Read Nyamwezi Milimo 22 Bible Online

Milimo 22 - Nyamwezi bible

Milimo 22

¹Inwe vagosya, vadugu na vavava, mudegeleke lelo kwivula kwane hambele ninwe.

²Aho vigagwa kitisi wayombaga navo mu kiyombele cha Kihebrayo vavagi selesele, nawe wayombaga,

³Nene ndi Muyahudi, navyalilagwa mu Tarso mu Kilikia, nalelelagwa mu kaya yeniyi, nahembekagwa ha magulu gamwa Gamalieli mugati na ngʼhama zya vahenga viswe ku hanayene na navagi mugangadiki hambele na Mulungu kitisi inwe walelo.

⁴Nene navadukaja va Nzila yeniyi kusika kuvavulaga, navatungaga vagosya na vakima, na navatulaga mu jela.

⁵Na muhozya muhanya mwene alisangilwa kuwane hamohene nʼivanza lyose lya vanamhala; kuwavo napivagwa barua ku vadugu naje ku Damasko, kigele navatunge venavo vavagiko, na navafile ku Yerusalema vadukiwe.

⁶Alisi yakwilaga aho navagi njile na nayegelaga Damasko ha limi lya saa sita, kisalasala lumole luhanya lwanimulikilaga hose.

⁷Na nagwaga hasi, na nigagwa muzwi gwambwilaga, Saulo, Saulo, kuki ulimpezya?

⁸Nane namwitavukaga, Uli nani Guku? Nawe wambwilaga, Nene ndi Yesu wa Nazareti homwene ulimpezya.

⁹Na venavo vavagi hamohene nane valuvonaga lumole, alisi vakigilwe muzwi gwa mwenuyo wayombaga nane.

¹⁰Na nayombaga, Niteki Guku? Na Guku wambwilaga, Uvuke na uje ku Damasko, na kwenuko ukuwilwa gose hogene walagilagwa kugavezya.

¹¹Aho navagi nkawine kunguno ya vukeme wa lumole lwenulo, natongekagwa ha kukono na venavo vavagi hamohene nane, na ningilaga mu Damasko.

¹²Na Anania mbati, munhu musondo hanuma na ngʼhama homwene wavagi navo vusangilwa vusoga mugati

¹³na Vayahudi hovene vikalaga kwenuko, wizaga kuwane na wimaga hambele nane, uhaya, Mudugu Saulo, uvone. Na mwitungo lyenilo nalangamilaga namuvonaga.

¹⁴Nawe wahayaga, Mulungu wa vahenga viswe wakusogolaga veve ukimaniche kikowa chakwe, na umuvone Mugololoku, na ugwigwe muzwi ku mulomo gwakwe.

¹⁵Kwisi ukuvi musangilwa wakwe hambele na vanhu vose kunguno ya genayo wagawine na wagigilwe.

¹⁶Lelo kunguno yaki ulikendela? Uvuke, na wogiwe, na uguswe mavukenaguzi gako na kulitanya lina lyakwe.

¹⁷Na yakwilaga, aho nasyokaga ku Yerusalema, na navagi ndilomba mwisengelo, nakayilagwa

¹⁸mu roho, na namuvonaga, nawe alimbwila, Wanguhage, ufume wangu ku Yerusalema, kwisi venava kuwanukula ngʼo vusangilwa wako kunguno ya nene.

¹⁹Nane nayombaga, Guku, valimanicha venekili kitisi navatungaga, na navatulagulaga mu masinagogo gose

²⁰hovene vakusanizaja, na aho magazi ga musangilwa wako Stefano gazwikivagwa, nane nimaga bihi, natogezivagwa, nayilindilaga myenda yavo hovene vamuvulagaga.

²¹Nawe wambwilaga, Uje, kwisi nkukutuma kule ku vapagani.

²²Na vamudegelekaga kusika muhayo gwenugu, haho vahamukaga, vuhaya, Mwenuyu afumiwe ku liwelelo, kwisi yikavelile azuvuke.

²³Aho valilaga, na vayiponaja myenda yavo,

²⁴vazukaja luvuvu higulya, muteko walagilaga ingiziwe mu ngomwa, na wahayaga atulagulwe na avuziwe kigele amaniche nguno ya kumuhamukila syenisyo.

²⁵Aho vamutungaga na ngoye, Paulo wamuwilaga mutwale homwene wimaga bihi, Kinahe, muli na luhusa kumutunga Muroma, nawe akayangulilwe?

²⁶Aho mutwale wagigagwa, wamujilaga muteko, na wamupa mhola iyi, na wayombaga, Wenda kuvezyaki?

²⁷Munhu uyu Muroma. Muteko wizaga, na wamuwilaga, Nangu, uli Muroma? Nawe wahayaga, Ndiyo.

²⁸Muteko witavukaga, Nene nigulilaga vuzengi wenuvu na nsavo ningi. Paulo wayombaga, Nene navyalilwe navo.

²⁹Aho venavo vendaga kumuvuzya vamulekaga, na muteko wogohaga, aho wigagwa kitisi ali Muroma, na kunguno wamutungaga.

³⁰Hawangaluke, aho wakovaga kuyimanicha hanayene kunguno ya kuvulwa kwakwe na Vayahudi, wamutungulaga, na walagilaga vahozya vahanya na vʼivanza lyose vivilinge, na wamufilaga Paulo hasi, na wamwimilizaja hambele navo.