Read Nyamwezi Lukasi 12 Bible Online

Lukasi 12 - Nyamwezi bible

Lukasi 12

¹Mwitungo lyenilo vanhu vingi vivilingaga kusika fihumbi ikumi, sisyo vitovangizaja; na wavukizaja kuyomba na vahemba vakwe, Mwilindile hambele nʼitumbyo lya Vafarisayo, holyene lili lya vugulumi.

²Kwisi kuduhu kinhu chavisilwe hochene kufumbulwa ngʼo, na kuduhu cha mbisila hochene kumanikiwa

³ngʼo. Kunguno yeniyi genaya muliyomba mu giti gakudegelekwa mu mwanga na genaya mwayombaga mu itwi lya munhu mu masenge gakutaniziwa kwigulya na midaka.

⁴Alisi ndimuwila inwe, vanwani vane, muleke kuvogoha venavo valiguvulaga muvili, na haho vakakovolile kinhu kingi.

⁵Alisi nkumolecha inwe nani mumogohe; mumogohe mwenuyu homwene ali na vukovozi hanuma na kuvulaga kumutagila inwe mugati na hakuzimila. Ndimuwila inwe, mumogohe mwenuyu.

⁶Kinahe, tuzolwe tutano tukavile kugulwa ku senti ivili? Na kuduhu kamo kalilavilwa na Mulungu. Alisi nzwili zyose zya mitwe yinwe zyasolozivilwe.

⁷Muleke kogoha; inwe muli na mupango kukila tuzolwe twingi.

⁸Ndimuwila inwe, homwene alinzumilizya hambele na vanhu, Mwana wa Munhu akumuzumilizya hambele na vamalaika va Mulungu.

⁹Alisi homwene alinkana hambele na vanhu, akukanwa hambele na vamalaika va Mulungu.

¹⁰Na homwene akuyomba muhayo kwigulya na Mwana wa Munhu akutondolwa, alisi homwene alimufusa Roho Nsondo, mwenuyu

¹¹kutondolwa ngʼo. Na ulu vakumufila inwe hambele na masinagogo na vanamhala na venekili vukovozi, muleke kwisusuma lumehoki ninga muhayo ki musuvilizye,

¹²kwisi Roho Nsondo akumuhembeka itungo lili genaya inwe muyombe.

¹³Alisi umo mugati na mbuto ya vanhu wamuwilaga, Muhembeki, umuwile mudugu wane angavulile isalo.

¹⁴Uyu wamuwilaga, Wee mugosya, nani wantulaga nene

¹⁵kuvi muyanguzi na mugavuzi kwigulya ninwe? Mwikomaje na mwilindilage hambele na vutuvu vose, kwisi vupanga wa munhu vukavile kufuma ku wingi wa nsavo zyakwe.

¹⁶Na wavawilaga mukolani, uhaya, Malale ga munhu musavi mbati gamezizye filiwa fingi.

¹⁷Na wiganikaga mu moyo gwakwe, Niteki, kwisi nkavile na hakuponela filiwa fyane?

¹⁸Na wayombaga, Nkuvezya giki: nkugabomola manhungugu gane na nkugazenga mahanya, na mwenumo nkufiponela filiwa

¹⁹fyane fyose na nsavo zyane, na nkuyiwila myuye yane, Myuye, uli na tusoga twingi ku myaka mingi, usuhe,

²⁰ulye, unwe, usate. Alisi Mulungu wamuwilaga, Muhumbu veve, vuziku wenuvu vakuzikova myuye zyako,

²¹alisi genaya wasavaga gakuviho kumwa nani? Sisyo ali mwenuyu homwene aliwisavila mwenekili nsavo, na akavile musavi mugati na Mulungu.

²²Na wavawilaga vahemba vakwe, Kunguno yeniyi ndimuwila inwe, muleke kwisusuma ku vupanga winwe

²³cheniki mulye, na ku muvili cheniki muzwale. Kwisi vupanga vulikila chakulya, na muvili gulikila myenda.

²⁴Mugalole mangʼhwangʼhwa; gakavile kulima ninga kwimbula, na gakavile na tusenge ninga ngʼo nhungugu, na Mulungu aligalisya, na inwe muligakila manoni munogwene.

²⁵Na nani mugati ninwe alikovola kwiyongezya ninga katungo kado ku myaka yakwe nulu

²⁶alisusuma? Ulu inwe mukakovolile kinhu kido, kuki

²⁷mulisusuma kunguno ya genaya gangi? Mugalole mana; gakavile kupela vuzi ninga kutalazya, alisi ndimuwila inwe ati, ninga Salomo mu lukumo lwakwe lose akazwalile kitisi limo mugati nago.

²⁸Ulu Mulungu aligazwika sisyo maswa ga mumalale, hogene galiho lelo alisi igolo gakutagilwa mu moto, haho akukila

²⁹kuvazwika inwe va luhigi ludo? Na inwe muleke kukovelezya cheniki inwe mulye na cheniki muzwale na muleke kuhahala.

