Na wavukizaja kuvahembeka, uhaya,

³Velukilwa vapina mu moyo, kwisi vutemi wʼilunde vuli kuwavo.

⁴Velukilwa venavo valisaya, kwisi vakuhulikiwa.

⁵Velukilwa vadekanu, kwisi vakulisalika liwelelo.

⁶Velukilwa venavo vali na nzala na nota ya kupiwa vugololoku, kwisi vakwigutiwa.

⁷Velukilwa venavo vali na kisa, kwisi vakuvonelwa kisa.

⁸Velukilwa venavo vali na moyo gwa pe, kwisi vakumuvona Mulungu.

⁹Velukilwa vaswanya, kwisi venavo vakwitanwa vana va Mulungu.

¹⁰Velukilwa venavo validukiwa kunguno ya vugololoku, kwisi vutemi wʼilunde vuli kuwavo.

¹¹Mwelukilwa inwe ulu valimufusa na valimuducha na valimulembekezya inwe mihayo mivi ya vulamba kunguno yane.

¹²Mudehage na mwihalalage, kwisi vusyokeziwa winwe vuliho vuhanya mwilunde, kwisi syenisyo vavadukaja vafumbuzi hovene vamutongelaga inwe.

¹³Inwe muli munyu gwa liwelelo. Alisi ulu munyu gwasukile, gutulilweki kigele guvele? Gukavile na mupango hangi, sumbwa gutagilwe hanze na gupandagilwe na vanhu.

¹⁴Inwe muli lumole lwa liwelelo. Kaya hoyene yili higulya na lugulu yikakovolilwe kuviswa.

¹⁵Ninga kuduhu munhu alivacha tala na kuyikundikizya nʼisyelo, alisi aliyitula higulya nʼifiga, na sisyo yilivezya vose valimo mu numba.

¹⁶Sisyo lumole lwinwe luvake hambele na vanhu, kigele vayivone milimo yinwe misoga, na vamukumuche Vava winwe homwene ali mwilunde.

¹⁷Muleke kwiganika ati nizaga kuzizimangucha ngʼhama ninga vafumbuzi, nkizile kuzizimangucha sumbwa kuzimazya.

¹⁸Kwisi loleyene ndimuwila inwe, kusika ilunde na liwelelo gakuzimanguka ninga kalumeho kado ninga kabado kamo mu ngʼhama kuzimanguka ngʼo kusika gose gafikilile.

¹⁹Haho uyo homwene aliguvinza ninga gumo gwa mikumo yeniyi mido na alivahembeka vanhu syenisyo, akwitanwa mudo mu vutemi wʼilunde; alisi uyo homwene aliyimazya na aliyihembeka, akwitanwa muhanya mu vutemi wʼilunde.

²⁰Kwisi ndimuwila inwe ati, ulu vugololoku winwe vukakilile wenuvo wa vamanicha fitabu na Vafarisayo, inwe kwingila ngʼo na hado ngʼo mu vutemi wʼilunde.

²¹Mwigilwe kitisi va kale vawilagwa, Ukavulage ngʼo, alisi homwene alivulaga akutemelwa kitanga.

²²Alisi nene ndimuwila inwe, Homwene alimukilwa muduguye vuduhu nguno, akutemelwa kitanga; na homwene alimuwila muduguye: Raka, yilimudima kuyangulwa hʼivanza; na homwene aliyomba: Veve mufwizilwa, yilimudima kutagilwa mu moto gwa hanahana.

²³Ulu haho ulifumya kalumbilo kako hakuhozezya na ulizukila ati muduguyo ali na muhayo kwigulya naʼho,

²⁴uleke kalumbilo kako hakuhozezya na uje hambele kukikondela na muduguyo, na haho usyoke na ufumye kalumbilo kako.

²⁵Wikondele wangu na mukandi wako utali uli nawe mu nzila, kwigela ngʼo mukandi akufumye ku muyanguzi, na muyanguzi akukufumya ku mulugaluga na ukutagilwa mu kifungo.

