Read Nyamwezi Lukasi 9 Bible Online

Lukasi 9 - Nyamwezi bible

Lukasi 9

¹Na wavitanaga avo ikumi na vavili, wavapaga nguzu na vukovozi kwigulya na migavo zyose na kugapizya mavulwile.

²Wavatumizaja kuvutanizya vutemi wa Mulungu na kuvapizya valwile.

³Na wavawilaga, Kuduhu mujane kinhu ku lugendo, ninga ngʼo mulanga, ninga mufuko, ninga mukate, ninga ngʼo mapesa, hangi kuduhu umo ave na myenda ivili.

⁴Na mu numba iyo mukwingilila, mwikalemo na kufuma mwenumo muvuke hangi.

⁵Na avo vakavile kumwanukula, mufume mu kaya yavo na mugungʼhumule luvuvu ku magulu ginwe, kigele luve vusangilwaho kuwavo.

⁶Na vajaga na vavitaga mu tukaya valiyitanizya Mhola ya Chelu, na kuvapizya valwile hosehose.

⁷Alisi Herode mutemi wagigagwa genaya gakwilaga, witimagwa mu moyo, kunguno vamo vayombaga ati, Yohana wahembukile ku lufu, na vangi ati, Elia wigelile,

⁸na vangi ati, umo wa vafumbuzi va kale wahembukile.

⁹Alisi Herode wayombaga, Yohana namutinaga mutwe, alisi uyu ali nani homwene ndigwa genaya kwigulya nawe. Na wakovaga kumuvona. Na Vatume aho vasyokaga vamupozezaja genaya vitaga.

¹⁰Na wavasolaga na wisundaga na wajaga navo ku kaya yimo yilitanwa Betsaida.

¹¹Alisi aho mbuto ya vanhu vamanikaja, vamulondaga, nawe wavanukulaga na wayombaga navo kunguno ya vutemi wa Mulungu, na wavapizaja venavo vafundaga kupiziwa.

¹²Na limi lya mhindi venavo ikumi na vavili vamwegelaga, vumuwila, Uvadahye vanhu, kigele vaje mu tukaya na mwihala vakavone hakulala na chakulya, kwisi henaho tuliho ipolu duhu.

¹³Alisi wavawilaga, Inwe muvape chakulya. Na vamuwilaga, Tukavile na kinhu, sumbwa mikate itano na masomba avili, ninga tuje kuvagulila vanhu vose venava chakulya.

¹⁴Kwisi vavagiho vagosya vingi kusika fihumbi fitano. Alisi wavawilaga vahemba vakwe, Muvikazye vanhu mavanza mavanza,

¹⁵kila ivanza makumi atano. Na vitaga sisyo na vavikazaja vose.

¹⁶Na uyu wazisolaga mikate itano na masomba avili, walangamilaga kwilunde, wazidosaja, wazimegulaga na wavapaga vahemba, navo vavagavanaja vanhu.

¹⁷Na valyaga na vigutaga vose, na vagasolelaga matonge matala ikumi na avili ku genayo galekelilwe navo.

¹⁸Na yakwilaga aho wavagi alilomba inene na vahemba vakwe vavagi hamohene nawe, wavavuzaja,

¹⁹Mbuto ya vanhu valiyomba nene ndi nani? Na vitavukaga, vuhaya, Yohana Moja, alisi vangi, Elia, na vangi, Umo wa vafumbuzi va kale wahembukile.

²⁰Nawe wavavuzaja, Alisi inwe muliyomba nene ndi nani? Petro witavukaga, uhaya, Kristo wa Mulungu.

²¹Alisi wavahanaga na wavalagilaga, valeke kumuwila

²²umo muhayo ugu, na wayombaga, Yilimudima Mwana wa Munhu kuduka kingi na kukanwa na vanamhala na vahozya vahanya na vamanicha fitabu na kuvulagwa na kuhembukiwa ha lusiku lwa vudatu.

²³Na wavawilaga vose, Ulu umo alikova kundonda nene, ikanye mwenekili na idwike musigiti gwakwe nsiku zyose na andonde.

²⁴Kwisi homwene alikova kuzipizya myuye zyakwe akuzizimizya; alisi homwene alizizimizya myuye zyakwe kunguno yane akuzipizya.

²⁵Yilamuveleleki munhu kuligada liwelelo lyose, ulu

²⁶wizimizaja ninga wivipaja mwenekili? Kwisi homwene ali na nsoni kunguno ya nene na mihayo yane, ha mwenuyo Mwana wa Munhu akuvi na nsoni ulu akwiza mu lukumo lwakwe na lwa Vava na lwa vamalaika vasondo.

²⁷Ndimuwila inwe loleyene, valiho vamo mugati navo vimile henaha hovene kululavuzya ngʼo lufu kusika vavuwine vutemi wa Mulungu.

²⁸Na yakwilaga bihi na nsiku mnane hanuma namihayo yeniyi, wavasolaga Petro na Yohana na Yakobo na walinaga ku lugulu kukalomba.

²⁹Na yakwilaga aho wavagi alilomba musimo gwa vusyu wakwe gwagalukaga na mwenda gwakwe gwayekemaga pee.

³⁰Na lolagi, vanhu vavili vavagi valiyomba nawe, Mose

³¹na Elia, hovene vigelaga mu lukumo na vayombaga nawe kunguno ya kufwa kwakwe, hokwene akumazya mu Yerusalema.

