Read Nyamwezi Lukasi 11 Bible Online

Lukasi 11 - Nyamwezi bible

Lukasi 11

¹Na yakwilaga ati wavagiho hakimbati alilomba; na aho wamalaga kulomba, umo wa vahemba vakwe wamuwilaga, Guku, utuhembeke kulomba kitisi Yohana wavahembekaga vahemba vakwe.

²Wavawilaga, Ulu mulilomba, haho muyombe: Vava, lina lyako lisondohiwe. Vutemi wako wize.

³Kiliwa kiswe tulikifunda ha vupanga, utupe nsiku zyose,

⁴Ututondole mavukenaguzi giswe, kwisi iswe vene tulimutondola kila umo alitukenagulila iswe. Ukatufile ngʼo iswe kuhumbikwa na kavi.

⁵Na wavawilaga, Nani mugati ninwe akuvi na munwani na akuja kuwakwe vuziku hagati na akumuwila,

⁶Mwichane, untizye mikate idatu, kwisi munwani wane wizaga kuwane afumile ku lugendo, na nkavile nacho cha kumuvonecha.

⁷Na uyu mugati akwitavuka na akuyomba, Uleke kumbezezya milimo, kwisi muzigo gwamalaga kulugalwa, na vana vane valilala hamohene nane ha vulili, nene nkakovolile kuvuka kukupa veve.

⁸Ndimuwila inwe, nulu mwenuyu akavile kuvuka na kumupa kunguno ali munwani wakwe, akuvuka na akumupa gose genayo aligafunda, kunguno uyo akavile na nsoni ya kumumbembelezya.

⁹Ndimuwila inwe, Mulombe na mukupiwa, mukove na

¹⁰mukuvona, muluguzye na mukulugulilwa. Kwisi homwene alilomba alipiwa, na homwene alikova alivona, na homwene aliluguzya akulugulilwa. Nani mugati

¹¹ninwe homwene ali ise, na mwana wakwe akumulomba mukate, kinahe, akumupa iwe? Ninga akumulomba nsomba, na akumupa nzoka ha lwande lwa nsomba?

¹²Ninga akumulomba igi, nawe akumupa kamina?

¹³Ulu haho inwe hovene muli vavi mulimanicha kuvapa vana vinwe fipanwa fisoga, kinahe, Vava winwe mwilunde kukila ngʼo kuvapa avo Roho Nsondo, hovene valimulomba?

¹⁴Na wavagi na milimo ya kufumya mugavo, nago gwavagi kameme. Na yakwilaga aho mugavo gwafumaga, wa kameme wayombaga, na vanhu vose vakumaja.

¹⁵Alisi vamo mugati navo vayombaga, Mu nguzu zyamwa Beelzebul, mutwale wa migavo, alizifumya migavo.

¹⁶Alisi vangi kunguno ya kumugema vakovaga lumeho kufuma kwilunde.

¹⁷Alisi uyu wamanikaja miganiko gavo, wavawilaga, Kila vutemi vuligogana navo wenekili vukuvi itongo, na numba yimo yikugwa ku numba yingi.

¹⁸Alisi ulu Shetani aligogana nawe mwenekili, vutemi wakwe vukujama na lumehoki? Kwisi muliyomba ati ndizifumya migavo mu nguzu zyamwa Beelzebul.

¹⁹Alisi ulu ndizifumya migavo mu nguzu zyamwa Beelzebul, vana vinwe valizifumya mu nguzu zyamwa nani? Kunguno yeniyi venavo vakuvi vayanguzi vinwe.

²⁰Alisi Ulu ndizifumya migavo na lyala lya Mulungu, haho vutemi wa Mulungu wasikaga kuwinwe.

²¹Ulu wa nguzu asagalilile alilinda ngomwa yakwe, haho nsavo zyakwe zilikala mu kuhola.

²²Alisi ulu wa nguzu amukilile akwiza, umukinda na umupuzya mafikolo gakwe, ago uyo

²³wagasanizaja, na uzigavanya nsamhwa zyakwe. Homwene akavile hamohene na nene alingemekezya vulugu, na homwene akavile kukuminga hamohene na nene alisambazya.

²⁴Ulu mugavo gwa zoma gwamufumaga munhu, haho gulivita mu fikalama, gulikova hakwisuhizya, na ulu gukahawine guyomba, Nkusyoka mu numba yane umo namufumile.

²⁵Na ulu gulisyoka guliyivona yapyagulilwe na yavegelezivilwe.

²⁶Haho gulija kukasola migavo zingi mpungati mivi kukila gwenekili, na zilingila na zilikala mwenumo, na mheleleko ya munhu mwenuyu yikuvi mbi kukila mbuki yakwe.

²⁷Na yakwilaga aho wavagi aliyomba genaya, mukima umo mugati na mbuto ya vanhu wahamukaga, uhaya, Yelukilwa nda hoyene yakusombaga veve, na mavele hogene veve wagonkaga.

²⁸Alisi uyu wayombaga, Loleyene, velukilwa venavo valigwigwa Muhayo gwa Mulungu na valigulindila.