²⁶Loleyene ndikuwila, veve kufuma ngʼo na hado ngʼo kusika walinaga ipesa lya mhelo.

²⁷Mwigilwe ati yayombilwe, Ukasihye ngʼo.

²⁸Alisi nene ndimuwila ati, Homwene alimwikomya mukima na kumutamanilwa, wamalaga kukenagula nawe mu moyo gwakwe.

²⁹Alisi ulu linso lyako lya mulila lilikuvonya, ulifumye na ulitage, kwisi yilikuvelela ulu kimo cha fivalango fyako kilizimila, kukila muvili gose gutagilwe mu moto gwa hanahana.

³⁰Na ulu kukono kwako kwa mulila kulikuvonya, ukubute na ukutage, kwisi yilikuvelela ulu kimo cha fivalango fyako kilizimila, kukila muvili gwako gose gutagilwe mu moto gwa hanahana.

³¹Hangi yayombilwe: Homwene alimuleka muke wakwe amupe cheti cha kumuleka.

³²Alisi nene ndimuwila inwe, Homwene alimuleka muke wakwe sumbwa kunguno ya vusihya duhu alimwingizya mu vuyanzwa, na mwenuyo alimutola mukima atavulilwe alisihya.

³³Hangi mwigilwe kitisi va kale vawilagwa: Ukalahile ngʼo mulahi gwa vulamba, alisi uyimazye kumwa Mulungu milahi yako.

³⁴Alisi nene ndimuwila inwe, Mukalahile ngʼo ninga hado ngʼo, ninga ngʼo kwilunde, kwisi lili isumbi lya Mulungu.

³⁵Ninga ngʼo ku nsi, kwisi yili hakutulila magulu gakwe; ninga ngʼo ku Yerusalema, kwisi yili kaya ya mutemi muhanya.

³⁶Ninga ukalahile ngʼo ku mutwe gwako, kwisi ukakovolile kuvezya luzwili lumo kuvi lwa pe ninga lwa pi.

³⁷Alisi mihayo yinwe yive: ahene, ahene, ngʼo, ngʼo; alisi yose hoyene yilikila yeniyi yili ya kavi.

³⁸Mwigilwe ati yayombilwe: Linso ku linso na lino ku lino.

³⁹Alisi nene ndimuwila inwe, Mukiyanilizye ngʼo na kavi, alisi homwene alikutula kwitama lya mulila, umugalulile na lya vuvili.

⁴⁰Na mwenuyo homwene alikova kutongana naʼho hʼivanza na kusola nhanzo yako,

⁴¹umulekele nʼikoti lyene. Na homwene alikukungilizya kuja nawe maili yimo, uje nawe maili ivili.

⁴²Umupe mwenuyo alikulomba na ukamufutatile ngʼo mwenuyo alikova kukopa kuwako.

⁴³Mwigilwe ati yayombilwe: Umutogwe mwiyo na umugaye mwanisi wako.

⁴⁴Alisi nene ndimuwila inwe, Muvatogwe vanisi vinwe na muvadosaje venavo valimufwizila inwe; muvitilage kasoga venavo valimugaya inwe; muvalombelage vanavo valimusatya na valimuducha inwe,

⁴⁵kigele muve vana va Vava winwe homwene ali mwilunde; kwisi alifumya limi lyakwe kwigulya na vavi na vasoga, na alitwinya mbula kwigulya na vagololuku na vigomu.

⁴⁶Kwisi ulu mulivatogwa venavo valimutogwa inwe, vusyokeziwa ki muli navo? Kinahe,

⁴⁷ninga vʼihongo vakavile kwita syenisyo? Na ulu mulivagisya vadugu vinwe duhu, mulivavitaki vangi? Kinahe, ninga vapagani vakavile kwita syenisyo savasava.

⁴⁸Sisyo muve vasondo kitisi Vava winwe wa mwilunde ali musondo.