Read Nyamwezi Milimo 2 Bible Online

Milimo 2 - Nyamwezi bible

Milimo 2

¹Aho lwasikaga lusiku lwa Pentekote, vose vavagi hamohene hanhu hamo.

²Na kisalasala chene kululuma kwafumaga kwilunde kitisi kikungulya kihanya kiliyuma, na kwayokazaja numba yose mwenumo vikalaga,

³na gigelaga kuwavo malulimi kitisi ga moto, hogene gigavulaga na gavikalilaga kila umo mugati

⁴navo, na vose vokazivagwa na Roho Nsondo, na vavukizaja kuyomba mu fiyombele hekeheke, kitisi Roho wavapaga kuyomba.

⁵Lelo vikalaga Vayahudi mu Yerusalema, vanhu vasondo ku magongo gose hansilili nilunde.

⁶Aho kululuma kwenuku kwigelaga, mbuto vikumingaga, na vitilulaga; kwisi kila umo wigagwa, kitisi valiyomba mu kiyombele chakwe.

⁷Haho vose vitilulaga na vakumaja, navo vayombaga, Kinahe, vose venava

⁸valiyomba vakavile Vagalilaya? Hokinahe, tuliwigwa valiyomba kila umo mu kiyombele kiswe mwenumo twavyalililwe?

⁹Vaparti na Vamedi na Vaelamu,

¹⁰niswe vazengi va mu Mesopotamia, Uyahudi na Kapadokia, Ponto na Asia, mu Frigia na Pamfilia, Misri na

¹¹magunguli ga Libia na Kirene, niswe Varoma tulikala henaha, Vayahudi na vahemba vavo, Vakreta na Varabu, tuliwigwa valivitanizya milimo mihanya ya Mulungu mugati na fiyombele fiswe.

¹²Vose vakumaja, na vatavanivagwa, na vivuzaja umo ku ungi, Kinahe genaya?

¹³Alisi vangi vayeyaga, vuhaya, Vakolilwe mvinyo mpya.

¹⁴Haho Petro wimilaga hamohene na vʼikumi na umo wahamukaga muzwi gwakwe na wavawilaga, Inwe vagosya Vayahudi, ninwe vose mulikala mu Yerusalema, mugamaniche genaya, na mutege matwi ku

¹⁵mihayo yane! Kwisi venava vakakolilwe kitisi muliganika,

¹⁶lelo yili saa tatu ya limi duhu, sumbwa gali

¹⁷genaya hogene gayombilwe na mufumbuzi Yoele, Yilakwile mu nsiku zya mhelo, Mulungu aliyomba, Haho ndavamwagile vanhu vose Roho yane, kigele vana vinwe, Vayanda na vanike, vafumbule, na vasumba vagavone mawigele, Na vanamhala vinwe valote filoti.

¹⁸Ahene, kwigulya na vakumba vane, vagosya na vakima, Ndamwagwile Roho yane mu nsiku zyenizyo, kigele vafumbule,

¹⁹Na ndavezye migaka kwigulya mwilunde na malumeho hasi ku liwelelo, Magazi na moto na malunde ga lyoki.

²⁰Limi lilagaluke kuvi giti, Na mwezi kuvi magazi, Hambele na kwiza kwa lusiku luhanya na lwa lukumo lwa Guku.

²¹Haho yilakwile, ati kila umo homwene alilitana lina lyamwa Guku alapiziwe.

²²Inwe vagosya Visraeli muyidegeleke mihayo iyi: Yesu wa Nazareti, munhu homwene wazumiliziwa na Mulungu hawinwe ha milimo ya nguzu na migaka na malumenho, hogene Mulungu wavezaja hamohene nawe mugati ninwe, kitisi inwe venekili mumanikizye.

²³Mwenuyu homwene wafumivagwa hanuma na ndaka hoyene yakindikilwe na Mulungu mugati na kumanicha kwakwe kufuma kale; uyu mwamukomelaga ku musigiti, na mwamuvulagaga na makono ga va wigomu;

²⁴alisi Mulungu wamuhembukaja, aho wagatungulaga mavusatu ga lufu; kwisi wavagi akakovolilwe kutungwa nalo.

