Read Nyamwezi Milimo 27 Bible Online

Milimo 27 - Nyamwezi bible

Milimo 27

¹Aho yapimagwa ati tukuvuka kuja ku Italia, vamutavulaga Paulo na vatungwa vangi mu makono ga mutwale, lina lyakwe Yulio, wa mbuto ya Kaisari.

²Na twingilaga mu lyato lya Adramiti, holyene lyatungilizaja kuja ku makaya ha nguka ya Asia, na twavugaga; twavagi nawe Aristarko muna Makedonia wa Tesalonike.

³Hawangaluke twasikaga ku Sidoni; na Yulio wamulindilaga Paulo sisoga, na wamupaga luhusa aje ku vanwani vakwe asungwe navo.

⁴Twafumaga kwenuko, twavugaga tulivita bihi na Kipro, kunguno muyaga gwafumaga uko tujile.

⁵Aho twavitaga nyanza ya lwande lwa Kilikia na Pamfilia, twasikaga ku Mira mu Likia.

⁶Na kwenuko mutwale wavonaga lyato lya Aleksandria lijile ku Italia, na watwingizaja mwenumo.

⁷Twalitwayumba hadohado nsiku ningi, na migogolo mingi twasikaga ku Knido, na kunguno muyaga gwatuhangilizaja, twavitaga bihi na Krete, ha lwande lwa Salmoni.

⁸Na twavitaga henaho na migogolo na twasikaga henaho halitanwa Bandari Nsoga bihi na kaya ya Lasea.

⁹Aho zyavitaga nsiku ningi, na lugendo lwavagi lwa misyolo, kwisi nsiku zya kufunga zyavitaga, Paulo

¹⁰wavahanaga, na wavawilaga, Vagosya, ndivona ati lugendo ulu lukuvi na misyolo na vuzimile wingi, ngʼo ku miligo na lyato duhu, sumbwa ku vuzuvuku wiswe savasava.

¹¹Alisi mutwale wamudegelekaga mudima sukani na musava lyato kukila mihayo yamwa Paulo.

¹²Na kunguno bandari yavagi yikavelile mu kwikala mwitungo Iya mbeho, vingi vapimaga tuvuge tufumeko, kigele tusike ku Foniki, ulu yakovolagwa, na kwikala kwenuko mwitungo lya mbeho, yili bandari ya Krete, yililola ku sukuma ya kiya na ku dakama ya kiya.

¹³Lelo aho muyaga gwa dakama gwayumaga hado, viganikaga kitisi vagapivagwa hogene vagafundaga, na vayilinaja nanga, na vavugaga bihi na nguka ya Krete.

¹⁴Alisi hanuma na katungo kikungulya kihanya chayumaga, hochene kilitanwa Eurakulo.

¹⁵Na aho lyato lyafilagwa nacho, na likakovolile kugukinda muyaga twalekaga duhu tufilwe.

¹⁶Alisi aho twasikaga bihi ku kisilwa kido kilitanwa Klauda, twakovolaga mugati na migogolo kulipizya lyato.

¹⁷Aho walilinaja vatumilaga mavugwasya, na valitungaga lyato na ngoye, na kunguno vogohaga ati vakufilwa na kuhaga mu Sirti

¹⁸vikaja matanga, na vafilagwa syenisyo. Na kunguno twadukaga muno na kikungulya, vavukizaja hawangaluke kutagila miligo mu nyanza;

¹⁹na ha lusiku lwa vudatu vatagilaga fiseme fya lyato na makono gavo.

²⁰Alisi aho limi ninga masonda gakigelile ku nsiku ningi, na kikungulya kihanya chatudimaga, twalekaga kwisigizya ati tukupiziwa.

²¹Na aho vavagi vakalile nsiku ningi, Paulo wimilaga mugati navo, uhaya, Inwe vagosya, ulu mwandegelekaga na mukalekile Krete, mbe mukapivilwe misyolo yeniyi ninga vuzimile wenuvu.

