Read Nyamwezi Yohana 1 Bible Online

Yohana 1 - Nyamwezi bible

Yohana 1

¹Ha mbuki MUHAYO gwavagiho, na MUHAYO gwavagiho hamwa Mulungu, na MUHAYO gwavagi Mulungu.

²HOGWENE gwavagi ha mbuki hamwa Mulungu.

³Finhu fyose fyatundilwe nago, na vuduhu nago kuduhu ninga kimo hochene chatundilwe.

⁴Na mugati nawe vuzuvuku wavagimo, na vuzuvuku wavagi mwanga gwa vanhu.

⁵Na mwanga gulimulika mu giti, na giti yikagwanukulile.

⁶Wigelaga munhu atumizivilwe na Mulungu, lina lyakwe Yohana.

⁷Mwenuyu wizaga kuvi vusangilwaho, asangilwe kunguno ya mwanga, kigele vose vasanizye mugati nawe.

⁸Mwenuyo wavagi akavile mwanga, sumbwa asangilwe kunguno ya mwanga:

⁹mwanga gwa loleyene, hogwene gulivezya vanhu vose, gwadima kwiza mu liwelelo.

¹⁰Wavagimo mu liwelelo, na liwelelo lyatundilwe nawe, alisi liwelelo lyavagi likamumanikizye.

¹¹Wizaga ha chakwe chene, na vakwe vene vakamwanukulile.

¹²Alisi hovene vamwanukulaga wavapaga vukovozi kuvi vana va Mulungu, hovene

¹³valilisanizya lina lyakwe; hovene vakavyalilwe ngʼo ku magazi ninga ngʼo ku kikowa cha nda ninga ngʼo ku kikowa cha munhu, sumbwa vavyalilwe na Mulungu.

¹⁴Na MUHAYO gwavagi munhu na wikalaga mugati niswe, na twaluvonaga lukumo lwakwe, lukumo kitisi lwa mwana umo inene hamwa nse, okalile kisa na hanayene.

¹⁵Yohana alisangilwa kunguno yakwe, wahamukaga, uhaya, Uyo ali mwenuyo nayombile: homwene akwiza hanuma yane, wavagiho hambele

¹⁶yane, kwisi wavagi kumbele na nene. Na ku vokale wakwe iswe vose twapivagwa kisa kwigulya na kisa.

¹⁷Kwisi ngʼhama yaletagwa na Mose, alisi kisa na hanayene yizaga na Yesu Kristo.

¹⁸Kufuma kale kuduhu umo wamuvonaga Mulungu; Mwana avyalilwe inene, homwene alimo mwitango lyamwa Vava, mwenuyu wamufumbulaga.

¹⁹Na wenuvu vuli vusangilwaho wamwa Yohana, aho Vayahudi vavatumizaja vahozya na Valeviti kufuma

²⁰Yerusalema, kigele vamuvuzye, Veve uli nani? Na uyu wazumaja na akakanile, wazumaja ati, Nene nkavile Kristo.

²¹Navo vamuvuzaja, Haho kinahe, uli Elia? Nawe wayombaga, Nkavile mwenuyo.

²²Uli mufumbuzi? Nawe witavukaga, Byololo. Haho vamuwilaga, Veve uli nani? kigele tuvitavuke venavo vatutumizaja; veve uliyombaki kunguno yako mwenekili?

²³Wayombaga, Nene ndi muzwi gwa umo alihamuka mwibalangu, Muyigelanizye nzila yamwa Guku, kitisi mufumbuzi Yesaya wayombaga.

²⁴Na avo vatumizivilwe na Vafarisayo.

²⁵Vamuvuzaja, vumuwila, Kuki lelo uloja, ulu ukavile Kristo ninga Elia ninga mufumbuzi?

²⁶Yohana wavitavukaga, uhaya, Nene ndiwoja na minzi,

²⁷alisi mugati ninwe imile mwenuyo inwe mukamumanikizye homwene aliza hanuma yane, nane nkasikile isima kumutungula mikova ya filatu fyakwe.

²⁸Genaya gakwilaga mu Betania kumwambu na Yordani kwenuko Yohana wavagiko aliwoja.

