Read Nyamwezi Milimo 12 Bible Online

Milimo 12 - Nyamwezi bible

Milimo 12

¹Mu nsiku zyenizyo mutemi Herode wavadimaga

²vamo vʼivilingano avaduche. Na wamuvulagaga. Yakobo muduguye wamwa Yohana na lupanga.

³Aho wavonaga ati gavatogezaja Vayahudi, wamudimaga savasava Petro mu nsiku zya migate zikatumbile.

⁴Aho wamudimaga wamutulaga mu jela, na wamupanaga ku fiheli finne, kila kiheli valugaluga vanne, vamulindile; kwisi walomaga kumufumya hambele na vanhu hanuma na Pasaka.

⁵Sisyo Petro walindilagwa mu jela;

⁶alisi vʼivilingano vamulombelaga vuduhu koya. Alisi aho Herode wakovaga kumufumya, vuziku wenuvo Petro walalaga hagati na valugaluga vavili, atungilwe na minyololo ivili, ha muzigo valindilizi vayilindilaga jela.

⁷Lolaga malaika wa Mulungu wimagaho bihi, na lumole lwamulikaga mwʼisenge, na wamutulaga Petro mu luvazu, wamumisaja, uhaya, Vukaga wangu! Na minyololo yalagalaga ku makono gakwe.

⁸Hangi malaika wamuwilaga, Witunge, na uzwale filatu fyako, nawe witaga sisyo. Na wamuwilaga, Uzwale nhanzo

⁹yako, undonde. Haho wafumaga na wamulondaga, na akamanikizye ati genaya gakwilaga na malaika gavagi ga lole, sumbwa wiganikaga ati wavonaga wigele,

¹⁰Aho vavitaga vulindilizi wa mbele na wa vuvili, vafikaga ha muvita gwa chuma gwa kwingilila mu kaya, gwenugu gwalugukaga gwenekili kuwavo; navo vafumaga na vavitaga igeta limo, na itungo lili malaika wamulekaga.

¹¹Aho moyo gwamwa Petro gwazikaga, wahayaga, Lelo ndimanicha loleyene ati Guku wamu tumizaja malaika wakwe, na wampizaja ku kukono kwa Herode na ku vulindilizi vose wa vanhu va Vayudayi.

¹²Aho wavagi aliganika genaya wasikaga ku numba yamwa Maria, nina wamwa Yohana homwene alitanwa Marko. Mwenumo vakundihanaga vingi mu kulomba.

¹³Aho waguluguzaja mwango gwa vukumbo wizaga mukumba mukima, lina lyakwe Rode, adegeleke.

¹⁴Aho wagumanikaja muzwi gwamwa Petro, akalugulile muzigo kunguno ya kudeha, sumbwa wingilaga mwega mu numba, na wavawilaga, ati Petro imile ha muzigo.

¹⁵Na vamuwilaga, Uli musazi. Alisi aho walambaga kuyomba ati yili syenisyo, vayombaga, Ali malaika wakwe.

¹⁶Alisi Petro wajamaga kuluguzya, na

¹⁷aho valugulaga, vamuvonaga na vitilulaga. Haho wavahungezezaja na kukono vahulike, na wavasunsumulilaga kitisi Guku wamufumaja ku jela, na wayombaga, Mumupozezye Yakobo na vadugu mhola yeniyi.

¹⁸Haho wafumaga, na wajaga kungi. Hawangaluke valugaluga vitilulaga muno kunguno ya genaya gamukwililaga Petro.

¹⁹Aho Herode wamukovaga, alisi akamuwine, wavavuzaja valindilizi, na walagilaga vavulagwe. Haho wafumaga ku Uyahudi na wikaga ku Kesarea, na wadilaga kwenuko.

²⁰Lelo Herode wavagi na nsika na vana Tiro na Sidoni, na vose vajaga hamohene kuwakwe, na aho vamugadaga Blasto, kasika lufungulo wa numba ya mutemi, kunwana navo walombaga kuhola, kunguno vahemelaga chakulya mu nsi ya mutemi.

²¹Ha lusiku ulo lwakindikilwe Herode wazwalaga myenda ya kitemi,

²²wikalaga hʼisumbi lya kitemi, na watangilaga. Na vanhu vahamukaga, Guli muzwi gwa Mulungu, gukavile muzwi gwa munhu.

²³Itungo lili malaika wa Guku wamutulaga, kunguno akamupile Mulungu lukumo; walivagwa na masimi, na wadahaja moyo.

²⁴Muhayo gwa Mulungu gwakulaga, na gwasambalaga.

²⁵Aho Barnaba na Saulo vamalizaja vutumwa wavo, vasyokaga kufuma ku Yerusalema, na vamwizanaga Yohana alitanwa Marko.