Read Nyamwezi Yohana 13 Bible Online

Yohana 13 - Nyamwezi bible

Yohana 13

¹Hambele na sikukulu ya Pasaka aho Yesu wamanikaja ati, itungo lyakwe lyafikaga afume ku liwelelo lyenili kuja kumwa Vava, kitisi wavatogagwa vanhu vakwe vavagimo mu liwelelo, sisyo wavatogagwa kusika ha mhelo.

²Na mwitungo lya chakulya cha mhindi, aho Shetani wamalaga kwingizya mu moyo gwamwa Yudasi, mwana Simoni Iskariote, malome ga

³kumugamba, na Yesu amanikizye ati Vava wamupaga gose mu makono gakwe, na ati wafumile kumwa Mulungu na ajile hangi kumwa Mulungu,

⁴alivuka hakulila na alizula nhanzo yakwe, wasolaga kitambala na winyepaga mwenekili.

⁵Haho aliditila minzi mwibakuli na wavukizaja kugagusa magulu ga vahemba vakwe na kugasyutula na kitambala hochene winyepaga nacho.

⁶Aho alifika kumwa Simoni Petro, uyu wamuwilaga, Guku, veve uligusa magula gane?

⁷Yesu witavukaga, umuwila, Cheniki ndivezya ukamanikizye lelo, alisi ulakimaniche haho.

⁸Petro alimuwila, Veve kungusa ngʼo magulu gane kusika hanahana. Yesu wamwitavukaga, Ulu nkavile kukugusa, veve ukavile na lusangi na nene.

⁹Simoni Petro wamuwilaga, Guku ngʼo magulu gane duhu, sumbwa na makono na mutwe gwene.

¹⁰Yesu wamuwila, Homwene wogivilwe akafundile hangi kuguswa sumbwa magulu duhu, alisi welaga vuliko;

¹¹na inwe mwelaga, alisi ngʼo vose. Kwisi wamumanikaja uyo mugambi wakwe; kunguno yeniyi wayombaga, Inwe mukelile vose.

¹²Aho wamalaga kugusa magulu gavo, wazwalaga myenda yakwe, wikalaga hangi na wavawilaga, Mulimanicha cheniki namuvezezaja inwe?

¹³Inwe mulinitana nene Muhembeki na Guku, na muliyomba sisoga, kwisi nene ndi mwenuyu.

¹⁴Haho ulu nene Guku na Muhembeki nagagusile magulu ginwe, yilimudima inwe vene kwigusa magulu.

¹⁵Kwisi navolekizye inwe lumeho, kigele inwe muvezye kitisi namuvezezizye inwe.

¹⁶Yalole, yalole ndimuwila inwe, mukumba akavile muhanya kukila gukuye, na mutumiziwa akavile muhanya kukila uyo wamutumizaja.

¹⁷Ulu muliyimanicha yeniyi, mwelukilwa inwe ulu muliyivezya yeniyi.

¹⁸Nkavile kuyomba sisyo kunguno yinwe vose; ndivamanicha avo navasogolile; alisi kigele vutone vufikile, Homwene alilya mukate hamohene na nene wambukizaja kisinzila chakwe.

¹⁹Lelo ndimuwila inwe yitali kukwila, kigele musanizye ulu yakwila ati nene ndi mwenuyu.

²⁰Yalole, yalole ndimuwila inwe, homwene alimwanukula uyu ndimutumizya nene, mwenuyu alinanukula nene; alisi homwene alinanukula nene alimwanukula mwenuyo wantumizaja nene.

²¹Aho Yesu wayombaga genaya watinginivilwe mu Roho na wasangilagwa, uhaya, Yalole, yalole ndimuwila Inwe ati, umo mugati ninwe akungamba nene.

²²Na vahemba vilolaga na visusihanaja kunguno yamwa nani aliyomba sisyo.

²³Umo wa vahemba vakwe wasendamilaga ha kikuva chamwa Yesu, uyo Yesu amutogilwe.

²⁴Haho Simoni Petro wamupalizaja mwenuyo

²⁵amuvuzye, Ali nani alimuyomba. Haho mwenuyo wasendamilaga ha kikuva chamwa Yesu wamuvuzaja, ali nani mwenuyu?

²⁶Yesu witavukaga, Homwene ndimukozezya itonge na kumupa. Na walikozaja itonge na alimupa Yudasi, mwana Simoni Iskariote. Na hanuma na itonge Shetani wingilaga muwakwe.

²⁷Na Yesu wamuwilaga, Cheniki veve ulita, wite wanguwangu.

²⁸Alisi kuduhu umo wa venavo vikalaga hakulila wamanikaja ngunoki wamuwilaga yeniyi;

²⁹kwisi vamo viganikaga ati, kunguno Yudasi wagusombaga mufuko gwa mapesa, Yesu wamuwilaga, Gulaga cheniki tulikifunda ha sikukulu, ninga avape vapina kinhu kimo.

³⁰Aho wamalaga kulisola itonge, wafumaga hanze itungo lyenilo; alisi wavagi vuziku.

³¹Aho uyo wafumaga Yesu alihaya, Lelo Mwana wa Munhu wakumukivagwa, na Mulungu wakumukivagwa mugati nawe. Ulu Mulungu wakumukivagwa mugati nawe, Mulungu mwene akumukumucha mugati nawe

³²mwenekili, na akumukumucha itungo lili. Vana, katungo kado duhu ndiho mugati ninwe; inwe mukunkova,

³³na kitisi navawilile Vayahudi, Uko nene ndija inwe mukakovolile kufikako, sisyo savasava ndimuwila inwe. Ndimupa inwe mukumo mupya, inwe mwitogwe hamohene, kitisi nene namutogilwe, sisyo sisyene inwe mwitogwe.

³⁴Mwenumo vose vakumanicha ati inwe muli vahemba vane, ulu muli nako kwitogwa.

³⁵Simoni Petro wamuwilaga, Guku, ulija kuhe? Yesu witavukaga, Uko ndija nene ukakovolile kundonda lelo alisi ulandonde haho.

³⁶Petro wamuwilaga, Guku, kuki nkakovolile kukulonda lelo? Nkuyipana myuye yane kunguno yako.

³⁷Yesu witavukaga, Kinahe, ukuyipana myuye yako kunguno yane? Yalole, yalole

³⁸ndikuwila veve ati, ikungulume kuhila ngʼo kusika wamalaga kunkana kadatu.