²⁹Hawangaluke Yohana wamuvonaga Yesu aliza kuwakwe na wayombaga, Lolagi Kadilana ka Mulungu

³⁰hokene kaliwinja vukenaguzi wa liwelelo! Uyu ali mwenuyo nene nayombile kunguno yakwe: hanuma yane aliza munhu homwene wavagiho hambele yane, kwisi wavagi kumbele na nene.

³¹Nane navagi nkamumanikizye, alisi kigele afumbulwe ku Israeli, kunguno yeniyi nizaga koja na minzi. Na Yohana wasangilagwa,

³²uhaya, Nene namuvonaga Roho wikaga kitisi nhunda kufuma kwilunde na wamwikalilaga.

³³Na nene navagi nkamumanikizye; alisi uyo wantumizaja koja na minzi wambwilaga, Homwene ulimuvona Roho alika na alikala kwigulya nawe, homwenuyu aloja na Roho Nsondo.

³⁴Na nene nayiwine na nasangililwe ati, mwenuyu ali Mwana wa Mulungu.

³⁵Hawangaluke Yohana wimagako hangi hamohene na vavili va vahemba vakwe.

³⁶Na wamuvonaga Yesu aliyumbayumbaho, na wayombaga, Lolagi Kadilana ka

³⁷Mulungu! Aho vahemba avo vavili vamwigagwa aliyomba, vamulondaga Yesu.

³⁸Na Yesu wikevelaga, na aho wavavonaga valimulonda, uvawila, Inwe mulikovaki? Navo vamuwilaga, Rabi, nguno yago: muhembeki, veve ulikala kuhe? Nawe wavawilaga, Mwize

³⁹Muvone! Navo vizaga na vavonaga uko wikalaga, na vadilaga hawakwe lusiku lwenulo, na yavagi kitisi saa ikumi.

⁴⁰Na umo mugati na venava vavili hovene vamwigagwa Yohana na vamulondaga wavagi Andrea, muduguye wamwa Simoni Petro.

⁴¹Na mwenuyu wamuvonaga hambele Simoni, muduguye mwenekili, na wamuwilaga, Iswe twamuvonaga Mesiya, nguno yago: Kristo;

⁴²na vamufilaga kumwa Yesu. Nawe wamulolaga, uhaya, Veve uli Simoni mwana Yohana, veve ukwitanwa Kefa, nguno yalyo: Petro (Itale).

⁴³Hawangaluke Yesu wakovaga kuvuka kuja ku Galilaya na wamuvonaga Filipo, na Yesu wamuwilaga,

⁴⁴Undonde nene! Nawe Filipo wavagi muna Betsaida, mwenumo vikalage Andrea na Petro.

⁴⁵Na Filipo wamuvonaga Natanaeli, umuwila, Iswe twamuvonaga mwenuyo kunguno yakwe Mose watonile mu ngʼhama na vafumbuzi, Yesu, mwana wamwa Yosefu, uyo wa Nazareti.

⁴⁶Natanaeli wamuwilaga, Ku Nazareti kalikovola kufuma kanhu kasoga?

⁴⁷Filipo wamuwilaga, Nzugu uvone! Yesu wamuvonaga Natanaeli aliza kuwakwe na wayombaga kunguno yakwe, Lolagi, Mwisraeli wa loleyene mugati nawe muduhu vugulugulu!

⁴⁸Natanaeli wamuwilaga, Veve ulinimanicha kufuma kuhe? Yesu witavukaga, umuwila, Nakuvonaga veve aho Filipo atali kukwitana, aho wikalaga hansilili na mukuyu.

⁴⁹Natanaeli wamwitavukaga, Rabi, veve uli Mwana wa Mulungu, veve uli mutemi wa Israeli.

⁵⁰Yesu witavukaga, umuwila, Veve ulisanizya kunguno nakuwilaga ati, nakuvonaga hansilili na mukuyu? Veve ukuvona mahanya kukila genaya.

⁵¹Na wamuwilaga, Yalole, yalole ndimuwila inwe, mukulivona ilunde lyalugukile na vamalaika va Mulungu valilina na valiwika kwigulya na Mwana wa Munhu.