Read Nyamwezi Varoma 14 Bible Online

Varoma 14 - Nyamwezi bible

Varoma 14

¹Mumwanukule mwenuyo sisoga homwene ali musakazu mwisanizyo, na muleke kugayangula miganiko gakwe.

²Umo ali nʼisanizyo lya kulya tose, alisi ungi homwene ali musakazu mwisanizyo akulyaga makuvi duhu.

³Homwene akulyaga tose aleke kumuvengelezya uyo akalyaga tose; nawe akalyaga aleke kumuyangula uyo akulyaga, kwisi Mulungu wamalaga kumwanukula.

⁴Veve uli nani homwene ulimuyangula mukumba wa ungi? Kwima kwakwe na kugwa kwakwe yili milimo ya gukuye.

⁵Ahene akwima kwisi Guku alikovola kumwimika. Umo alizikuzya nsiku zimo kukila zingi, alisi ungi alivona ati nsiku zyose zili zya mutindo gumo. Alisi kila munhu agamaniche genaya mu moyo gwakwe mwenekili.

⁶Homwene alilukuzya lusiku lumbati, alilukuzya kunguno yamwa Guku; homwene akulyaga, akulyaga kunguno yamwa Guku, kwisi alimulumbila Mulungu; na homwene akalyaga, akalyaga kunguno yamwa Guku, nawe mwene alimulumbila Mulungu.

⁷Kwisi kuduhu umo mugati niswe alizuvuka kunguno yakwe mwenekili duhu, na kuduhu umo

⁸alifwa kunguno yakwe mwenekili duhu; kwisi ulu tulizuvuka, tulizuvuka kumwa Guku, na ulu tulifwa, tulifwa kumwa Guku; kunguno yeniyi, ulu tulizuvuka ninga tulifwa tuli vamwa Guku.

⁹Kwisi kunguno yeniyi Kristo wafwaga na wahembukaga hangi, kigele ateme kwigulya na vafwile na vazuvuku vene.

¹⁰Alisi veve, kuki ulimuyangula muduguyo? Naʼho mwene, kuki ulimuvengelezya muduguyo? Kwisi iswe vose tukwima hambele nʼisumbi lya vuyanguzi lya Mulungu;

¹¹kwisi yitonilwe, Kitisi nene ndizuvuka loleyene, Guku alihaya, ma gulu gose gakusukamba hambele na nene, Na kila lulimi lukumuzumilizya Mulungu.

¹²Sisyo kila umo mugati niswe akwivula mwenekili hambele na Mulungu.

¹³Sisyo tuleke kwiyangula ungi ku ungi, sumbwa mugukindike muhayo ugu: muleke kumutulila mudugu kinhu cha kwikumpa ninga cha kumugwisya.

¹⁴Ndimanicha na ndigudima muhayo gwenugu mugati na Guku Yesu ati, haduhu kinhu hochene kili mwiko mugati nacho chenekili. Kinhu kili cha mwiko duhu ku mwenuyu alikilolela kuvi cha mwiko.

¹⁵Kwisi ulu veve ulimusatya muduguyo kunguno ya chakulya chako, veve ukavile kusimiza hangi mugati na kutogwa. Uleke mugati na chakulya chako kumuzimizya mwiyo kunguno yakwe Kristo wafwaga.

¹⁶Mwikomye ati genaya gali magelanizu kuwinwe galeke kufuswa.

¹⁷Kwisi vutemi wa Mulungu vukavile kitisi kulya na kunwa, sumbwa vugololoku na kuhola na kudeha mugati na Roho Nsondo.

¹⁸Kwisi mwenuyo homwene alimutumamila Kristo mugati na genaya, alimutogezya Mulungu na alidehelwa na vanhu.

¹⁹Kunguno yeniyi tugalonde genaya galileta kuhola na hogene galitujamilizya iswe hamohene. Uleke kuyivipya milimo ya Mulungu kunguno ya chakulya.

²⁰Gose gali masondo, alisi gali mavi ku mwenuyo alilya mugati na kwikumpa.

²¹Yili sisoga uleke kulya nama ninga kunwa mvinyo ninga kinhu hochene kilikovola kumukumpya muduguyo.

²²Isanizyo ilo uli nalyo, uve nalyo hawako mwenekili hambele na Mulungu. Welukilwa mwenuyo akavile kwiyangula mwenekili mugati na genayo aligasanizya kuvi masoga.

²³Alisi homwene alilya mugati na kususya wayangulilwe, kunguno akalile mugati nʼisanizyo; na gose genaya gakavile kufuma mwisanizyo gali vukenaguzi.