Read Nyamwezi Milimo 25 Bible Online

Milimo 25 - Nyamwezi bible

Milimo 25

¹Aho Festo wingilaga mu vunachalo, walinaga hanuma na nsiku idatu kufuma Kesaria ku Yerusalema,

²Haho vahozya vahanya na vahanya va Vayahudi

³vamupozezaja mhola yamwa Paulo, navo valombaga kisa alagile aletwe ku Yerusalema, kigele vamwitegele na vamuvulage mu nzila.

⁴Haho Festo witavukaga ati Paulo walindilagwa mu Kesaria, nawe mwenekili wavagi bihi mu kujako.

⁵Na wahayaga, Venava vali na vukovozi mugati ninwe vike hamohene nane, na vamuvule, ulu guliho muhayo muvi ku munhu mwenuyu.

⁶Aho wadilaga kuwavo nsiku mnane ninga ikumi, wikaga ku Kesaria, na hawangaluke wikalaga hʼisumbi

⁷lya vuyanguzi, na walagilaga ati Paulo aletwe. Aho wizaga, Vayahudi hovene vikaga kufuma Yerusalema vimaga bihi nawe, na vafumaja mbulano ningi na ntimbu kwigulya nawe, hozyene vavagi vakakovolile kusangilwa.

⁸Na Paulo wivulaga, na wayombaga, Nkasumulile ninga muhayo gumo hambele na ngʼhama zya Vayahudi, ninga hambele nʼisengelo, ninga hambele na Kaisari.

⁹Alisi Festo homwene wakovaga kuvatogezya Vayahudi, wamwitavukaga Paulo, na wahayaga, Uli tayari kulina ku Yerusalema na kuyangulwa kwenuko hambele nane kunguno ya muhayo gwenugu?

¹⁰Alisi Paulo wahayaga, Nene ndimaho hambele nʼisumbi lya vuyanguzi lya Kaisari, hokwene yandima kuyangulwa; Vayahudi nkavavipizizye muhayo gumo, kitisi veve mwenekili ulimanicha sisoga.

¹¹Ulu nene nakenagulaga, na nitaga muhayo hogwene gulisika mu kuvulagwa, nkalemile kufwa; alisi ulu genaya venava valimbula gali ga gele, kuduhu umo alikovola kuntavula kuwavo.

¹²Ndikova kuyangulwa na Kaisari. Haho Festo witozaja nʼivanza, na witavukaga, Veve wakovaga kuyangulwa na Kaisari, ukuja kumwa Kaisari.

¹³Hanuma na nsiku zimo mutemi Agripa na Berenike

¹⁴vafikaga ku Kesaria, na vamugisaja Festo. Aho vikalaga kwenuko nsiku ningi, Festo wamusunsumulilaga mutemi muhayo gwamwa Paulo, na wahayaga, Henaha aliho mutungwa, homwene walekagwa na Feliki.

¹⁵Aho navagi mu Yerusalema, vahozya vahanya na vanamhala va Vayahudi vampozezaja mhola yakwe, na valombaga ayangulwe.

¹⁶Navitavukaga ati kikavile kitilwe cha Varoma kumufumya munhu kusika muvulwa vivone na vavulani vusyu ku vusyu, na wapivagwa itungo lya kwivula mugati na vuvulwa wakwe.

¹⁷Aho vivilingaga kunu, nkakendelile, sumbwa hawangaluke nikalaga hʼisumbi lya vuyanguzi, na nalagilaga munhu uyu aletwe.

¹⁸Alisi aho vavulani vimilaga,

¹⁹vakamuvulile muhayo muvi kitisi niganikaga; sumbwa vavagi nago maluvuzi nawe kunguno ya dini yavo na kunguno ya Yesu, homwene wafwaga, alisi homwene Paulo aliyomba ati alizuvuka.

²⁰Na aho navagi na himba kunguno ya nzila ya kulonda mu muhayo gwenugu, namuvuzaja ulu wakovaga kuja ku Yerusalema ayangulwe kwenuko kunguno ya muhayo ugu.

²¹Alisi aho Paulo wakovaga kulindilwa kusika ayangulwe na Kaisari, nalagilaga alindilwe kusika nkumutumizya kumwa Kaisari.

²²Haho Agripa wamuwilaga Festo, Nane mwene ndikova kumwigwa munhu mwenuyu. Nawe wahayaga, Igolo ulamwigwe.

²³Lelo hawangaluke, aho Agripa na Berenike vizaga na lukumo luhanya, na vingilaga mwivanza hamohene na vateko, na vahanya va mukaya, Festo walagilaga Paulo aletwe.

²⁴Na Festo wayombaga, Mutemi Agripa, ninwe vose hovene muliho hamohene niswe, mulimuvona munhu uyu, kunguno yakwe mbuto ya Vayahudi vizaga kuwane mu Yerusalema na henaha savasava, vahamukile ati yikamudimile mwenuyu kuzuvuka hangi.

²⁵Alisi navonaga ati akitile muhayo, hogwene gulisika mu kuvulagwa, na aho mwenekili wakovaga kuyangulwa na Kaisari, napimaga kumutumizya kwe nuko. Lelo nkavile nago muhayo gwa lole kunguno yakwe gwa kumutonela guku wane.

²⁶Kunguno yeniyi namuletaga hambele ninwe, na hambele naʼho mutemi Agripa, kigele ulu wavuzivagwa, nave nayo mihayo ya kutona.

²⁷Kwisi navonaga yili ya gele kumutumizya mutungwa vuduhu kufumya mhola ya vuvulwa wakwe.