Read Nyamwezi Milimo 16 Bible Online

Milimo 16 - Nyamwezi bible

Milimo 16

¹Aho wafikaga ku Derbe na Listra, lolaga, wavagiho muhemba lina lyakwe Timoteo, mwana wa mukima Muyahudi homwene wasanizaja, alisi ise wavagi Mugriki.

²Mwenuyu wavagi na vusangilwa vusoga mugati na vadugu mu Listra na Ikonio.

³Paulo wakovaga mwenuyu aje hamohene nawe, na wamutahiri kunguno ya Vayahudi hovene vikalaga mu makaya aga, kwisi vose vamanikaja ati ise wavagi Mugriki.

⁴Aho vayumbaga mu makaya vavapaga maludonho genayo gakindikilwe na vatume na vanamhala mu Yerusalema vagalindile.

⁵Sisyo mavilingano gajamilizivagwa mwisanizyo, na luvalo lwavo lwingihaga nsiku zyose.

⁶Vahingulaga nsi ya Frigia na ya Galatia kunguno vahangilizivagwa na Roho Nsondo kutanizya muhayo mu Asia.

⁷Aho vafikaga ku Misia vagemaga kuja ku

⁸Bitinia, alisi Roho yamwa Yesu akavazumilizizye. Haho vavitaga Misia na vikaga ku Troa. Ha vuziku

⁹wigele wizaga kumwa Paulo, munhu wa Makedonia wimagaho na wamulombaga, Uvuke ku Makedonia na utugwasye.

¹⁰Aho wavuvonaga wigele wenuvu itungo lili twakovaga kuvuka ku Makedonia, kwisi twamanikaja loleyene ati Mulungu watwitanaga tufikeko tuvatanizye Mhola ya Chelu.

¹¹Haho twavugaga kufuma ku Troa na twajaga kusika

¹²Samotrake na hawangaluke kusika Neapoli, kufuma kwenuko twajaga ku Filipi, kaya nhanya ya Varoma mwʼigunguli lyenili lya Makedonia. Mu kaya yeniyi twikalaga nsiku zimo.

¹³Ha sabato twafumaga hanze na muvita na twafikaga ha mongo, henaho twiganikaga haliho hakulomba. Henaho twikalaga na twavasunsumulilaga vakima hovene vivilingaga.

¹⁴Wavagiho mukima, lina lyakwe Lidia, musuluzya wa rangi ya za, muna Tiatira, mwenuyu wamogohaga Mulungu, nawe wadegelekaga. Na Guku wamulugulilaga moyo gwakwe ayisyeche mihayo yamwa Paulo.

¹⁵Aho wogivagwa hamohene na va munumba yakwe, wavalombaga, uhaya, Ulu mulinivona nene kitisi mudamu hambele na Guku, mwingilage mu numba yiswe na mwikalemo. Nawe watwikumbilizaja.

¹⁶Yakwilaga aho twavagi tujile henaho hakulombela twasangaja na mukima homwene wavagi nayo roho ya kufumbula, nawe wavasavilaga vagukuye nsavo ningi na vufumbuzi wakwe.

¹⁷Uyu wamulondaga Paulo niswe na wahamukaga, uhaya, Vanhu ava vali vakumba va Mulungu wa higulya muno, valimutanizya inwe nzila ya vupizya.

¹⁸Genaya witaga nsiku ningi. Haho Paulo wagayaga, wikevelaga, na wayiwilaga roho, Ndikulagila mu lina lyamwa Yesu Kristo ufume muwakwe. Nayo yafumaga itungo lyenilo.

¹⁹Aho vagukuye vavonaga ati isigizyo lyavo lya vusulu lyamalaga vavadimaga Paulo na Sila, vavadutaga kusika higulilo hambele na vahanya.

²⁰Vavafilaga hambele na vayanguzi na vayombaga, Vanhu venava hovene vali Vayahudi valiyivipya kaya yiswe.

²¹Navo valitanizya fitilwe, hofyene tukavile na luhusa kufyanukula

²²ninga kufilonda, kwisi tuli Varoma. Haho mbuto yavukaga kuvatinga, na vayanguzi vavazulaga myenda

²³zyavo, na valagilaga vavatulagule milanga. Aho vamalaga kuvatulagula milanga mingi vavafilaga mu jela, na vamulagilaga mulindilizi avalindile sisoga.

²⁴Kunguno wapivagwa ilagilizyo lyenilo wavatulaga mwisenge lya mugati, na wavatungaga magulu mu matendele.

²⁵Havuziku hagati Paulo na Sila valombaga na vamwimbilaga Mulungu magongozi, na vatungwa vavadegelekaga.

²⁶Kisalasala chene yizaga nyamuditimya sisyo misingi ya jela yatinginaga, na itungo lyenilo mizigo yose yalugukaga, na minyololo ya vose yatungukaga.

²⁷Aho mulindilizi wamisaja ku tulo na wavonaga mizigo ya jela yalugukaga, wasopolaga lupanga na wakovaga kwivulaga, kwisi wiganikaga ati vatungwa vatolokaga.

²⁸Alisi Paulo wahamukaga na kilaka, uhaya Ukigulazye

²⁹ngʼo, kwisi tuliho vose. Haho walagilaga tala ziletwe na wadumukilaga mugati alidetema, na wagwaga ha magulu gamwa Paulo na Sila.

³⁰Haho wavafumaja hanze na wahayaga, Vaguku vane, niteki kigele napiziwe?

³¹Navo vayombaga, Umusanizye Yesu Kristo,

³²haho ukupiziwa, veve na va mu numba yako. Na vamutanizaja muhayo gwa Guku na ku vose va mu numba yakwe.

³³Haho wavanukulaga mu saa yeniyi ya vuziku na wavagusaga filonda, na itungo lyenilo wogivagwa mwenekili na vose vakwe.

³⁴Na wavafilaga higulya mu numba yakwe, wavavonekaja na wadehaga hamohene na vose va mu numba yakwe, kunguno wamusanizaja Mulungu.

³⁵Ha wangaluke vayanguzi vavatumaga valugaluga na

³⁶vayombaga, Muvalekule vanhu ava vaje. Mulindilizi wamuwilaga Paulo mihayo yeniyi, Vayanguzi valetaga mhola ati mutungulwe, lelo mufume na muje na kuhola.

³⁷Alisi Paulo wavawilaga, Vatutulagulaga hawelekela vuduhu kuyangulwa, iswe hovene tuli Varoma, na vatutulaga mu jela na lelo valikova kutufumya mu lwiviso?

³⁸Ngʼo, vize venekili kutufumya. Na valugaluga vavapaga vayanguzi mhola yeniyi, navo vogohaga aho vigagwa ati vali Varoma.

³⁹Haho vizaga na vavikumbilizaja, na vavafumaja, na vavalombaga vafume ku kaya yeniyi.

⁴⁰Haho vafumaga ku jela, na vingilaga mu numba, yamwa Lidia, na aho vamalaga kuvavona vadugu na kuvahulicha, vajaga.