Read Nyamwezi Milimo 17 Bible Online

Milimo 17 - Nyamwezi bible

Milimo 17

¹Aho vahingulaga Amfipoli na Apolonia, wafikaga ku Tesalonika, hokwene yavagiko sinagogo ya Vayahudi.

²Hanuma na kitilwe chakwe Paulo wingilaga kuwavo, na witozaja navo kunguno ya mihayo ya vutone ha sabato idatu.

³Wafumbulaga na walangisaja ati yamudima Kristo kuduka na kuhembuka ku lufu, na wayomba, Mwenuyu Yesu homwene ndimutanizya

⁴inwe, ali Kristo. Na vamo mugati navo vagadagwa na vadimanaga na Paulo na Sila, hamohene na mbuto nhanya ya Vagriki hovene vamogohaga Mulungu na

⁵vakima vingi vʼisima. Haho Vayahudi vadimagwa nʼivuva, vavasolaga vanhu vamo vavi higulilo hovene vakavile na milimo, vayikumingaga mbuto ya vanhu na vayisemenganaja kaya. Haho vayegelaga numba yamwa Yasoni, na vavakovaga kigele vavafumye ku vanhu.

⁶Aho vavagayivagwa vavakulumulaga Yasoni na vadugu vamo hambele na vahanya va kaya na vahamukaga, Venavo hovene valivipaja liwelelo lyose vizaga na kunu.

⁷Na avo Yasoni wavanukulaga, na vose valiyivita mikumo ya Kaisari, na valiyomba ati

⁸ungi ali mutemi, homwene Yesu. Na vayidukangaga mbuto hamohene na vahanya va kaya hovene vayigagwa.

⁹Na aho Yasoni na viye vatulaga mufungi, vavalekulaga vaje.

¹⁰Itungo lyenilo ha vuziku vadugu vavatumizaja Paulo na Sila ku Beroya, na aho vafikaga vingilaga mu Sinagogo ya Vayahudi.

¹¹Lelo venavo vavagi vasoga kukila vana Tesalonika, vagwanukulaga muhayo na kutogwa, na nsiku zyose vawikomaja vutone vavone ulu genaga gavagi syenisyo.

¹²Sisyo vingi mugati navo vasanizaja hamohene na vakima Vagriki vʼisima na vagosya vingi.

¹³Aho Vayahudi va Tesalonika vigagwa ati muhayo gwa Mulungu gwatanizivagwa na Paulo mu Beroya savasava, vizaga na kwenuko na vayigomesaja mbuto.

¹⁴Na itungo lyenilo vadugu vamufililizaja Paulo ku

¹⁵mpwani, sumbwa Sila na Timoteo vasigalaga. Navo vamufililizaja Paulo vamusikaja kusika ku Atene. Aho valivapivagwa ilagilizyo lya kuvafilila Sila na Timoteo ati, vize wangu kuwakwe, vajaga.

¹⁶Aho Paulo wavalembelaga mu Atene, roho yakwe yakilagwa muwakwe, kwisi wavonaga ati kaya yokalaga na fimbulimbuli.

¹⁷Lelo vitozaja mu Sinagogo na Vayahudi avo vamogohaga Mulungu, na higulilo nsiku zyose wayombaga na venavo wasangaja navo.

¹⁸Na vamo va Vafilosofo va fiheli fya Vaepikureo na Vastoki vingilaga mu kwiyanilizya nawe. Na vamo vayombaga, Muyombagizi mwenuyu alikova kuyombaki? alisi vangi, Aligela kitisi umo alitanizya milungu migeni, kwisi watanizaja mhola ya chelu kunguno ya Yesu na vuhembuke.

¹⁹Haho vamudimaga na vamufilaga kusika Areopago na vahayaga, Kinahe, tulikovola kumanicha vuhembeki wenuvu vupya, howene ulivutanizya?

²⁰Kwisi ulileta mihayo migeni hambele na matwi giswe, kunguno yeniyi tulikova kumanicha nguno yayo.

²¹Lelo vana Atene vose na vageni hovene vikalagamo vavagi valikova muno kuyomba na kwigwa mhola mpya.

²²Paulo wimilaga mugati na Areopago na wayombaga, Inwe vagosya va Atene, ndivona kitisi mulijama muno mu milimo ya kwisenga.

²³Kwisi aho nayumbaga kugilolela masengelo ginwe navonaga hakuhozezya hatonilweho, KUMWA MULUNGU AKAMANIKIZIVILWE. Mwenuyu homwene mulisenga vuduhu kumumanicha mwenuyu ndimutanizya inwe.

²⁴Mulungu homwene walitunda liwelelo na gose galimo, homwene ali Guku wʼilunde na wa liwelelo akikalaga mu masengelo hogene gazengilwe na makono.

²⁵Ninga akatumamilagwa na makono ga vanhu kitisi alifunda kinhu, kwisi mwenekili alivapa vose vuzuvuku na myuye na finhu fyose.

²⁶Nawe wavezaja kila igongo lya vanhu kufuma umo, vikale mu liwelelo lyose, na wavakindikilile matungo

²⁷ga ludonho na maluvimbi ga mawikalo gavo, kigele vamukove Mulungu ninga mugati na kumubabasya na kumuvona, nulu akavile kule kufuma ku umo na umo mugati niswe.

²⁸Kwisi muwakwe tulizuvuka, na tulikala na tuli na vupanga wiswe, kitisi valingi vamo mugati ninwe vayombaga, Tuli va vuvyalwa wakwe.

²⁹Kunguno tuli va vuvyalwa wakwe, tuleke kwiganika ati Mulungu alikola dhahabu ninga iwe, finhu hofyene fyavezivagwa na masala na wenge wa vanhu.

³⁰Mulungu wavagi kitisi akagawine matungo ga vuhumbu, alisi lelo alivalagila vanhu vose vanogoleke hose.

³¹Kwisi walukindikaga lusiku, aho akuliyangula liwelelo na vugolozi mugati na munhu umo, homwene wamusogolaga, na genaya wavolekaja vose ha pe aho wamuhembukaja ku lufu.

³²Aho vigagwa kunguno ya kuhembuka kwa vafwile vamo vafusanaga, na vangi vayombaga, Tulakudegeleke lusiku lungi kunguno ya mhola yeniyi.

³³Sisyo Paulo wafumaga kuwavo. Alisi vanhu vamo vadimanaga

³⁴nawe, na vasanizaja. Mugati navo wavagi Dionisio, munhu wa Areopago, na mukima lina lyakwe Damari, na vangi hamohene navo.