Read Nyamwezi Milimo 23 Bible Online

Milimo 23 - Nyamwezi bible

Milimo 23

¹Haho Paulo wavikomaja vʼivanza, na wayombaga, Inwe vagosya vadugu, mugati na moyo gwa pe nazuvukaga hambele na Mulungu kusika walelo yeniyi.

²Na muhozya muhanya Anania wavalagilaga avo hovene vimaga bihi vamutule ha mulomo.

³Haho Paulo wamuwilaga, Mulungu akutule veve nkande yivililwe nswakala. Veve ulikalaho kuninyagula hanuma na ngʼhama, naʼho ulilagila kuntula hokwene kukalagililwe na ngʼhama.

⁴Navo hovene vimaga bihi vahayaga, Ulimudukila muhozya muhanya wa Mulungu?

⁵Paulo wayombaga, Vadugu, nkamanikizye ati ali muhozya muhanya; kwisi yitonilwe, Uleke kumuyombya

⁶sivi muhanya wʼigongo lyako. Aho Paulo wavonaga ati lwande lumo lwavagi Vasadukayo na lungi Vafarisayo, wahamukaga mwivanza, Inwe vagosya vadugu, Nene ndi Mufarisayo, mwana wa Mufarisayo; ndiyangulwa kunguno yʼisigizyo lya vuhembuke wa vafwile.

⁷Aho wayombaga sisyo, lwanilo lwavukaga mugati na Vafarisayo na Vasadukayo, na mwivilingo gwalekanaga.

⁸Kwisi Vasadukayo valihaya ati kuduhu vuhembuke, ninga ngʼo malaika, ninga ngʼo roho; sumbwa Vafarisayo valizumya gose avili.

⁹Na ibubu ihanya lyavukaga, na vamo va vamanicha fitabu va lwande lwa Vafarisayo vavukaga, na vanilizaja muno, vuhaya, Tukawine vuvi ku munhu mwenuyu; alisi ulu roho

¹⁰ninga malaika wayombaga nawe, kinahe? Aho lwanilo luhanya lwavukaga, muteko wogohaga ati Paulo akutandulwa navo, na wavalagilaga valugaluga vike na vamunyampule kuwavo, na vamwingizye mu ngomwa.

¹¹Ha vuziku wenuvu Guku wimaga hawakwe, na wayombaga, Widibe moyo; kwisi kitisi wasangilagwa kunguno ya nene mu Yerusalema, sisyo yilikudima kusangilwa mu Roma yene.

¹²Aho helaga Vayahudi vivilingaga, na vilahizaja valeke kulya na kunwa kusika vamuvulagaga Paulo.

¹³Na avo vilahizaja syenisyo vavagi vingi kukila makumi anne.

¹⁴Venava vavajilaga vahozya vahanya na vanamhala, na vayombaga, Twilahizaja tuleke kukilavuzya kinhu kusika twamuvulagaga Paulo,

¹⁵lelo, inwe hamohene nʼivanza mumupe muteko mhola amufile hansilili kuwinwe, kitisi mwakovaga kugumanicha muhayo gwakwe sisoga; na iswe tuli tayari kumuvulaga aho atali kufikako.

¹⁶Alisi mwipwa wamwa Paulo wayigagwa mhola ya kwitegela kwavo, nawe wizaga, na wingilaga mu ngomwa na wamupozezaja Paulo.

¹⁷Na Paulo wamwitanaga umo wa vatwale, uhaya, Umufilile muteko musumba mwenuyu; kwisi ali nayo mhola ya kumupozezya.

¹⁸Haho wamusolaga, na wamufilaga kumwa muteko, na wayombaga, Mutungwa Paulo wanitanaga, na walombaga nakufilile musumba mwenuyu, homwene ali nayo mhola ya kukuwila.

¹⁹Na muteko wamudimaga kukono, wajaga ku mhelo nawe, na wamuvuzaja mu lwiviso, Uli na mhola ki kumpozezya?

²⁰Wayombaga, Vayahudi valomaga ndaka kukulomba umufile Paulo hansilili hambele nʼivanza igolo, kitisi vakovaga kuvuzilizya sisoga mhola zyakwe.

²¹Lelo, uleke kuvazumilizya, kwisi vanhu kukila makumi anne valimwitegela, navo vilahizaja valeke kulya ninga kunwa kusika vamuvulagaga, na lelo valilembela kuzumya kwako.

²²Haho muteko wamutavulaga musumba aje, na wamulagilaga, Uleke kumuwila munhu, kitisi wampaga mhola yeniyi.

²³Nawe wavitanaga vatwale vavili, na wahayaga, Muvezelezye valugaluga magana avili vaje ku Kesaria na vadamizi va farasi makumi mpungati, na va makimu magana avili, saa tatu ya vuziku;

²⁴na wavawilaga vatule tayari ndimu ya kumudamizya Paulo, na vamufile na kuhola kumwa Feliki munachalo.

²⁵Na watonaga barua ya mutindo ugu:

²⁶Klaudio Lisia alimugisya munachalo muhanya Feliki.

²⁷Munhu mwenuyu wadimagwa na Vayahudi, na wendaga kuvulagwa navo; alisi nizaga nene na valugaluga,

²⁸na namupizaja, aho nigagwa kitisi ali Muroma. Na aho nakovaga kumanicha nguno ya kuvulwa kwakwe,

²⁹namwikaja kwivanza lyavo; na navonaga ati wavulagwa kunguno ya maluvuzi ga ngʼhama zyavo; alisi haduhu nguno ya kumuvulaga ninga kumutunga.

³⁰Aho napivagwa mhola ati yavagiho ndaka mbi higulya na munhu uyu, itungo lili namutumizaja kuwako, na navalagilaga vavulani vakwe vayombe mihayo zyakwe hambele naʼho.

³¹Haho valugaluga vamusolaga Paulo kitisi valagilagwa, na vamufilaga havuziku kumwa Antipatri.

³²Alisi hawangaluke vavalekaga vadamizi va farasi vaje nawe, navo venekili vasyokaga ku ngomwa.

³³Na venavo aho vasikaga ku Kesaria, vamupaga munachalo barua, na vamwimilizaja Paulo hambele nawe.

³⁴Aho wayisomaga, wavuzaja ali wʼigunguli ki, na aho wigagwa ati

³⁵ali wa Kilikia, wayombaga, Nkukudegeleka, ulu vizaga vavulani vako savasava, na walagilaga alindilwe mu ngomwa yamwa Herode.