²²Lelo ndimuhana mwidibage moyo; kwisi kuduhu umo mugati ninwe akuzimila sumbwa lyato.

²³Kwisi ha vuziku wenuvu malaika wa Mulungu homwene ndi wakwe, na homwene ndimutumamila, wigelaga kuwane,

²⁴uhaya, Uleke kogoha, Paulo, ukwimila hambele na Kaisari, na lolaga, Mulungu wakupaga vose hovene

²⁵valivuga hamohene naʼho. Kunguno yeniyi, vagosya, mwidibage moyo; kwisi ndimusanizya Mulungu ati yikukwila kitisi yayombilwe kuwane.

²⁶Alisi yilitudima kuhaga ku kisilwa.

²⁷Ha vuziku wʼikumi na tunne, aho twavagi tulifilwa uko na uko mu nyanza ya Adria, vavugi viganikaga ha vuziku hagati ati nsi yili bihi.

²⁸Na aho vapimaga, vavonaga makono makumi avili, na aho vapimaga hangi kumbele hado, vavonaga makono ikumi na atano.

²⁹Na vogohaga ati tukutagilwa mu masingiwe, na vaponezaja nanga inne zya kunuma ya lyato, na valembelaga wangaluke.

³⁰Aho vavugi vagemaga kupela na kulileka lyato, na vawikaja wato mu nyanza, kitisi vakovaga kuponezya nanga zya kumbele zya lyato.

³¹Haho Paulo wavawilaga mutwale na valugaluga, Ulu venava kwikala ngʼo mu lyato, mukakovolile kupiziwa.

³²Haho valugaluga vatinaga ngoye zya wato, na vavulekaga vugwe.

³³Aho helaga Paulo wavalombaga vose valye chakulya, na wayombaga, Walelo luli lusiku lwʼikumi na tunne mu kulembela na kudila

³⁴vuduhu chakulya, na mukalile kinhu. Kunguno yeniyi ndimulomba mulye chakulya; kwisi syenisi yilimuvelela mupiziwe; kwisi kuduhu luzwili lumo lwa mitwe yinwe lukuzimila.

³⁵Aho wayombaga genaya, wasolaga mukate, wamulumbilaga Mulungu hambele

³⁶na vose, wagumegulaga, na wavukizaja kuilya. Haho vose vazamaga na valyaga chakulya.

³⁷Na twavagi mu lyato vanhu magana avili na makumi mpungati na mkaga.

³⁸Aho vose vigutaga, vapunguzaja miligo ya lyato mu kutagila chakulya mu nyanza.

³⁹Aho helaga vavagi vakayimanikizye nsi yeniyi, alisi vavonaga vufuke wa nyanza howene wavagi na mbalamo, mwenumo valomaga kulingizya lyato ulu yakovolagwa.

⁴⁰Na vazitinaga ngoye zya nanga, na vazilekaga mu nyanza, hangi vazilogozaja ngoye zya sukani, na valinaja itanga ido lidime muyaga na vajaga ku mbalamo.

⁴¹Alisi vahagaga henaho gavagiho minzi mingi ha malwande gose avili, na vasikaja lyato, na mutwe gwa lyato gwahagaga na gwikalaga vuduhu kutinginiwa, alisi itako lyalyo lyavelagulagwa na nguzu zya mavimbi.

⁴²Lelo valugaluga vakovaga kuvavulaga vatungwa, ngena umo apele mu kogela.

⁴³Alisi mutwale, homwene wakovaga kumupizya Paulo, wavahangilizaja kumazya ndaka yavo, nawe walagilaga venava vakovolaga kogela vitwile mu nyanza vasike hambele ku

⁴⁴nguka, navo vasigalaga vipizye, vamo ku mbavo na vangi ku fipande fya lyato. Na sisyo yakwilaga ati vose vafikaga ha nguka mu kuhola.