Read Nyamwezi Milimo 8 Bible Online

Milimo 8 - Nyamwezi bible

Milimo 8

¹Na Saulo watogezivagwa na kuvulagwa kwakwe, Ha lusiku lwenulo wavukaga vuduchi vuhanya mwivilingano mu Yerusalema, na vose vasambalaga mu nsi ya Uyahudi na Samaria, sumbwa vasigalaga vatume duhu.

²Vanhu hovene vamogohaga Mulungu vamuzikaga Stefano, na vamulililaga makungwi mahanya.

³Alisi Saulo walidukaja ivilingano, wingilagamo mu manumba, wavafumaja vagosya na vakima, na wavatulaga mu jela.

⁴Venavo vasambalaga, vayumbaga hose, vatanizaja muhayo gwa Mhola ya Chelu.

⁵Na Filipo wasikaga

⁶ku kaya ya Samaria, na wavatanizaja Kristo. Na mbuto zya vanhu vadegelekaga. na moyo gumo genaya gatanizivagwa na Filipo, aho vamwigagwa na vayivonaga migaka hoyene vayivezaja.

⁷Kwisi vingi vavagi nayo migavo ya zoma, hoyene yafumaga kuwavo na kuhamuka na kilaka, na vingi valema na vasakazu vapizivagwa.

⁸Na kwavagiho kudeha kuhanya mu kaya iyo.

⁹Na munhu umo, mufumu, lina lyakwe Simoni, wavagimo mu kaya yeniyo, na wavatilulaga vana Samaria na mavila gakwe, na mwenekili wayombaga ati, ali muhanya.

¹⁰Vose, vado na vahanya, vadimanaga nawe, na vayombaga, Mwenuyu ali nguzu ya Mulungu, hoyene yilitanwa nhanya.

¹¹Na vadimanaga nawe, kunguno nsiku ningi wavatilulaga na mavila gakwe.

¹²Alisi aho vamusanizaja Filipo, homwene wavatanizaja mhola ya chelu kunguno ya vutemi wa Mulungu na lina lya Yesu Kristo, vogivagwa vagosya na vakima.

¹³Na Simoni mwenekili wasanizaja, na hanuma na kogiwa kwakwe wadimanaga na Filipo, na aho wavonaga malumeho na mamigaka mahanya galiveziwa nawe, witilulaga muno.

¹⁴Aho vatume, hovene vavagi mu Yerusalema, vigagwa, ati Samaria yagwanukulaga muhayo gwa Mulungu, vavatumizizaja Petro na Yohana.

¹⁵Navo aho vasikaga, vavalombelaga vapiwe Roho Nsondo.

¹⁶Kwisi yavagi yitali kumwikila ninga umo mugati navo, sumbwa vogivilwe duhu ku lina lyamwa Guku Yesu.

¹⁷Haho vavatulilaga makono, navo vanukulaga Roho Nsondo.

¹⁸Aho Simoni wavonaga, ati vanhu vapivagwa Roho Nsondo mu kutulilwa makono na vatume, wavaletelaga mapesa,

¹⁹uhaya, Mumpe nane vukovozi wenuvu, kigele mwenuyu ndimutulila makono apiwe Roho Nsondo.

²⁰Alisi Petro wamuwilaga, Fedha zyako zizimanguke hamohene naʼho, kunguno wiganikaga ati ukugada kipanwa cha Mulungu na mapesa.

²¹Ukavile nʼifungu ninga vugade mugati na muhayo gwenugu; kwisi moyo gwako gukavile gwa lole hambele na Mulungu.

²²Kunguno yeniyi unogoleke ku vuvi wako wenuvu na umulombe Guku, kigele, ulu yakovolwa, Ilome lya moyo gwako litondolwe.

²³Kwisi ndivona ati uli na vululu kitisi ndulila, na utungilwe na minyololo ya wigomu.

²⁴Na Simoni witavukaga, uhaya, Mundombele inwe kumwa Guku, ngena muhayo ninga gumo gwa mihayo yeniyi mwambwilaga gunikwilile.

²⁵Aho vamalaga kusangilwa, na kutanizya muhayo gwamwa Guku, vasyokaga ku Yerusalema, na vatanizaja mhola ya chelu mugati na makaya mingi ga Vasamaria.

²⁶Malaika wamwa Guku wamuwilaga Filipo, uhaya, Uvuke, na uje ku dakama ku nzila iyo yilifuma ku Yerusalema, na yilika ku Gaza, yili mwibalangu.

²⁷Nawe wavukaga, wajaga; na lolaga, wamuvonaga munhu wa Etopia, munikulu wa vukovozi na kasika wa nsavo zyamwa Kandake, Mutemi mukima wa Etiopia; uyu waliwaja ku Yerusalema kukalomba.

²⁸Na wavagi alisyoka alikala mu mugali gwakwe na alisoma kitabu cha mufumbuzi Yesaya.

²⁹Na Roho wamuwilaga Filipo, Wegele na udimane na mugali gwenugu.

³⁰Haho Filipo wamupelelaga, na wamwigagwa kitisi alisoma kitabu cha mufumbuzi Yesaya, na wamuvuzaja,

³¹Kinahe, ulimanicha genaya ulisoma? Nawe witavukaga, Nakovole kinahe, ulu kuduhu umo alindangisya? Na wamwikumbilizaja Filipo aline ikale hamohene nawe.

³²Nalyo ifungu lya kitabu, holyene wasomaga, lyavagi lyenili, Kitisi ngʼholo wafilagwa kuvulagwa, Na kitisi kadilana kalihulika hambele na uyo alikasunzula, Sisyo akasamile mulomo gwakwe.

³³Mu kudoheleziwa kwakwe wakanilagwa kuyangulwa kigololoku; Nani alivela kuyomba kunguno ya mugana gwakwe? Kwisi vuzuvuku wakwe wingivilwe ku nsi.

³⁴Na munikulu wamuwilaga Filipo, Ndikulomba umbwile, kunguno yamwa nani mufumbuzi aliyomba genaya?

³⁵Na Filipo wavukizaja kuyomba, na kufuma vutone wenuvu wamutanizaja mhola yamwa Yesu.

³⁶Aho vasenegelaga hambele, vafikaga ha minzi, na munikulu wayombaga, Lolaga, henaha galiho minzi, Kinhu ki

³⁷kilinihangilizya ndeke kogiwa? Na Filipo wayombaga, Ulu ulisanizya na moyo gwako gose, yilivela kukwila. Nawe witavukaga, uhaya, Ndisanizya ati Yesu Kristo ali Mwana wa Mulungu.

³⁸Na walagilaga ati mugali gwime, na vose vavili vikaga mu minzi, Filipo

³⁹na munikulu, na wamogaja. Aho wafumaga ku minzi, Roho ya Guku yamujanaga Filipo, na munikulu akamuwine hangi; alisi wajaga nzila yakwe na kudeha.

⁴⁰Alisi Filipo wigelaga mu Asdodi, na wayumbaga hose alitanizya mhola ya chelu mu makaya gose, kusika wafikaga ku Kesaria.