³²Petro na viye vatindilaga tulo; alisi aho vamisaja, valuvonaga lukumo lwakwe na vagosya ava vavili hovene vimile hamohene nawe.

³³Na yakwilaga aho avo vingaga kuwakwe, Petro wamuwilaga Yesu, Guku, yili sisoga ati iswe tuliho henaha; tuzenge nhambi idatu: yimo kuwako, yimo kumwa Mose, na yimo kumwa Elia; alisi wavagi akamanikizye genaya wayombaga.

³⁴Na aho wavagi aliyomba genaya, ilunde ligelaga na lyavakinganizaja, na aho vingilaga mwilunde lyenili vogohaga.

³⁵Alisi muzwi gwafumaga kwilunde lyenili, gwayombaga. Mwenuyu ali Mwana wane, mumwigwe uyu.

³⁶Na aho muzwi gwavagi guliyomba, Yesu wavonagwa inene. Na avo vahulikaga sele na vakamuwilile umo mu nsiku zyenizyo muhayo gumo gwa genaya vagavonaga.

³⁷Na yakwilaga ha lusiku lwʼigolo aho vatelemukaga ku lugulu, mbuto nhanya ya vanhu yasangaja nawe.

³⁸Na lolagi, mugosya umo mugati na mbuto wahamukaga, Muhembeki, ndikwigongela umulole mwana wane, kwisi mwenuyu ali mwana umo duhu kuwane, na lolaga, mugavo gulimudima na itungo lili alilila, na

³⁹gulimusulungutya nʼifulo lilifuma, na gukavile kuzumya wangu kuleka kumuyugumbya.

⁴⁰Na navalombaga vahemba vako vagufumye,

⁴¹alisi vilagwa. Alisi uyu witavukaga, uhaya, Ee, vuvyalwa wʼivengwe na wa vutagike, nidamilizye hawinwe kusika nanali? Muletage mwana wako henaha.

⁴²Na aho wavagi alimwegela, mugavo gwamutenkaga na gwamusulungutaja; alisi Yesu waguhilimilaga mugavo gwa zoma, na wamupizaja muyanda na wamusyokaja kumwa ise. Na vose vavukumaja vuhanya wa Mulungu.

⁴³Alisi aho vose vavagi valigakumya gose genaya witaga, wavawilaga vahemba vakwe.

⁴⁴Mihayo yeniyi yingile mu matwi ginwe: Mwana wa Munhu ali bihi mu kutavulwa mu makono ga vanhu.

⁴⁵Alisi venava vavagi vakagumanikizye muhayo ugu, na gwavagi guvisilwe hambele navo, valeke kugumanicha; na vogohaga kumuvuzya kunguno ya muhayo gwenugu.

⁴⁶Na miganiko genaya gingilaga muwavo, imba nani mugati navo akuvi muhanya.

⁴⁷Na Yesu agamanikizye miganiko ga myoyo yayo, wasolaga mwana na wamutulaga bihi nawe na wavawilaga,

⁴⁸Homwene alimwanukula mwana mwenuyu mu lina lyane alinanukula nene, na homwene alinanukula nene alimwanukula mwenuyo wantumizizye; kwisi homwene ali mudo mugati ninwe vose, homwenuyu ali muhanya.

⁴⁹Haho Yohana witavukaga, uhaya, Guku, twamuvonaga munhu alizifumya migavo mu lina lyako, na twamuhangilizaja, kunguno akavile kutulonda iswe.

⁵⁰Alisi Yesu wavawilaga, Muleke kumuhangilizya, kwisi homwene akavile mukandi wiswe ali mwikinu.

⁵¹Na yakwilaga aho nsiku zya kulina kwakwe zyafikaga, mwenuyu wavutungilizaja vusyu wakwe kuja ku

⁵²Yerusalema, na wavatumizaja vatumwa hambele nawe; navo vajaga na vingilaga mu kaya yimo ya Vasamaria, kigele vamuvezezye hakupanga.

⁵³Na vakamwanukulile, kunguno vusyu wakwe walolaga kuja Yerusalema.

⁵⁴Na aho vahemba, Yohana na Yakobo, vayivonaga yeniyi, vayombaga, Guku, veve ulikova tulagile moto

⁵⁵gufume kwilunde kuvazimizya venava? Alisi uyu wikevelaga, wavadakilaga, uhaya, Mukamanikizye roho ki muli nayo.

⁵⁶Kwisi Mwana wa Munhu akizile kuzizimizya myuye zya vanhu, sumbwa kuzipizya. Na vajaga ku kaya yingi.

⁵⁷Na aho vavagi valija mu nzila, munhu umo wamuwilaga,

⁵⁸Nene nkukulonda kosekose uko ulija. Na Yesu wamuwilaga, Makeye gali na fivili na manoni ga mwilunde gali na fyali, alisi Mwana wa Munhu akavile na hakusagamizya mutwe gwakwe.

⁵⁹Na wamuwilaga ungi, Ndondage! Nawe wayombaga, Hambele umpe luhusa kumuzika vava.

⁶⁰Wamuwilaga, Uvaleke vafu vavazike vafu vavo, alisi veve uje kukavutanizya vutemi wa Mulungu hosehose.

⁶¹Na ungi wayombaga, Guku, nkukulonda veve, alisi hambele umpe luhusa kuvadahya va munumba yane.

⁶²Alisi Yesu wamuwilaga, Kuduhu munhu homwene walidimaga igembe na alikevela kunuma avelile ku vutemi wa Mu lungu.