²⁵Ahene, Davidi aliyomba kunguno yakwe, Namuvonaga Guku hanahana hambele na minso gane; Kwisi aliho ha mulila gwane, kuduhu natinginiwe.

²⁶Kunguno yeniyi moyo gwane gwadehaga, na lulimi lwane lwihalalaga, Na hangi muvili gwane gukukwila mugati nʼisigizyo;

²⁷Kwisi veve kuyileka ngʼo myuye yane ha vafwile, Ninga kumutavula ngʼo Musondo wako avole.

²⁸Veve wandagilaga nzila ya vuzuvuku, Ukunokazya na kudeha ha vusyu wako.

²⁹Vagosya vadugu, mundeke nayombe ninwe welekela kunguno yamwa guku wiswe Davidi. kitisi wagulalile, na wazikilwe, na kivimbi chakwe kiliho hawiswe kusika lelo.

³⁰Kunguno wavagi mufumbuzi, na wamanikaja, kitisi Mulungu wamulahilizya na mulahi ati, ku vuvyalwa wakwe umo akwikala hʼisumbi lyakwe,

³¹mu kuvona kumbele, wayombaga kunguno ya vuhembuke wamwa Kristo, ati kulekwa ngʼo ha vafwile, ninga muvili

³²gwakwe kuvola ngʼo. Uyo Yesu Mulungu wamuhembukaja, niswe vose tuli vasangilwa ku yeniyi.

³³Hanuma uyo walinivagwa ku kukono kwa mulila kwa Mulungu wanukulaga ilagano lya Roho Nsondo kumwa Vava, lelo wayimwagilaga kitisi mulivona na muligwa.

³⁴Kwisi Davidi akalinile kwilunde, sumbwa wayombaga mwenekili, Guku wamuwilaga Guku wane, wikale ha mulila gwane,

³⁵Kusika ndivatula vanisi vako hansilili na magulu gako.

³⁶Kunguno yeniyi va numba yose yʼIsraeli vamaniche loleyene, mwenuyo Yesu, homwene mwamukomelaga ku musigiti, Mulungu wamuvezaja ave Guku na Kristo.

³⁷Aho vigagwa genaya valasagwa mu myoyo yavo, na vamuwilaga Petro na vatume vangi, Vagosya vadugu,

³⁸twiteki? Haho Petro wavitavukaga, Mupiluke moyo, na kila umo ogiwe ku lina lyamwa Yesu Kristo, kigele mupiwe vutondolwa wa mavukenaguzi ginwe, ninwe mukuchanukula kipanwa cha Roho Nsondo.

³⁹Kwisi ilagano liliho kuwinwe na ku vana vinwe na ku vose venavo vatali vali kule, vose vose hovene Guku, Mulungu wiswe, akuvitana.

⁴⁰Hangi na mihayo yingi mingi wasangilagwa kuwavo, na wavahanaga wayomba, Mukomolwe ku vuvyalwa wenuvu wa vutazi.

⁴¹Lelo venavo vagwanukulaga muhayo gwakwe vogivagwa, na ha lusiku lwenulo vongezivagwa vanhu bihi na fihumbi fidatu.

⁴²Na venavo vadimanaga mu vuhembeki wa vatume na mu lusangi na mu kugumegula mugate na mu kulomba.

⁴³Vose vingilagwa na vova; kwisi gakwilaga mamigaka mingi na malumeho ku vatume.

⁴⁴Vose hovene vasanizaja vadimanaga hamohene, na vavagi na lusangi mu finhu fyose.

⁴⁵Vaguzaja nsavo zyavo na finhu fyavo, na vavagavanaja vose kila munhu hanuma na mafundo gakwe.

⁴⁶Nsiku zyose vadilaga na moyo gumo hamohene mwisengelo, na vagumegulaga mugate numba ku numba, na vapivagwa chakulya chavo mu kwihalala na myoyo ya pe.

⁴⁷Vamugongolaga Mulungu, na vavatogezaja vanhu vose. Na Mulungu wongezaja kuwavo nsiku zyose vamo hovene vapizivagwa.