Read Nyamwezi Milimo 14 Bible Online

Milimo 14 - Nyamwezi bible

Milimo 14

¹Yakwilaga mu Ikonio, ati vingilaga hamohene mu sinagogo ya Vayahudi, na vatanizaja kusika mbuto nhanya ya Vayahudi na Vagriki vasanizaja.

²Alisi Vayahudi hovene vakasanizizye, vavagomesaja vapagani vavagaye vadugu.

³Vadilaga kwenuko nsiku ningi, na vatanizaja na vugimu mugati na Guku, homwene wasangilagwa ku muhayo gwa kisa chakwe, mugati na kuvezya malumeho na migaka ku makono gavo.

⁴Alisi mbuto ya vanhu mu kaya yalekanaga, vamo vadimanaga na Vayahudi na vangi na vatume.

⁵Alisi Vapagani na Vayahudi vivilingaga hamohene na vahanya vavo kuvagulazya na kuvatulagula mawe.

⁶Aho vagigagwa vapelelaga ku makaya mu Likonia,

⁷na Listra, na Derbe, na munsi zya bihibihi, na kwenuko vatanizaja Mhola ya Chelu.

⁸Mu Listra wikalaga munhu, homwene wavagi mulwile wa magulu, mulema kufuma mu nda yamwa nina, atali kuyumba ninga hado.

⁹Mwenuyu wamwigagwa Paulo, aho watanizaja, na uyo wamwikomaja, na wavonaga ali na luhigi lwa kupiziwa, na wayombaga na muzwi muhanya, Uvuke, na wime ku magulu gako.

¹⁰Nawe wavukaga na kudumuka, na wasimizaga.

¹¹Aho mbuto zya vanhu vavonaga genaya Paulo wavezaja, vahamukaga mu Kilikaonia, Milungu yikaga kuwiswe mu musimo gwa vanhu.

¹²Navo vamwitanaga Barnaba Zeu na Paulo Herme; kwisi mwenuyu wavagi muyombi.

¹³Na muhozya wa Zeu, homwene wavagi nalyo isengelo hanze na kaya, waletaga ngʼombe na ngala ha mivita, na wakovaga kuhozya hamohene na mbuto.

¹⁴Aho vatume Paulo na Barnaba vayigagwa, vatandulaga myenda yavo, vayidumukilaga mbuto, vahamukaga,

¹⁵vahaya, Vagosya, kungunoki mulita genaya? Iswe tuli vanhu duhu kitisi inwe, na tulimutanizya mhola ya chelu, muleke finhu fyenifi fya gele, na mupilukile kumwa Mulungu muzuvuku, homwene watundaga

¹⁶ilunde na liwelelo na nyanza na gose galimo, na homwene mu nsiku zyavitile wavalekaga vapagani vose vasimize nzila zyavo venekili.

¹⁷Nulu akilekile mwenekili vuduhu vusangilwa, sumbwa wavezaja sisoga, na wavapaga mbula kufuma kwilunde na matungo ga wimbuzi vusoga, na wayigutaja myoyo yinwe na filiwa na kudeha.

¹⁸Aho vayombaga sisyo, yasigalaga hado duhu valeke kuzihangilizya mbuto kuvatambila.

¹⁹Haho vizaga Vayahudi kufuma ku Antiokia na Ikonio, na vazisemenganaja mbuto zya vanhu, navo vamutulagulaga Paulo mawe, na vamudutaga hanze na

²⁰kaya, na viganikaga ati wafwaga. Alisi aho vahemba vamupilimaga wavukaga na wingilaga mu kaya. Hawangaluke wajaga ku Derbe hamohene na Barnaba.

²¹Aho vatanizaja Mhola ya chelu mu kaya yeniyi, na vagadaga vahemba vingi, haho vasyokaga ku Listra na Ikonio na Antiokio.

²²Vazijamilizaja myoyo zya Vahemba, na vavahimagizaja vajame mwisanizyo, na ati yilitudima kwingila mu vutemi wa Mulungu mu nzila ya mamikosi mingi.

²³Na mu mavilingano gose vavatulaga vanamhala, na mugati na kulomba na kufunga vavalagilaga kumwa Guku, homwene vamusanizaja.

²⁴Navo vahingulaga Pisidia, na vafikaga ku Pamfilia,

²⁵Na aho vatanizaja muhayo mu Perge vikaga ku Atalia.

²⁶Kufuma henaho vavugaga kusika ku Antiokia; kwenuko valivalagilagwa hambele na kisa cha Mulungu ku milimo yeniyi hoyene lelo vayimalizaja.

²⁷Aho vafikaga, valivilingaga ivilingano, navo vavasunsumulilaga gose, hogene Mulungu wavezaja hamohene navo, na kitisi

²⁸wavalugulilaga vapagani muzigo gwʼisanizyo. Navo vikalaga nsiku ningi hamohene na vahemba.