Read Nyamwezi Lukasi 5 Bible Online

Lukasi 5 - Nyamwezi bible

Lukasi 5

¹Na yakwilaga aho vanhu vamufitaga mu kwigwa

²Muhayo gwa Mulungu, wimaga ha nguka ya nyanza Genezareti, na wagavonaga mawato avili gatulilwe ha nguka ya nyanza, alisi valovi valivafumagamo na vavagi valigusa mavukila gavo.

³Na aho wingilaga mu wato vumo, howene wavagi wamwa Simoni, wamulombaga asunegele hado kufuma ku nguka. Na wikalaga na kufuma mu wato wavahembekaga mbuto ya vanhu.

⁴Aho wamalaga kuyomba, wamuwila Simoni, Usunegele kusika ha vusihu wa minzi na mugaponezye mavukila ginwe kulova masomba.

⁵Na Simoni witavukaga, uhaya, Guku, twatumamaga vuziku pe na tukalovile kinhu, alisi ku muhayo gwako nkugaponezya mavukila.

⁶Na aho vitaga sisyo vagadimaja masomba mingi munogwene na mavukila gavo gatandukaga.

⁷Na vavapalizaja vichavo va mu wato vungi, vize vavagwasye. Na vizaga na vagokazaja mawato gose avili, sisyo gendaga kunwivila.

⁸Alisi Simoni wavonaga genaya, wagwaga ha magulu gamwa Yesu na wayombaga, Ufume kuwane, Guku, kwisi ndi munhu mukenaguzi.

⁹Kwisi kukumya kwamudimaga na viye vose kunguno ya vulovi wa masomba mingi hogene vagadimaja,

¹⁰na hangi savasava Yakobo na Yohana, vana vamwa Zebedayo, hovene vavagi viye vamwa Simoni. Na Yesu wamuwilaga Simoni, Uleke kogoha, kufuma lelo ukuvi mulovi wa vanhu.

¹¹Na aho vamalaga kugaleta mawato ha nguka vagalekaga gose na vamulondaga.

¹²Na yakwilaga aho wavagimo mu kaya yimo, lolaga, wavagiho munhu ali na mbizi muvili gose, na aho wamuvonaga Yesu wakundamaga ha vusyu wakwe na wamulombaga, uhaya, Guku, ulu ulikova ulikovola kunezya.

¹³Na Yesu wagololaga kukono kwakwe na wamukumaja,

¹⁴wahaya, Ndikova, wele. Na itungo lili mbizi zyamufumaga. Na wamulagilaga aleke kumuwila umo, sumbwa uje ukiyoleche ku muhozya na ufumye mhezi ku kupiziwa kwako, kitisi Mose walagilaga, yive vusangilwaho kuwavo.

¹⁵Alisi mhola yakwe yasambalaga kingi munogwene, na vanhu vingi vivilingaga kumwigwa na kupiziwa mavulwile gavo.

¹⁶Alisi uyu wisundaga na wajaga mwibalangu na walombaga.

¹⁷Na yakwilaga lusiku lumo aho wavagi alihembeka, Vafarisayo na vamanicha ngʼhama vavagi valikala henaho, hovene vafumaga ku makaya ga Galilaya na Uyahudi na ku Yerusalema, na nguzu zya Mulungu zya kupizya zyavagiho.

¹⁸Na lolaga, vagosya vamuletaga ku vulili munhu walemala, na vakovaga kumwingizya mugati na kumutula hambele nawe.

¹⁹Na aho vakahawine hakumwingizya kunguno ya mbuto ya vanhu, valinaga ku mudaka na hagati na matofali vamwingizaja mugati hamohene na vulili wakwe hambele na Yesu.

²⁰Na aho waluvonaga luhigi lwavo, wahaya, Mwichane, mavukenaguzi gako gatondolilwe.

²¹Na vamanicha fitabu na Vafarisayo vavukizaja kwitozya mu myoyo na vayombaga, Nani mwenuyu homwene aliyomba mafusano? Nani alikovola. kutondola mavukenaguzi sumbwa Mulungu inene?

²²Alisi aho Yesu wagamanikaja miganiko gavo, witavukaga na wahaya,

²³Muliganikaki mu myoyo yinwe? Muhayo ki mubuhu kuyomba, Mavukenaguzi gako gatondolilwe, ninga kuyomba,

²⁴Uvuke na usimize? Alisi kigele mumaniche ati Mwana wa munhu ali na vukovozi kugatondola mavukenaguzi mu liwelelo, wamuwilaga mulema, Ndikuwila, uvuke na uvuche vulili wako na uje ku numba yako.

²⁵Na itungo lili wavukaga hambele navo, wakivukaja icho walalilaga, na wajaga ku numba yakwe alimugongola Mulungu.

²⁶Na kukumya kuhanya kwavadimaga vose, na vamugongolaga Mulungu na vokalaga na kogoha na vayombaga, Lelo twakiwine cha kukumya.

²⁷Na hanuma na genaya wafumaga na wamuvonaga wʼihongo, lina lyakwe Lefi, ikalile hʼihongo, na wamuwilaga,

²⁸Undonde! Na wagalekaga gose na wamulondaga.

²⁹Na Lefi wamuvezezaja mayeye mahanya mu numba yakwe, vʼihongo vingi na vangi hovene vikalaga hakulila hamohene nawe.

³⁰Na Vafarisayo na vamanicha fitabu vavo vavingʼungʼulilaga vahemba vakwe na vayombaga, Kuki inwe mulilya na kunwa hamohene na vʼihongo na vakenaguzi?

³¹Na Yesu witavukaga na wavawila, Vapanga vakafundile mufumu, sumbwa vasatu.

³²Nene nkizile kuvitana vagololoku vapiluke moyo, sumbwa vakenaguzi.

³³Na vamuwilaga, Vahemba vamwa Yohana valifunga na kulomba kingi, na sisyo savasava Vafarisayo vene, alisi vahemba vako valilya na valinwa.

³⁴Alisi Yesu wavawilaga, Mulikovola kuvakungilizya viye va mutozi kufunga, kungi mutozi atali ali hamohene navo?

³⁵Alisi nsiku zikwiza aho mutozi akwingiwa kuwavo, haho valafunge mu nsiku zyenizyo.

³⁶Na wavawilaga mukolani, Kuduhu munhu alitandula kilaka ku mwenda mupya na kukisumilizya ku mwenda mulala, ulu alita sisyo aligutandula ugo mupya, na kilaka cha

³⁷mwenda mupya kugelanila ngʼo ku ugo mulala. Na kuduhu munhu akuditilaga mvinyo mpya mu mbogolo zya kale, ulu alita sisyo mvinyo mpya yikuzitandula mbogolo na yikuseseka na mbogolo zikuvipa, kolaga mvinyo mpya yiditilwe mu mbogolo mpya.

³⁸Na kuduhu munhu homwene wanwaga mvinyo ya kale akuyitamanilwa mpya,

³⁹kwisi akuyomba, Iyo ya kale yilonsoga.