Read Nyamwezi Milimo 20 Bible Online

Milimo 20 - Nyamwezi bible

Milimo 20

¹Aho vugome wenuvu wamala Paulo wavitanaga vahemba, na wavahanaga, na wavadahaja, na wavukaga kuja ku Makedonia.

²Aho wahingulaga magunguli genaya na wavahanaga na mihayo mingi wasikaga ku Ugriki.

³Kwenuko wikalaga myezi idatu. Aho Vayahudi vakovaga kumudima, aho wadimaga kuvuka ku Shami, walomaga ndaka ya kusyoka na kuhingula Makedonia.

⁴Sopater mwana Puro muna Beroya, na vana Tesakonika Aristrarko na Sekondo, na muna Derbe Gayo, na Timoteo, na vana Asia Tikio na Trofimo vamulondaga kusika Asia.

⁵Venavo vatongelaga na vatulembelaga mu Troa.

⁶Niswe twavugaga kufuma ku Filipi hanuma na nsiku zya migate zikatumbile, na twavapandikaga hanuma na nsiku itano mu Troa, na kwenuko twikalaga nsiku mpungati.

⁷Ha lusiku lwa mbele mu yuma aho twivilingile kugumegula mugate Paulo witozaja navo, kwisi wakovaga kuvuka hawangaluke, na wajamaga mu kuyomba kusika vuziku hagati.

⁸Na zyavagi tala ningi mwisenge lya kano homwene twivilingagamo.

⁹Na musumba lina lyakwe Eutiko wikalaga mwidilisya, mwenuyu walalaga tulo; aho Paulo wajamaga kuyomba wakindagwa na tulo na wagwaga hasi kufuma ku kano ka vudatu, na aho wavukivagwa wamalaga kufwa.

¹⁰Alisi Paulo wikaga, na wamugwililaga na wamukumbataga, uhaya, Mukabubuzye ngʼo, kwisi vupanga wakwe vutali vulimo muwakwe.

¹¹Na walinaga hangi, na wagumegulaga mugate, na walyaga, na wasunsumulaga navo

¹²itungo ihanya kusika helaga, na haho wavukaga. Na vamuletaga musumba uyu mupanga na vahulikivagwa muno.

¹³Alisi iswe twatongelaga kuja ku lyato na twavugaga ku Aso, na kwenuko twakovaga kumupakila Paulo, kwisi sisyo walagilaga kunguno mwenekili wakovaga kuja lwa magulu.

¹⁴Aho wasangaja niswe mu Aso twamupakilaga na twasikaga ku Mitilene.

¹⁵Kufuma kwenuko twavugaga na ha wangaluke twasikaga ha welekela wa Kio, ha wangaluke twasikaga ku Samo, twikalaga ha Trogilio, na ha wangaluke twasikaga ku Mileto.

¹⁶Kwisi Paulo wapimaga kuyivitila Efeso, ngena akendele mu Asia, kunguno wanguhaga asike ku Yerusalema ku lusiku lwa Pentekote, ulu yakovolagwa.

¹⁷Kufuma Mileto watumizaja ku Efeso na wavitanaga

¹⁸vanamhala vʼivilingano. Na aho vafikaga hawakwe wavawilaga, Inwe mulimanicha kitisi navagi hamohene ninwe nsiku zyose kufuma lusiku lwa mbele aho nasikaga ku

¹⁹Asia, namutumamilaga Guku na vukondu vose na minsozi na magemelo hogene Vayahudi vanikwizizaja;

²⁰kitisi nkalekile kumutanizya muhayo gumo hogwene gulimuvelela na kumuhembeka ha welekela na numba

²¹ku numba; nasangilagwa ku Vayahudi na Vagriki vunogoleke kumwa Mulungu nʼisanizyo kumwa Guku wiswe Yesu Kristo.

²²Lelo lolagi, natungilwe mu roho ndija ku Yerusalema vuduhu kumanicha genaya gakunikwilila;

²³sumbwa Roho Nsondo alisangilwa kuwane mu makaya gose na aliyomba ati minyololo na mamikosi galinilembela.

²⁴Alisi nhavile kwikomya vuzuvuku wane kitisi vuli na mupango kuwane, sumbwa nalusikilizye lugendo lwane na vutumami wenuvu napivagwa na Guku Yesu kusangilwa kunguno ya mhola ya chelu ya kisa cha Mulungu.

²⁵Lelo lolagi, ndimanicha kitisi inwe kuvuvona ngʼo hangi vusyu wane, inwe vose mugati ninwe nasimizaga na navutanizaja vutemi.

²⁶Kunguno yeniyi ndisangilwa kuwinwe ha lusiku lwenulu ati nkavile na musango ku magazi ga munhu umo.

²⁷Kwisi nkalekile kumutanizya inwe ndaka zyose zya Mulungu.

²⁸Mwilindile inwe venekili nʼidale lyose mwenumo Roho Nsondo wamutulilizaja kitisi vasimamizi kulilindila ivilingano iya Mulungu holyene wisavilaga mwenekili na magazi gakwe.

²⁹Ndimanicha hanuma na kwinga kwane mapuge madaki gakwingila

³⁰mugati ninwe hogene kulileka ngʼo idale. Hangi mugati ninwe vakuvuka vanhu hovene vakuyomba mihayo ya kuvatavanya kuvaduta vahemba hanuma navo.

³¹Kunguno yeniyi mudilage minso na mwizukile ati nkazovile mu myaka idatu ha limi na ha vuziku kumuhana umo na umo na minsozi.

³²Na lelo ndimulagila inwe kumwa Mulungu na muhayo gwa kisa chakwe, hogwene gulivela kumujamilizya na kumupa isalo mugati na vose vasondohivilwe.

³³Nkatamanililwe fedha ninga dhahabu ninga fizwalo fya munhu.

³⁴Mulimanicha inwe venekili kitisi makono genaya gatumamaga ku mafundo gane na ku venavo vavagi hamohene nane.

³⁵Namolekaja mu gose kitisi yilitudima kutumama, na kuvagwasya hovene vakavile na nguzu na kugwizukila muhayo gwa Guku Yesu kitisi wayombaga mwenekili, Sisoga kupana kukila kupiwa.

³⁶Aho wayombaga genaya, wasukambaga, na walombaga hamohene na vose.

³⁷Na vose valilaga muno, vamukumbataga.

³⁸Paulo ha nhingo, na vamunonelaga, na vasativagwa muno kunguno ya muhaya ugo wayombaga, ati ava kuvuvona ngʼo hangi vusyu wakwe. Haho vamufililizaja ku lyato.