Read Nyamwezi Yohana 16 Bible Online

Yohana 16 - Nyamwezi bible

Yohana 16

¹Genaya namuwilile inwe muleke kugayilizya. Vakumulugalila inwe ku sinagogo, na itungo liliza ati homwene alimuvulaga inwe akwiganika alimutumamila Mulungu.

³Na vakwita genaya kunguno vakamumanikizye Vava ninga nene ngʼo.

⁴Alisi namuwilile inwe yeniyi, kigele ulu itungo lyafika muyizukile ati namuwilile inwe. Alisi yeniyi nkamuwilile kufuma mbuki, kunguno navagi hamohene ninwe.

⁵Alisi lelo ndija ku mwenuyo wantumizizye, na kuduhu umo mugati

⁶ninwe alimbuzya, Ulija kuhe? Sumbwa kunguno namuwilaga inwe yeniyi myoyo yinwe yokalaga na misayo.

⁷Alisi ndimuwila inwe hanayene, Yilimuvelela inwe nene ningeho; kwisi ulu nene kwingaho ngʼo Mugwasya kwiza ngʼo hawinwe; sumbwa ulu ndijako nkumutumizya hawinwe.

⁸Na ulu mwenuyu wamalaga kwiza akulilangisya liwelelo kunguno ya vukenaguzi na vugololoku na kitanga.

⁹Kunguno ya vukenaguzi,

¹⁰kwisi vakansanizizye; na kunguno ya vugololoku, kwisi ndija kumwa Vava, na inwe mukavile kumbona hangi;

¹¹kunguno ya kitanga, kwisi mutwale wa liwelelo lyenili watemilwe kitanga.

¹²Ntali ndi na mihayo mingi ya kumuwila inwe, alisi lelo mukakovolile kuyivucha.

¹³Alisi ulu mwenuyo wiza, Roho ya Hanayene, akumulondola inwe mugati na hanayene yose, kwisi mwenuyu kuyomba ngʼo kufuma kuwakwe mwenekili, sumbwa gose genayo aligwa akuyomba, na akumutanizya inwe genaya galize.

¹⁴Mwenuyo akunkumucha nene, kunguno akusola ku genaya gane na akumutanizya inwe.

¹⁵Gose genaya Vava ali nago gali gane, kunguno yeniyi nayombaga ati, akusola ku genaya gane na akumutanizya inwe.

¹⁶Katungo kado ninwe kumbona ngʼo hangi, na hangi katungo kado inwe mukumbona hangi.

¹⁷Haho vamo va vahemba vakwe vayombaga hamohene, Muhayo ki gwenugu alituwila, Katungo kado inwe kumbona ngʼo hangi, na hangi katungo kado mukumbona nene, na gwenugu, Nene

¹⁸ndija kumwa Vava? Na vayombaga, Muhayo ki ugualiyomba, Katungo kado, tukamanikizye yeniyi aliyomba.

¹⁹Yesu wamanikaja ati valikova kumuvuzya na wavawilaga, Kinahe, muliwivuzya kunguno nayombaga, Katungo kado inwe kumbona ngʼo, na hangi

²⁰katungo kado inwe mukumbona nene? Yalole, yalole ndimuwila inwe ati, inwe mukulila na mukwanaguka, alisi liwelelo likudeha; inwe mukusaya, alisi misayo yinwe yikupiluka ha kudeha.

²¹Mukima ulu alivyala ali na misayo kunguno itungo lyakwe lyafikaga; alisi ulu wamuvyalaga mwana, akavile kuwizukila hangi vusungu wakwe kunguno ya kudeha ati munhu wavyalilwe henaha mu liwelelo.

²²Sisyo inwe lelo muli na misayo, alisi nkumuvona inwe hangi, na moyo gwinwe gukudeha, na kuduhu umo akumupuzya inwe kudeha kwinwe.

²³Na ha lusiku lwenulo inwe kumbuzya nene ngʼo muhayo gumo. Yalole, yalole ndimuwila inwe, icho mukumulomba Vava akumupa inwe mu lina lyane.

²⁴Kusika lelo mukalombile kinhu mu lina lyane; mulombe na inwe mukupiwa, kigele kudeha kwinwe kukwile vuliko.

²⁵Genaya namuwilaga inwe mu mikolani; alisi itungo liliza nene kuyomba ngʼo hangi ninwe mu mikolani, sumbwa nkumuwila inwe hape mhola yamwa Vava.

²⁶Ha lusiku lwenulo inwe mukulomba mu lina lyane, na nkavile kumuwila ati nkumulombela hamwa Vava,

²⁷kwisi Vava mwenekili alimutogwa, kunguno mwantogagwa nene na mwasanizizye ati nafumile kumwa Mulungu.

²⁸Nene nafumile kumwa Vava na nizile henaha mu liwelelo; hangi ndilileka liwelelo na ndija kumwa Vava.

²⁹Vahemba vakwe valihaya, Lolaga, lelo uliyomba hape na ukavile kuyomba hangi mu mukolani.

³⁰Lelo tulimanicha ati uligamanicha gose na ukafundile umo akuvuzye; kunguno yeniyi tulisanizya ati veve wafumile kumwa Mulungu.

³¹Yesu wavitavukaga, Lelo mulisanizya?

³²Lolagi, itungo liliza na lyafikaga ati inwe mukusambaziwa umo umo kuwakwe, na mukundeka nene ninene; alisi nene nkavile ninene, kwisi Vava aliho hamohene na nene.

³³Genaya namuwilile inwe, kigele muve nako kuhola mugati na nene; mu liwelelo muli nago mamikosi, alisi mwidibage moyo, nene nalikindile liwelelo.