³⁰Kwisi vapagani va liwelelo valigatamanilwa gose genaya; alisi Vava winwe alimanicha ati muligafunda genaya.

³¹Alisi hambele muvukove vutemi wakwe, na genaya gakongeziwa kuwinwe.

³²Uleke kogoha veve idale ido, kwisi Vava winwe atogilwe kumupa inwe vutemi.

³³Muziguzye nsavo zinwe na mupane, mwivezezaje mifuko hoyene kulalahala ngʼo, nsavo hozyene kudoha ngʼo mwilunde, kwenuko

³⁴mwivi kwegela ngʼo na ifufuzi kuzilya ngʼo. Kwisi kwenuko nsavo zinwe ziliko, kwenuko kwene moyo ginwe gukuviko.

³⁵Mikimbili zinwe zive zinyepilwe, na tala zinwe zive

³⁶zivakile, na muvikole vanhu hovene valimulinda Guku wavo, ulu alifuma ku winga, kigele itungo lyenili aliza na aliluguzya vamulugulile.

³⁷Velukilwa vakumba venavo hovene Guku, ulu aliza, alivasanga vali minso; loleyene ndimuwila inwe ati, akwinyepa na akuvikazya na akwegela kuvavonecha.

³⁸Na ulu aliza ha zamu ya vuvili ninga ya vudatu na alivasanga sisyo, velukilwa venavo.

³⁹Mumaniche yeniyi ati, ulu mwenekili numba wamanicha itungo lyenilo mwivi aliza, mbe akazumizye numba yakwe yidulwe.

⁴⁰Inwe muve tayari, kwisi Mwana wa Munhu alize mwitungo lyenilo mukaliganikile.

⁴¹Petro wamuwilaga, Guku, ulituwila iswe mukolani

⁴²gwenugu ninga vose? Na Guku wayombaga, Nani ali kasika lufungulo mujamu na muvalaganu, homwene Guku akumutula kwigulya na vakumba vakwe kuvapa chakulya chavo mwitungo lyacho.

⁴³Welukilwa mukumba mwenuyo homwene Guku alimusanga alita sisyo.

⁴⁴Loleyene, ndimuwila inwe, akumutula kwigulya na nsavo zyose zyakwe.

⁴⁵Alisi ulu mukumba mwenuyo akuyomba mu moyo gwakwe, Guku wane alikendela kwiza, na alivukizya kuvatula vakumba, vagosya na

⁴⁶vakima, na kulya na kunwa na kukolwa, Guku wa mukumba mwenuyo alize lusiku lwenulo akalwiganikile na itungo akalimanikizye, na akumutambagula na

⁴⁷akumupa ifungu lyakwe hamohene na vʼivengwe. Na mukumba mwenuyo homwene wakimanikaja kikowa na gukuye, alisi akakivezizye ninga akitile hanuma na

⁴⁸kikowa chakwe, akutulagulwa milanga mingi. Alisi homwene akakimanikizye na witaga genayo gasikaga ha matulagulwe, akutulagulwa milanga mido. Uyo homwene wapivagwa mingi, akutondwa mingi; na ha mwenuyo mingi gavikizivilwe vakugakova mingi muno ha mwenuyo.

⁴⁹Nizaga kutaga moto mu liwelelo, na nakoveki hangi

⁵⁰ulu mbe gwamalaga kuvaka! Kuliho kogiwa nogiwe

⁵¹nako, na ndihaha kusika kumaliziwe. Muliganika ati

⁵²nizileho kuleta kuhola mu liwelelo? Ndimuwila inwe, byololo, sumbwa vulekane. Kwisi vukumbu na lelo vukuviho vulekane mugati na vanhu vatano mu numba

⁵³yimo, vadatu kwigulya na vavili, na vavili kwigulya na vadatu, ise kwigulya na mwana, na mwana kwigulya na ise, nina kwigulya na mwanike, na mwanike kwigulya na nina, nina vukwi kwigulya na mkamwana, na mkamwana kwigulya na nina vukwi.

⁵⁴Na wavawilaga mbuto ya vanhu, Ulu mulivona ilunde lilivuka mu mweli, itungo lili muliyomba, Mbula

⁵⁵yikwiza, na yilikwila sisyo. Na ulu muyaga gwa dakama gulipepela, haho muliyomba, Ilungula likwiza, na yilikwila sisyo.

⁵⁶Inwe vagulumi, genaya galiwigela mu liwelelo na mwilunde mulimanicha kugafumbula, alisi itungo lyenili, lumehoki mukamanikizye kulifumbula lyenili?

⁵⁷Na kungunoki mukavile kugafumbula

⁵⁸inwe venekili genaya gali magololoku? Ulu veve ulija na mukandi wako ku baraza, ugangadike kwikondela nawe mu nzila, kwigela ngʼo akutongeke ku muyanguzi, na muyanguzi akufumye kumwa mulugaluga, na mulugaluga akutagile mu jela.

⁵⁹Ndikuwila, veve kukufumako ngʼo kusika walinaga senti ya mhelo yene.