Read Nyamwezi Lukasi 24 Bible Online

Lukasi 24 - Nyamwezi bible

Lukasi 24

¹Na lusiku lwa mbele mu yuma hikingilima muno, vizaga ku kivimbi na valetaga manukato hogene vagavezizye.

²Na vavonaga ati iwe lisindikilwe ku kivimbi;

³alisi aho vingilagamo vakaguwine muvili gwamwa Guku Yesu.

⁴Na yakwilaga aho vatavanivagwa ku yeniyi vagosya vavili vavegelaga, vazwalile myenda miyekemu.

⁵Alisi aho vakangagwa na vinamaga hasi, avo vavawilaga, Kuki mulimukova mwenuyu ali muzuvuku ha vafwile?

⁶Akavileho henaha, sumbwa wahembukaga; mwizukile kitisi wamuwilaga inwe aho wavagi atali ali ku Galilaya,

⁷aho wayombaga kunguno ya Mwana wa Munhu ati, apanwe mu makono ga vakenaguzi na akomelwe na ahembuke ha lusiku lwa vudatu.

⁸Na vayizukilaga mihayo yakwe,

⁹na valivasyokaga kufuma ku kivimbi vavapozezaja avo ikumi na umo na vangi vene gose genaya.

¹⁰Na vakima avo vavagi Maria Magdalena, na Yoana na Maria, nina wamwa Yakobo; avo na vangi vene vavawilaga Vatume genaya.

¹¹Na yigelaga kuwavo kitisi mihayo yikavile

¹²ya kapanga, na vakavasanizizye. Alisi Petro wavukaga na wapelaga ku kivimbi, na aho wasunukaga wayivonaga shanda yinene, na wasyokaga na wakumaja kunguno ya genaya gakwilaga.

¹³Na ha lusiku lwenulo vavili mugati navo vavagi vajile ku kakaya, lina lyako Emao, kavagi kufuma

¹⁴Yerusalema katanalo ka stadio makumi mkaga, na vasunsumulaga hamohene kunguno ya gose genaya gakwilile.

¹⁵Na yakwilaga aho vasunsumulaga na vitozaja hamohene, Yesu mwene wegelagaho na wasimizaga hamohene navo.

¹⁶Alisi minso gavo gafumbilwe, sisyo vavagi vakamumanikizye.

¹⁷Nawe wavawilaga, Mihayo ki yeniyi mulisyokezya mu lugendo lwinwe? Navo vimaga na mugati na misayo valolaga hasi.

¹⁸Na umo witavukaga, lina lyakwe Kleopas, na wamuwilaga, Veve winene uli mugeni mu Yerusalema, na ukagamanikizye

¹⁹genaya gakwilagamo mu nsiku zyenizi? Nawe wavavuzaja, Muhayo ki? Navo vitavukaga, Yeniyi kunguno yamwa Yesu wa Nazareti, homwene wavagi mufumbuzi wa vukovozi mu milimo na mu mihayo hambele

²⁰na Mulungu na hambele na vanhu vose; na kitisi vahozya vahanya na vakovozi vamutavulaga mu kitanga cha lufu na vamukomelaga.

²¹Alisi iswe twisigizaja ati ali mwenuyu homwene akukomola Israeli. Na ha gose genaya lelo lusiku lwa vudatu vukumbu genaya gakwilaga.

²²Na hangi vakima vamo mugati niswe vatukangaga, hovene vafikaga hʼikingilima ku kivimbi.

²³Na aho vakaguwine mulambo vizaga na vayombaga ati, vakuvonaga kwigela kwa malaika, hovene vayombaga ati alizuvuka.

²⁴Na vamo mugati niswe vajaga ku kivimbi na vavonaga kitisi vakima vene vayombaga, alisi mwenekili vakamuwine.

²⁵Na uyu wavawilaga, Hoinwe valele na vadizu mu moyo mu kugasanizya gose genayo vafumbuzi vayombage.

²⁶Kinahe, yikamudimile Kristo aduke genaya na ingile mu lukumo

²⁷lwakwe? Na wavukizaja kufuma kumwa Mose na vafumbuzi vose na wavalotolelaga gose genayo gatonilwe mu mavutone gose kunguno yakwe.

²⁸Na vayegelaga kaya uko vajile, nawe wavezaja kitisi wakovaga kuja kumbele.

²⁹Na vamwikumbilizaja, vuhaya, Udile hamohene niswe, kwisi yavi mhindi na limi lyalokaga. Nawe wingilaga kudila hamohene navo.

³⁰Na yakwilaga aho wikalaga hamohene navo hakulila, wagusolaga mukate, wagongolaga luvango, wagumegulaga na wavapaga venava.

³¹Alisi minso gavo gatunulaga, na vamumanikaja. Alisi uyu akigelile uva haduhu.

³²Na vayombaga hamohene, Kinahe, moyo gwiswe gukavakile muwiswe aho wayombaga niswe mu nzila, aho

³³watutungulilaga kumanicha mavutone? Na vavukaga saa yeniyo na vasyokaga ku Yerusalema, na vavasangaga avo ikumi na umo na avo vangi vavagi hamohene navo,

³⁴hovene vayombaga, Guku wahembukile

³⁵loleyene, na wigelaga kumwa Simoni. Na vavapozezaja genayo gakwilaga mu nzila, na lumehoki wamanikizivagwa navo aho wagumegulaga mukate.

³⁶Na aho vavagi valiyomba genaya, mwenekili wimaga mugati navo na wavawilaga, Kuhola kuve hamohene

³⁷ninwe! Alisi vakangagwa na vogohaga muno, viganikaga ati hamo valiguvona muzimu.

³⁸Na wavawilaga. Kuki inwe mulihahala? Na kungunoki miganiko

³⁹galivuka mu myoyo yinwe? Mugalole makono gane na magulu gane ati honene; munkumye na muvone, kwisi muzimu gukavile na nyama na maguha kitisi inwe mulivona ndi nago nene.

⁴⁰Na aho wayombaga genaya wavolekaja makono na magulu.

⁴¹Alisi aho venava vatali kusanizya kunguno ya kudeha na kukumya,

⁴²wavawilaga, Muli na chakulya henaha? Na vamupaga kipande cha isomba lya vukalange.

⁴³Nawe wakisolaga na wakilyaga hambele navo.

⁴⁴Na wavawilaga, Yeniyi yili mihayo yane hoyene namuwilaga aho navagiho hamohene ninwe ati, gose gamaliziwa hogene gatonilwe kunguno yane mu ngʼhama zyamwa Mose na mu vafumbuzi na Zaburi.

⁴⁵Haho wavapaga kuyimanicha nguno ya mavutone, na wavawilaga,

⁴⁶Sisyo yatonilwe ati Kristo aduke na ahembuke

⁴⁷ha lusiku lwa vudatu, na kufuma Yerusalema va machalo gose vataniziwe mu lina lyakwe kupiluka moyo na vutondolwa wa mavukenaguzi.

⁴⁸Inwe muli vasangilwaho va yeniyi.

⁴⁹Na nene mwenekili ndilitumizya ilagano lyamwa Vava kwigulya ninwe; alisi inwe mudile mu kaya kusika mukuzwikwa nguzu kufuma kwigulya.

⁵⁰Na wavatongekaga ku Betania, na wagagololaga makono gakwe na wavadosaja.

⁵¹Na yakwilaga aho wavadosaja, wisundaga kuwavo na wajanagwa mwilunde, na avo vamusukambilaga.

⁵²Na vasyokaga ku

⁵³Yerusalema na kudeha kuhanya, na vavagi mwisengelo nsiku zyose kumugongola Mulungu.