Read Nyamwezi Milimo 15 Bible Online

Milimo 15 - Nyamwezi bible

Milimo 15

¹Vanhu vamo vikaga kufuma Uyahudi, na vavahembekaga vadugu ati, Ulu mukatahirivilwe hanuma na

²kitilwe chamwa Mose, mukakovolile kupiziwa. Aho Paulo na Barnaba viyanilizaja na vatonganaga navo, haho yapimagwa, ati Paulo na Barnaba na vangi mugati navo valine ku Yerusalema ku vatume na vanamhala kunguno ya luvuzi lwenulu.

³Venava vafililizivagwa nʼivilingano, na vahingulaga Ufoniki na Samaria, na henaho vasunsumulaga kunguno ya kunogoleka kwa vapagani, na syenisyo vavadehelezaja vadugu vose muno.

⁴Aho vafikaga ku Yerusalema, vanukulagwa nʼivilingano na vatume na vanamhala, na vavapozezaja gose hogene Mulungu wavezaja hamohene navo.

⁵Alisi vavukaga vamo va kiheli cha Vafariseo, hovene vasanizaja, vuhaya, Yilivadima kutahiriwa, na valagilwe kuyilindila nhama ya Mose.

⁶Vatume na vanamhala vivilingaga vitozye kunguno ya muhayo gwenugu.

⁷Aho viyanilizaja muno, Petro wimilaga, na wavawilaga, Inwe vagosya vadugu, mulimanicha, ati mu nsiku zyavitile Mulungu wasogolaga mugati ninwe, ati vapagani vagwigwe muhayo gwa Mhola ya chelu ku mulomo

⁸gwane, na vasanizye. Na Mulungu homwene alimanicha myoyo, wasangilagwa kunguno yavo aho wavapaga Roho Nsondo savasava kitisi iswe.

⁹Ninga akavezizye vulekane mugati niswe navo, aho wavagusaga

¹⁰myoyo yavo mugati nʼisanizyo. Kuki lelo mulimugema Mulungu na kuvadwika vahemba muligo, hogwene ninga vansiswe ninga iswe tukakovolile kuguvucha?

¹¹Sumbwa tulisanizya, ati tukupiziwa na kisa cha Guku Yesu, savasava kitisi navo.

¹²Haho mbuto yose yahulikaga, na vavadegelekaga Barnaba na Paulo vadenhemule kunguno ya migaka na malumeho gose, hogene Mulungu wavezaja hamohene navo mugati na vapagani.

¹³Aho vamalaga kuyomba, Yakobo witavukaga, uhaya

¹⁴Inwe vagosya vadugu, munidegeleke, Simoni wasunsumulaga, kitisi Mulungu wavukizaja kulisolanizya lina lyakwe vanhu mugati na vapagani.

¹⁵Nayo mihayo ya vafumbuzi yiligelanila, kitisi yatonilwe,

¹⁶Hanuma na genaya ndasyoke, Nazenge hangi numba yamwa Davidi, hoyene yabomokile; Itongo lyayo nkulizenga na kulikindika hangi;

¹⁷Kigele vanhu, hovene valisigala, vamukove Guku, Navo vapagani vose, hovene vatanizivilwe lina lyane, Alihaya Guku homwene alivezya genaya.

¹⁸Mulungu aliyimanicha milimo yakwe yose kufuma mbuki ya liwelelo.

¹⁹Kunguno yeniyi ndiganika ati, tuleke kuvaducha vapagani, hovene valimupilukila Mulungu.

²⁰Sumbwa tuvatonele vihege kwiyilavuzya na fimbulimbuli, na vusihya, na nyama zinigilwe, na magazi.

²¹Kwisi kufuma kale Mose ali navo vanhu mu makaya gose, hovene valiyitanizya mihayo yakwe, na yilisomwa kila sabato mu masinagogo.

²²Haho vatume na vanamhala hamohene nʼivilingano lyose vagelanizaja kuvasogola vanhu vamo mugati navo na kuvatuma ku Antiokia hamohena na Paulo na Barnaba; vavagi Yuda alitanwa Barsaba, na Sila,

²³vanhu vʼisima mugati na vadugu. Na vatonaga syenisyo ku makono gavo, Vatume na vanamhala na vadugu, ku vadugu hovene valifuma ku vapagani, mu

²⁴Antiokia Shami na Kilikia, tulimugisya. Kunguno twigagwa ati vamo hovene vafumaga kuwiswe, vamutavanaja na mihayo, na vayivipaja myuye yinwe vuduhu kulagilwa niswe.

²⁵Lelo twivilingaga na twagelanizaja hamohene na moyo gumo kusogola vanhu na kuvatuma kuwinwe hamohene na vatoneke viswe

²⁶Barnaba na Paulo, vanhu hovene vagimaga kuvutavula vuzuvuku wavo kunguno ya lina lyamwa Guku wiswe Yesu Kristo.

²⁷Sisyo twavatumaga Yuda na Sila, hovene vakumuwila genaya ku mulomo.

²⁸Kwisi yili ndaka ya Roho Nsondo hamohene niswe tuleke kumudwika inwe muligo gungi,

²⁹sumbwa genaya galigela nila ati mwisunde ku fitambo fya fimbulimbuli, na magazi, na nyama zinigilwe, na vusihya. Ulu muligaleka genaya mukuvezya. Mwikale mhola.

³⁰Haho vavatavulaga, navo vikaga ku Antiokia, henaha vayivilingaga mbuto na vavapaga barua.

³¹Aho vayisomaga, vadehaga kunguno ya kuhulikiwa kwenuko.

³²Na Yuda na Sila hovene vavagi vafumbuzi venekili vavahimagizaja vadugu na mihayo mingi, na vavajamilizaja.

³³Aho vikalaga kwenuko nsiku zimo, vadugu vavatavulaga vasyoke mu kuhola ku venavo vavatumaga.

³⁴Sumbwa Sila watogagwa kwikala kwenuko.

³⁵Na Paulo na Barnaba vikalaga mu Antiokia, hokwene vahembekaga na vatanizaja muhayo gwa Guku hamohene na vangi.

³⁶Hanuma na nsiku Paulo wamuwilaga Barnaba, Kako tusyoke hangi kuvageniha vadugu mu makaya gose, homwene twatanizaja muhayo gwa Guku, tulole kitisi valikala.

³⁷Na Barnaba wakovaga kumujana Yohana, homwene alitanwa Marko.

³⁸Alisi Paulo wiganikaga ati yikavelile kumujana mwenuyo wavalekaga mu Pamfilia, na akajile navo ku milimo.

³⁹Kunguno yeniyi vatonganaga muno na valekanaga, Barnaba wamujanaga Marko na wavugaga kusika ku Kipuro.

⁴⁰Sumbwa Paulo wamusogolaga Sila, na wajaga aho walagilagwa na vadugu ku kisa cha Mulungu.

⁴¹Nawe wayumbayumbaga mu Shami na Kilikia na wagajamilizaja mavilingano.