Read Nyamwezi Marko 3 Bible Online

Marko 3 - Nyamwezi bible

Marko 3

¹Na wingilaga hangi mu sinagogo mbati, na wavagiko munhu wagwa kukono.

²Na vamwitegelaga ulu akumupizya ha sabato, kigele vamuvule.

³Na uyu alimuwila munhu wagwa kukono, Wime henaha hagati!

⁴Na alivawila, Guli mwiko ha sabato kuvezya kasoga ninga kavi, kuzipizya myuye ninga kuzivulaga? Alisi avo vahulikaga sele.

⁵Na aho wavalolaga na kisila malwande gose, kwisi wasayaga kunguno ya kulendelezya myoyo yavo, wamuwila munhu mwenuyo, Ugolole kukono kwako!

⁶Na wakugololaga, na kukono kwakwe kwapilaga. Na Vafarisayo vafumaga, na itungo lili valomaga ndaka hamohene na Vaherode ya kumuvulaga.

⁷Na Yesu wasyokaga hamohene na vahemba vakwe ku nyanza, na mbuto nhanya ya vanhu kufuma Galilaya na Uyahudi vamulondaga,

⁸na kufuma Yerusalema na ku Idumaya na kumwambu na Yordani na ku magunguli ga Tiro na Sidoni vizaga kuwakwe, mbuto nhanya, aho vigagwa gose genaya witaga.

⁹Na wavawilaga vahemba vakwe ati, kunguno ya mbuto ya vanhu, wato vumo vuve tayari kuwakwe, valeke kumupinehezya.

¹⁰Kwisi wavapizaja vingi, syenisyo vose vasatu vamufitengʼhezaja muno, kigele vamukumye.

¹¹Na avo vavagi na migavo ya zoma vamupinehezaja na valilaga, vuhaya, Hoveve uli Mwana wa Mulungu.

¹²Na wavadakilaga, valeke kumukumucha.

¹³Na alilina ku lugulu na alivitana hawakwe venavo

¹⁴wavasogolaga, navo vizaga hawakwe. Na mugati navo wavalahaga ikumi na vavili vave hamohene

¹⁵nawe, kigele avatumizye kutanizya Mhola, na vave na vukovozi wa kuyifumya migavo.

¹⁶Na avo vavagi:

¹⁷Simoni homwene wamupaga lina lya Petro; na Yakobo, mwana Zebedayo, na Yohana, muduguye wamwa Yakobo, wavapaga lina lya Boanergo, nguno yalyo:

¹⁸vana va kuhilima; na Andrea, na Filipo, na Bartolomayo, na Mateo, na Tomas, na Yakobo, mwana Alfayo,

¹⁹na Tadayo, na Simoni muna Kana, na Yudas Iskarioti, homwene wamugambaga.

²⁰Na wingilaga mu numba, na mbuto vivilingaga hangi, syenisyo venekili vavagi vakakovolile kulya chakulya.

²¹Na aho vaduguye vayigagwa, vafumaga kumudima,

²²kwisi vayombaga, Uyu wahuganile. Na vamanicha fitabu, vatelemukile kufuma ku Yerusalema, vayombaga, Ali na Beelzebul, na aliyifumya migavo mu nguzu zya mutwale wa migavo.

²³Na Yesu wavitanaga na wavawilaga mu mikolani, Lumehoki Shetani alikovola kumupezya Shetani?

²⁴Na ulu vutemi vumo vuligogana muwavo wenekili, vutemi wenuvo vukakovolile kujama.

²⁵Na ulu numba yimo yiligogana nayo yenekili, numba iyo yikakovolile kujama.

²⁶Na ulu Shetani aligomela mwenekili na aligogana, haho uyu akakovolile kujama, sumbwa uzimila.

²⁷Alisi kuduhu munhu alikovola kwingila mu numba ya wa nguzu na kufisonza fiseme fyakwe, sumbwa amutunge hambele wa nguzu, na haho akuyisonza numba yakwe.

²⁸Loleyene ndimuwila inwe, Vana va vanhu vakutondolwa mavukenaguzi

²⁹gose na mafusano hogene valafusane, alisi homwene alimufusa Roho Nsondo, akavile na vutondolwa kusika

³⁰hanahana, alisi ali na musango gwa myaka de; kunguno vayombaga, Ali na mugavo gwa zoma.

³¹Na nina na vaduguye vizaga na vimaga hanze na vatumizaja kumwitana.

³²Na mbuto ya vanhu vikalagaho valimupilima; vamuwilaga. Lolaga, noko na vaduguyo valikwitana hanze.

³³Na uyu wavitavukaga,

³⁴uhaya, Nani ali mayu na vanani vadugu vane? Na wapilimaja minso na wavalolaga vose hovene vamupilimaga,

³⁵uhaya, Lolagi mayu na vadugu vane! Homwene alikimazya kikowa cha Mulungu, mwenuyu ali mudugu wane na ilumbu lyane na mayu.