²⁹Na aho mbuto ya vanhu yivilingaga, wavukizaja kuyomba, Vuvyalwa wenuvu vuli vuvyalwa vuvi, vulikova lumeho, alisi kupiwa ngʼo lumeho, sumbwa lumeho lwamwa Yona.

³⁰Kwisi kitisi Yona wavagi lumeho ku Vaninife, sisyo Mwana wa Munhu akuvi lumeho ku vuvyalwa wenuvu.

³¹Mutemi mukima wa Dakama akuhembuka ha lusiku lwa vuyanguzi hamohene na vagosya va vuvyalwa wenuvu, na akuvayangula, kwisi uyo wafumile ku mhelo ya liwelelo kuyigwa ngelo yamwa Salomo, na lolaga, henaha aliho muhanya kukila Salomo.

³²Vaninife vakuhembuka ha lusiku lwa vuyanguzi hamohene na vuvyalwa wenuvu na vakuvuyangula, kwisi venavo vapilukaga moyo kunguno ya mhola yamwa Yona; na lolaga, henaha aliho muhanya kukila Yona. Kuduhu umo alivacha tala na.

³³kuyitula mu lwiviso ninga hansilili nʼisyelo, sumbwa kwigulya nʼifiga, kigele avo valingila vaguvone mwanga.

³⁴Tala ya muvili yili linso lyako. Ulu linso lyako lyelile, sanga muvili gwako gwene gwelile; alisi ulu likelile, sanga muvili gwako gwene gwilavulile.

³⁵Sisyo wikomye lumole muwako luleke kuvi giti.

³⁶Ulu muvili gwako gose gwelile na gukavile na ifungu lilavuzu ninga limo ngʼo, haho gukuvi mwelu vuliko, kitisi ulu tala yilikwezya veve na mwanga gwayo.

³⁷Aho wavagi aliyomba, Mufarisayo umo wamulombaga itamule nawe, na uyu wingilaga na wikalaga hakulila.

³⁸Na Mufarisayo wakumaja aho wavonaga

³⁹ati, akikalavile hambele na kwitamula. Alisi Guku wamuwilaga, Inwe Vafarisayo mulikigusa kikombe na sahani hibala, alisi mugati mokalile na nsamhwa na kayaya.

⁴⁰Valele inwe! Kinahe uyo wakitundaga cha

⁴¹hanze, akakitundile na cha mugati chene? Mupane icho kili mugati kuvi fipanwa, na lolagi, gose gali masondo kuwinwe.

⁴²Musyolo kuwinwe Vafarisayo, kwisi mukulipaga ifungu lya ikumi ku luwiga na mchicha na makuvi gose, na mulileka vugolozi na kutogwa kwa Mulungu; yilimudima kugamazya genaya vuduhu kugaleka genayo.

⁴³Musyolo kuwinwe Vafarisayo, kunguno mulitogwa kwikala mu masumbi ga kumbele mu masinagogo na kugisiwa mu magulilo.

⁴⁴Musyolo kuwinwe, kunguno muli kitisi fivimbi fikamanikivilwe, na avo valiyumba kwigulya nafyo vakamanikizye.

⁴⁵Umo mugati na vamanicha ngʼhama witavukaga na wamuwilaga, Muhembeki, mu kuyomba syenisi ulitusemelela iswe vene.

⁴⁶Uyu witavukaga, Musyolo kuwinwe vamanicha ngʼhama vene, kwisi mukuvagazaja vanhu miligo mitimbu, alisi mukavile kuyikumya ninga ngʼo na limo lya mala ginwe.

⁴⁷Musyolo kuwinwe, kunguno mulizenga fivimbi fya vafumbuzi hovene vansinwe valivavavulagage.

⁴⁸Sisyo inwe muliyisangilwa na muliyizumya milimo ya vansinwe, kwisi avo valivavavulagage, na inwe mulifizenga fivimbi fyavo.

⁴⁹Kunguno yeniyi ngelo ya Mulungu yayombaga, Nene nkuvatumizya kuwavo vafumbuzi na Vatume, na vakuvavulaga

⁵⁰vamo mugati navo na kuvapezya, kigele gatondwe ku vuvyalwa wenuvu magazi ga vafumbuzi hogene gazwikivagwa vukumbu na kutundwa kwa liwelelo,

⁵¹kufuma magazi gamwa Abele kusika magazi gamwa Zakaria, homwene wavulagagwa hagati na hakuhozezya na numba ya Mulungu, loleyene ndimuwila inwe, gakutondwa ku vuvyalwa wenuvu.

⁵²Musyolo kuwinwe vamanicha ngʼhama, kunguno mwalwingaja lufungulo lwa kumanicha, inwe venekili mukingilile, na mulivahangilizya avo valikova kwingila.

⁵³Na aho wakufumagako vamanicha ngʼhama na Vafarisayo vavukizaja kumupinehezya sivi na kumuvuzya muno kunguno ya mihayo mingi, vamwitegelaga, kigele vagudime muhayo gwa ku mulomo gwakwe.