Read Nyamwezi Milimo 26 Bible Online

Milimo 26 - Nyamwezi bible

Milimo 26

¹Lelo Agripa wamuwilaga Paulo, Uli na luhusa kwivula. Haho Paulo wagololaga kukono kwakwe, na

²winenaga giki: Ndideha mutemi Agripa kunguno nkwinena hambele naʼho walelo kunguno ya gose genaya

³ndivulwa na Vayahudi; kwisi veve ulimanicha fitilwe fyose na maluvuzi gose ga Vayahudi; kunguno yeniyi ndikulomba undegeleke na kulembelambela.

⁴Kusimiza kwane kufuma vuyanda wane kwavagi kufuma mbuki mugati nʼigongo liswe, na mu Yerusalema, na

⁵Vayahudi vose valikumanicha; kwisi valinimanicha kufuma kale, ulu valitogwa kusangilwa, kitisi nasimizage kitisi Mufarisayo mu kulonda kiheli cha ludonho luhanya mu dini yiswe.

⁶Na lelo ndiwima henaha nayangulwe kunguno yʼisigizyo lya ilagano, holyene

⁷Mulungu wavapaga vahenga viswe, na holyene magongo giswe ikumi na avili galisigizya kulifikila mugati na kumutumamila Mulungu na vujamu havuziku na halimi. Kunguno yʼisigizyo lyenili ndivulwa na Vayahudi, mutemi.

⁸Kuki muliganika ati yikavile ya

⁹kusaniziwa ati Mulungu alivahembucha vafwile? Ahene, nene mwene niganikaga mu moyo gwane ati yandima kulihangilizya lina lyamwa Yesu wa Nazareti.

¹⁰Nago nagavezaja mu Yerusalema, navatulaga vasondo vingi mu jela, kwisi napivagwa vukovozi ku vahozya

¹¹vahanya, na aho vavulagagwa nazumilizaja. Na mu masinagogo gose navadukaja kingi, na navakungilizaja vafusane, na navitilaga kisila kitisi musazi, na navapezaja kusika makaya ga vugeni.

¹²Lelo, aho najaga ku Damasko na vukovozi na malagilizyo kufuma ku vahozya vahanya,

¹³limi hagati navonaga, mutemi, lumole kufuma kwilunde, vukeme walo kitisi limi, lwanimulikilaga navo vose hovene vayumbaga hamohene nane.

¹⁴Aho iswe vose twagwaga hasi, nigagwa muzwi gwambwilaga mu kiyombele cha Kihebrayo, Saulo, Saulo, kuki ulimpezya? Yili kitimbu kuwako kutula ilambi ku mugela.

¹⁵Nane nahayaga, Uli nani Guku? Na Guku wayombaga, Nene ndi Yesu homwene ulimpezya.

¹⁶Alisi uvuke, na wime na magulu gako; kwisi kunguno yeniyi nigelaga kuwako, nakusogole uve mutumami na musangilwa kunguno ya genaya wagavonaga, nago

¹⁷hogene nkukufumbulila, nkukupizya ku va chalo, na

¹⁸ku vapagani kuwavo ndikutumizya, kigele uvatunuzye minso gavo, vapiluke kufuma mu giti ku mwanga, na kufuma mu nguzu yamwa Shetani kufika kumwa Mulungu, vatondolwe mavukenaguzi gavo na vapiwe isalo mugati navo hovene vasondohivilwe mu kunsanizya.

¹⁹Kunguno yeniyi, mutemi Agripa, nkavutalile

²⁰wigele wʼilunde; sumbwa navatanizaja va mu Damasko hambele, na va mu Yerusalema, na hangi va nsi yose ya Uyahudi, na vapagani, vanogoleke na vapiluke moyo kumwa Mulungu, na vavezye milimo yilisika isima lya kupiluka moyo.

²¹Kunguno yeniyi Vayahudi vandimaga mwisengelo, na vagemaga kumbulaga.

²²Lelo yili kunguno ya vugwasya navupivagwa kumwa Mulungu ati ndima kusika lelo yeniyi kusangilwa hambele na vado na vahanya vuduhu kuyomba muhayo gumo, sumbwa yeniyi vafumbuzi na Mose vayombaga yikukwila,

²³kitisi yamudimaga Kristo kudukiwa, na kitisi mwenuyu wa mbele mugati na kuhembuka kwa vafwile ku lufu akutanizya mhola ya lumole ku vanhu vakwe na ku vapagani.

²⁴Aho winenaga sisyo, Festo wahamukaga na muzwi muhanya, Paulo, wasalaga, masala gako mingi galikusazya veve.

²⁵Alisi Paulo wahayaga, Nkasalile, Festo muhanya, sumbwa ndiyifumya mihayo ya lole na ya nguno.

²⁶Kwisi mutemi aliyimanicha mihayo yeniyi, na kuwakwe ndiyomba welekela; kwisi ndimanicha ati kuduhu muhayo gumo gwa yeniyi guvisilwe hambele nawe;

²⁷kwisi genaya gakakwilile mu lwiviso. Mutemi Agripa, ulivasanizya vafumbuzi? Namanikizye kitisi ulivasanizya.

²⁸Na Agripa wamuwilaga Paulo, Yasigala mihayo mido duhu ya kunkinda nave Mukristo.

²⁹Na Paulo wahayaga, Ndimulomba Mulungu, yive mido ninga mingi, ati ngʼo veve duhu, sumbwa vose venava valinigwa walelo vave kitisi nene, sumbwa minyololo yeniyi.

³⁰Haho mutemi wavukaga, na munachalo, na Berenike, navo vikalaga hamohene navo.

³¹Aho vavagi vajile vayombaga hamohene, vuhaya, Munhu mwenuyu akavezizye kinhu kilisika ku lufu ninga minyololo.

³²Na Agripa wamuwilaga Festo, Munhu mwenuyu wavelaga kutungulwa, ulu akakovile kuyangulwa na Kaisari.