Read Nyamwezi Yohana 10 Bible Online

Yohana 10 - Nyamwezi bible

Yohana 10

¹Yalole, yalole ndimuwila inwe, homwene akavile kwingilila ha muzigo gwa luvigili lwa ngʼholo alisi

²alitambukila kungi, ali mwivi na mudumuzi. Alisi homwene alingilila ha muzigo ali mudimi wa ngʼholo.

³Mulindilizi wa muzigo alimulugulila uyu, na ngʼholo ziligwigwa muzwi gwakwe, nawe alizitana ngʼholo zyakwe na mina gazyo na alizifumya hibala.

⁴Na ulu wazifumaja zyose zyakwe hibala alizitongela na ngʼholo zilimulonda kunguno ziligumanicha muzwi gwakwe.

⁵Alisi mugeni zikavile kumulonda na hado ngʼo, sumbwa zyumupela, kunguno zikagumanikizye muzwi gwa vageni.

⁶Mukolani gwenugu Yesu wavawilaga, alisi navo vavagi vakamanikizye nguno ya genaya wavawilaga.

⁷Haho Yesu wavawilaga hangi, Yalole, yalole, ndimuwila inwe, Nene ndi muzigo gwa ngʼholo.

⁸Alisi vose avo valivatongela hambele nane vali vivi na vadumuzi na ngʼholo zikavigilwe.

⁹Nene ndi muzigo; ulu umo alingila hawane akupiziwa, nawe akwingila na akufuma na akuvona ndima.

¹⁰Mwivi akavile kwiza sumbwa kigele ive na avulage na azimizye; nene nizile

¹¹kigele vave na vuzuvuku, navo vuve wingi. Nene ndi mudimi musoga. Mudimi musoga aliyipana myuye

¹²yakwe ku ngʼholo. Alisi mwitumamizya nawe akavile mudimi na ngʼholo zikavile zyakwe, ulu alivona nsuvi yiliza uzileka ngʼholo na upela, na nsuvi yuzidima na

¹³kuzisambazya, kwisi ali mwitumamizya duhu na akisusumile kunguno ya ngʼholo.

¹⁴Nene ndi mudimi musoga, na ndizimanicha zyane, nazyo zilinimanicha nene;

¹⁵kitisi Vava alinimanicha nene, nane ndimumanicha Vava; na ndiyipana myuye yane ku ngʼholo.

¹⁶Na ndi nazyo ngʼholo zingi hozyene zikavile zya muluvigili lwenulu, na zyenizi yandima kuzileta, na zikugwigwa muzwi gwane, na likuviho idale limo na mudimi umo.

¹⁷Kunguno yeniyi Vava alintogwa, kwisi ndiyipana myuye yane,

¹⁸kigele nayisole hangi. Na kuduhu umo akuyisola kuwane, sumbwa ndiyipana nene mwenekili. Ndi na. vukovozi wa kuyipana, ndi na vukovozi wa kuyisola hangi Mukumo gwenugu napivagwa na Vava.

¹⁹Hangi wavukaga vulekane mugati na Vayahudi kunguno ya mihayo yeniyi.

²⁰Na vingi mugati navo vayombaga, Ali nago mugavo na alisala, kuki mulimudegeleka?

²¹Vangi vayombaga, Mihayo yeniyi yikavile ya wa migavo; kinahe, wa migavo alikovola kugatunuzya minso ga muhofu?

²²Na sikukulu ya kulisondohya hangi isengelo mu Yerusalema yizaga, na lyavagi itungo lya mbeho.

²³Na Yesu wayumbayumbaga mwisengelo mu vukumbo wamwa Salomo.

²⁴Haho Vayahudi vamupilimaga, vumuwila, Kusika nanali ukuyiducha myuye yiswe? Ulu veve uli Kristo utuwile vuliko.

²⁵Yesu witavukaga, Namuwilile, ninwe mukavile kusanizya. Milimo hoyene ndivezya mu lina lyamwa Vava yilisangilwa kunguno yane.

²⁶Alisi mukavile kusanizya kunguno mukavilemo

²⁷mugati na ngʼholo zyane. Ngʼholo zyane ziligwigwa muzwi gwane, nane ndizimanicha, nazyo zilindonda;

²⁸nane ndizipa vuzuvuku wa hanahana; nazyo kuzimila ngʼo kusika hanahana; na kuduhu umo akumpuzya mu kukono kwane.

²⁹Vava homwene wampaga ali muhanya kukila vose, na kuduhu umo alikovola kuzinja mu kukono kwamwa Vava.

³⁰Nene na Vava tuli umo.

³¹Haho Vayahudi vasolaga hangi mawe kigele vamutulagule.

³²Yesu wavitavukaga, Milimo mingi misoga kufuma kumwa Vava namolekaja inwe; kunguno ya mulimo ki mugati nayo mulintulagula?

³³Vayahudi vamwitavukaga, Kunguno ya mulimo musoga tukavile kukutulagula mawe, sumbwa kunguno ya mafusano na kunguno veve, homwene uli munhu, uliwivezya ati uli Mulungu.

³⁴Yesu wavitavukaga, Kinahe, yikatonilwe mu ngʼhama yinwe, Nene nayombaga ati inwe muli milungu?

³⁵Ulu wavitanile venavo milungu hovene muhayo gwa Mulungu gwavasikilile—

³⁶na vutone vukakovolile kutungulwa—lumehoki muliyomba kunguno ya mwenuyu, homwene Vava wamusondohaja na wamutumizaja henaha mu liwelelo, ati, Alifusa, kunguno nayombaga, Nene ndi Mwana wa Mulungu?

³⁷Ulu nene nkavile kuvezya milimo yamwa

³⁸Vava muleke kusanizya; alisi ulu ndiyivezya muyisanizye milimo yenekili, nulu inwe mukavile kunsanizya nene, kigele mumaniche na musanizye ati Vava alimo muwane, nane ndimo mugati na Vava.

³⁹Haho vakovaga hangi kumudima, alisi uyu wafumaga mu makono gavo.

⁴⁰Na wajaga hangi kumwambu na Yordani uko Yohana

⁴¹wogaje hambele, na wadilaga kwenuko. Na vingi vizaga kuwakwe na vayombaga, Yohana akaguvezizye mugaka gumo, alisi gose genaya Yohana wayombaga kunguno ya mwenuyu gavagi gali ga lole.

⁴²Na vingi vamusanizaja kwenuko.