Read Nyamwezi Lukasi 15 Bible Online

Lukasi 15 - Nyamwezi bible

Lukasi 15

¹Na vʼihongo na vakenaguzi vose vamwegelaga, vamwigwe.

²Na Vafarisayo na vamanicha fitabu vingʼungʼulaga na vayombaga, Mwenuyu alivanukula vakenaguzi na alilya hamohene navo.

³Alisi wavawilaga mukolani ugu, uhaya,

⁴Nani mugati ninwe ali nazyo ngʼholo igana, na ulu mugati nazyo wayizimizya yimo kuzileka ngʼo makumi kenda na kenda mwibalangu na kuyilondezya iyo yazimilaga kusika wayivona?

⁵Na aho wayivonaga aliyivagala ku mavega gakwe na kudeha; na ulu alingila mu kaya alivitana viye na vazenganwa, uvawila,

⁶Mudehe hamohene na nene, kwisi nayivonaga ngʼholo yane yazimilile.

⁷Ndimuwila inwe, sisyo kukuviho kudeha kwilunde kunguno ya mukenaguzi umo alipiluka moyo, kingi kukila vagololoku makumi kenda na kenda hovene vakafundile kupiluka moyo.

⁸Ninga mukima ki homwene ali na shilingi ikumi, na ulu wayizimizaja yimo kuyivacha ngʼo tala na kuyipyagula numba na kuyikova munogwene kusika wayivona?

⁹Na aho wayivonaga alivitana viye na vazenganwa, uhaya, Mudehe hamohene na nene, kwisi nayivonaga shilingi hoyene nayizimizaja.

¹⁰Sisyo ndimuwila inwe, kukuviho kudeha hambele na malaika va Mulungu kunguno ya mukenaguzi umo homwene alipiluka moyo.

¹¹Na wayombaga, Munhu mbati wavagi na vana vavili.

¹²Na mwana mudo mugati navo wamuwilaga ise, Umpe nene ifungu lya nsavo holyene likuviho kuwane. Na wavagavulilaga nsavo.

¹³Na hanuma na nsiku ndo mwana mudo wagakumingaga gose na wajaga ku chalo kule, na kwenuko wazitagagulile nsavo zyakwe na kalya na kanwa.

¹⁴Na aho wagamalaga gose nzala nhanya yingilaga mu chalo chenicho, nawe mwene wavukizaja kutuva nzala.

¹⁵Na wajaga wisugaja ha umo muna chalo icho, na uyo wamutumizaja ku malale

¹⁶gakwe kuzidima nguluve; na watamanilagwa kuyokazya nda yakwe na mapalala hogene nguluve zikulyaga, na kuduhu umo wamupa kinhu.

¹⁷Alisi aho wiyinamilaga mu moyo gwakwe na wayombaga, Vatumami vanga vamwa vava vali na chakulya kingi na

¹⁸kulekela, alisi nene ndifwa na nzala. Nkuvuka na nkuja kumwa vava na nkumuwila, Vava, nakenagulile hambele nʼilunde na hambele naʼho, nkasikile isima

¹⁹kwitanwa hangi mwana wako, umbezye kitisi umo wa vatumami vako.

²⁰Na wavukaga na wajaga kumwa ise. Alisi aho wavagi atali kule ise wamuvonaga na wasativagwa lusungu kuwakwe, na wapelaga na wamukumbataga ha nhingo yakwe na wamunonelaga.

²¹Alisi mwana wamuwilaga, Vava, nene nakenagulile hambele nʼilunde na hambele naʼho, nkasikile isima kwitanwa hangi mwana wako.

²²Alisi ise wavawilaga vakumba vakwe, Mulete mwenda musoga gwa mbele na mumuzwike, na mumuzwike pete ha kukono kwakwe na

²³filatu ha magulu gakwe, na mulete kadama kanelezu

²⁴mukasike, na tulye na twisinye; kwisi mwana wane mwenuyu wavagi wafwile, alisi wapembukaga hangi; wazimilile na wavonagwa hangi, na vavukizaja kwisinya.

²⁵Alisi mwana wakwe muhanya wavagiko ku mugunda, na aho wizaga na wayegelaga numba, wigagwa mizwi zya nimbo na kwisinya,

²⁶na wamwitanaga umo wa vakumba na wamuvuzaja nguno ya genaya. Na uyu wamuwilaga, Muzunayo wizaga, na nso wakasikaga kadama kanelezu kunguno wamupivagwa hangi mupanga.

²⁷Alisi uyu wakilagwa na wakanaga kwingila.

²⁸Haho ise wafumaga na wamulombaga.

²⁹Alisi uyo witavukaga na wamuwilaga ise, Lolaga, myaka yose nakutumamilaga veve na ntali kugukenagulila mukumo gwako, na utali kumpa nene kagulati kigele nisinye hamohene na vanwani vane.

³⁰Alisi aho mwana wako mwenuyu wizaga, homwene wazilile nsavo zyako na

³¹vangʼhya, wamusikilaga kadama kanelezu. Alisi uyo wamuwilaga, Mwana, veve nane tuli hamohene hanahana, na gose gane gali gako.

³²Alisi yatudima iswe twisinye na tudehe, kwisi muduguyo mwenuyu wafwile na wapembukaga hangi, wazimilile na wavonagwa hangi.