Read Nyamwezi Milimo 11 Bible Online

Milimo 11 - Nyamwezi bible

Milimo 11

¹Haho vatume na vadugu hovene valikala mu Yudea, vigagwa ati vapagani vene vagwanukulaga muhayo gwa Mulungu.

²Aho Petro walinaga ku Yerusalema, avo hovene vatahirivilwe viyanilizaja nawe, vuhaya,

³Veve wingilagamo mu vanhu, vakatahirivilwe, na walyaga hamohene navo.

⁴Alisi Petro wavukizaja kuvalangisya na ludonho, uhaya, Nadilaga mu Yope na nalombaga, na mugati na kukayilwa navonaga

⁵wigele, kiseme kitisi mwenda muhanya gutungilwe ku mapembo gose anne gwikaga kufuma kwilunde, na gwanifikilaga.

⁶Aho nakisunukilaga, na nakilolelaga, nazivonaga ndimu zya magulu anne zya liwelelo, na ndimu zya mwipolu, na ndimu ziliselema, na manoni

⁷gʼilunde. Hangi nigagwa muzwi gwambwilaga, Uvuke

⁸Petro, usinze na ulye. Alisi nayombaga, Byololo Guku; kwisi kitali kwingila mu mulomo gwane cha mwiko ninga cha zoma.

⁹Hangi ka vuvili muzwi gwitavukaga kufuma kwilunde, Cheniki Mulungu wakigusaga uleke kukitana cha zoma.

¹⁰Genaya gakwilaga

¹¹kadatu, haho gose galinivagwa kwilunde. Lolaga, itungo lili vanhu vadatu vimaga ha numba, mwenumo navagimo, vatumizivagwa kuwane kufuma ku Kesarea.

¹²Na Roho wambwilaga, naje hamohene navo vuduhu himba, Na vadugu venava mkaga vene vajaga hamohene nane, na twingilagamo mu numba ya munhu

¹³uyo, Nawe watusunsumulilaga, kitisi wamuvonaga malaika wingilagamo mu numba yakwe, na wahayaga, Utumizye ku Yope, na umusungane Simoni, homwene alitanwa Petro.

¹⁴Homwene akukuwila mihayo, ku yeniyo veve ukupiziwa hamohene na vose va munumba yako.

¹⁵Aho navukizaja kuyomba, Roho Nsondo wavikilaga, kitisi watwikilaga iswe ha mbuki.

¹⁶Haho nagwizukilaga muhayo gwa Guku kitisi wayombaga, Yohana wogaja na minzi; alisi inwe mukogiwa na Roho Nsondo.

¹⁷Ulu Mulungu wavapaga kipanwa savasava kitisi iswe, aho twamusanizaja Guku Yesu Kristo, na mutindo ki nene nakovolaga kumuhangilizya Mulungu?

¹⁸Aho vagigagwa genaya vahulikaga, na vamukuzaja Mulungu, navo vayombaga, Kasinaga Mulungu wavapaga vapagani kunogoleka, vapiwe vuzuvuku.

¹⁹Venavo hovene vasambalaga kunguno ya mamikosi, hogene gavukaga kunguno yamwa Stefano, vayumbaga kusika Ufoniki na Kipro na Antiokia vuduhu kugutanizya muhayo, sumbwa ku Vayahudi vinene.

²⁰Alisi vangi mugati navo, vavagi vanhu va Kipro na Kirene, hovene aho vafikaga ku Antiokia, vavatanizaja Vagriki mhola ya chelu kunguno ya Guku Yesu.

²¹Kukono kwa Mulungu kwavagi hamohene navo, na vanhu vingi vasanizaja, na vapilukilaga kumwa Guku.

²²Mhola kunguno yavo yafikaga hambele na matwi ga vʼivilingano mu Yerusalema, navo vamutumaga Barnaba ku Antiokia.

²³Aho wafikaga, na wavonaga kisa cha Mulungu wadehaga, na wavahanaga vose vadimane na Guku na moyo gose.

²⁴Kwisi wavagi munhu musoga, okalile Roho Nsondo nʼisanizyo, na mbuto nhanya yafilagwa kumwa Guku.

²⁵Haho wajaga ku Tarso kumukova Saulo, na aho wamuvonaga wamufilaga ku Antiokia.

²⁶Na yakwilaga ati vikalaga hamohene mwaka gumo mwivilingano, na vavahembekaga vingi, na vahemba vitanagwa Vakrista ho kambele mu Antiokia.

²⁷Mu nsiku zyenizyo vafumbuzi vikaga kufuma Yerusalema kufika ku Antiokia.

²⁸Umo mugati navo, lina lyakwe Agabo, wavukaga na wafumbulaga mugati na Roho, ati nzala nhanya yikwiza mu liwelelo lyose, nayo yizaga mu nsiku zyamwa Klaudio.

²⁹Na vahemba vagelanizaja, umo na umo hanuma na nguzu zyakwe, kuvatumizizya vadugu nsavo, hovene vikalaga mu Uyahudi.

³⁰Navo vavezaja syenisyo, na vavafililaga vanamhala ku makono gamwa Barnaba na Saulo.